-
تسجيل الدخول
أهلا وسهلا بك إلى منتديات طريق سورية.
إذا كانت هذه زيارتك الأولى للمنتدى، فيرجى زيارة صفحة التعليمات، بالضغط هنا. ربما سيتوجب عليك أن تقوم بالتسجيل بالضغط هنا اذا رغبت بالمشاركة في المنتدى، أما إذا رغبت بقراءة المواضيع فتفضل بزيارة القسم الذي ترغب أدناه.
للتسجيل اضغط هنا.

العودة   منتديات طريق سورية > المنتديات الثقافية والأدبية > منتدى النثر والخواطر

منتدى النثر والخواطر مخصص لقصائد الشعر الحر (شعر التفعيلة) والخواطر الادبية (النثريات)


رد
أدوات الموضوع
غير مقروء 28-09-2010, 20:35   #1
s-tiger
مشترك جديد
 
الصورة الرمزية s-tiger

معلومات

الانتساب : Mar 2010
المشاركات : 11
بمعدل : 0.01 يومياً
الجنس : male



قوة التقييم: 0
التقييم: 10
s-tiger لديه سمعة عادية

s-tiger غير متصل

افتراضي اجمل ما قال الشاعر الراحل عيسى ايوب

القصيدة الأولى
الأرض
يا هالأرض
بحبك أنا وسع الأرض
و أكتر ما في بين البشر
رضى و زعل
و حب و بغض
أنا بحبك يا هالأرض
***
بغار عليكي
أكتر من عاشق ضيعجي
أبجديتو خبز التنور و أوف الرعيان
و صبية سمرا ممشوقة
و صلو جدايلها للأرض
بغار عليكي
غيرة جندي عَ باروده
مسمي طلقاتا بأسامي ولادو
و هوي و هيي باسم الأرض
***
و عايشلك عيشة ناطور كروم العنب
بعز الموسم
و كرمو عناقيدا شهوة
و عيونو من خوفو عليكي
ما بيدوقو طعم الغمض
أراضي كتير بهالأرض
فيها حنطة ووجع و فرح و جبال و صحرا ووديان
فيها بيوت شي عم يبقى
شي بيموت
شي من رمل
شي صوان
لكن هالأرض اللي منزرع فيها الإنسان
بيطلع إنسان
بتكون إلنا هالأرض
يا هالأرض
أذكري شو كنتيلي مخدة
أنا و راجع من هدير التعب البري
و من حنان الشمس الحدة
و خدك ضمو على خدي
و رعشة تمرق
متل الما بعرف سميها
بكرا بيسموها بعدي
و بيمشي ترابك بعروقي
عالهدى يمشي
يسافر فيي
و عند محطة قلبي يهدي
يغار ... يجن ...و يرجع يهدا
لما يلاقي كمشة منو
ربياني بقلبي من مده
***
بتذكر يا أرض بلادي
قالو لي : بعد الولادة
الداية ( أم عبدو ) الختيارة
حتى يعيشو عَ أيديها ولاد الحارة
تملحن بتراب الأرض
و لما نوقع عَ المساطب
كانوا أهل الحارة يرشو
عالجرح من تراب الأرض
و لما الوجع يشد و يمرق
عَ سواعد أهل المشقية
كان الدوا تراب الأرض
***
بذكر لكن من زمان
لما بو ديب الطحان
بسفر برلك الجوعان
لملم حالو و هجر الضيعة
صرولو خبز التنور
شروالو و كمشة بخور
و حتى يرجع
ربطولو بطرف قمبازو
( هالقد ) من تراب الأرض
***
كنت زغير
العب عَ مسطبة الضيعة
( بالدويخة ) و ( أم عميش ) و بالمقليعة
أمي تناديلي : يا أبني
خود الزوادة لبيك
ليش وينو بيي ؟
بالأرض
و هي مهموكة تا تخلص شغلا
و وينك يا أمي ؟ عالأرض
و تقعد هيي و بيي تقعد
هي تنشف عرقو ... وهوي
يحكيلا عن حب الأرض
أمي تغار يقلا أعقلي ... أنت حلوة
لكن بيني و بينك ... ما في
ما في أحلى من الأرض
***
و عند المسا لما يرجعوا عالضيعة
يولد سؤال و سؤال
كيفا يا بو فلان الأرض
وكيفا يم فلان الأرض
و أنا و زغير
كنت محير
الأرض اسما أمي و بيي
و لا هني اسمن أرض
***
يا هالأرض
يا سفر أهلي و أجدادي
و شهدا بلادي
يا نشيد تعلمتو أنا و زغير
و عم ربي عليه و لادي
يا أم الما بتعرف تزعل
صدرا كبير و بالا أطول
ما في طفل و ما عمر عَ صدرك بيت زغير متلو
و حفر على شباكو أسمو
ما في صبية و ما حنت أيديها
ب ليلة عرسا و حنت رفقاتا
حتى رفقاتا ما ينحرموا
و ما في مهرة و ما رقصت هيي و الغبرة
ما في شجرة و ما راحت بترابك سفرة
و سفرة و سفرة
ما في سيف و ما تجلخ عَ حجارك
مرة و ألف مرة
ما في جندي بوطني إلا
بجيابو يا عالخوذة
في شي من ريحة هالأرض
و بعدو حدا بيسأل ؟ ليش
و طني عم يندر ولادو
شهدا لشبر من الأرض ؟؟؟
***
مرة قاعد أنا و جدي
متكي و عامل كوعو مخدة
و تسعينو ما بين الأرض و بين الأرض
يحكيلي
استغرب
يزعل
حتى صدق :
يحلفلي بتراب الأرض
يقلي : و حياة اللي بالأرض
و بمعزة كل اللي راحو
كرمال محبة هالأرض
و يا خدني الفرح من حالي
لما جدي يضوج قبالي
يحتد يقلي يا أبني
الأرض الأرض
ما سمعتن لما بيقولو
( أنا ماشي بأرض الله )
و لك يا جدي
حتى الله عندو أرض
  رد مع اقتباس
اعلانات
غير مقروء 01-10-2010, 02:45   #2
ليلى6
مشترك مبتدئ
 
الصورة الرمزية ليلى6

معلومات

الانتساب : Sep 2010
المشاركات : 61
بمعدل : 0.04 يومياً
الجنس : female



قوة التقييم: 17
التقييم: 103
ليلى6 لديه سمعة جيدةليلى6 لديه سمعة جيدة

ليلى6 غير متصل

افتراضي رد: اجمل ما قال الشاعر الراحل عيسى ايوب



و بعدو حدا بيسأل ؟ ليش


و طني عم يندر ولادو


شهدا لشبر من الأرض ؟؟؟


***


لااستطيع ان اقول
سوى
بورك بكاتبها وناقلها
  رد مع اقتباس
رد

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع إلى



الوقت في المنتدى بحسب توقيت سورية - الساعة الآن 06:10 .


Powered by vBulletin® Version 3.7.3
Copyright ©2000 - 2014, Jelsoft Enterprises Ltd.
-------------------------------------------
سورية الحبيبة، سورية الغالية، سورية الوطن، سورية الأم    سورية يا مهد الحضارة، سورية يا بلد الشجعان    سورية يا عربية من أجلك ولدنا ولأجلك نموت