سؤال للمغتربين [الأرشيف] - منتديات طريق سورية
المساعد الشخصي الرقمي

مشاهدة النسخة كاملة : سؤال للمغتربين

smilest
03-07-2007, 10:16
يراودني السؤال التالي :

لماذا اللبنانيون يحبون بعضهم ببلاد الغربة وكذلك المصريون ... والفلسطينيين ...نراهم متكاتفون ويساعدون بعضهم البعض
أما السوريون فلا

هذا السؤال راودني عندما سمعت من أحد الأشخاص السوريين ينقل لي هذه العبارة من أحد المغتربين

روحوا حبوا بعض قبل

هل أجد عند أحد ما الاجابة الشافية
أبو ناجي
03-07-2007, 10:42
أم أنس العزيزة ...

سؤال ممتاز , ومهم فعلا ..

هناك جانب كبير من المصداقية في هذا السؤال , ولكن لو عدنا لتجزيء الأمور واستخلاص الأسباب التي ربما تقدم لهكذا تصرفات سنجد بأن الأمر جد بسيط ...

مثلا :

انظري للسوري في بلده قبل أن تنظري إليه خارجها , كيف يعامل الشارع , كيف يرمي كل القذارة بعنف وحقد و كأن الأمر لا يعدو كونه ثأر بين المواطن والشارع , انظري إليه كيف يستعمل المنبه بجنون وانحطاط بل وانعدام أخلاقي ضد الناس والمارة , انظري إليه حين يتعامل مع المشاة وهو قابع داخل سيارته الجربانة كيف لا يعطي لهم طريقا للمرور مع أن العرف العام المروري يقدم البشر على الآليات , كل دول العام تعطي الأفضلية للإنسان إلا المواطن الجميل البريء داخل حلمه الحديدي الذي ينتشي سعادة داخله يحاول أن يدهس ويمعس ويفعس أي مواطن يحاول عبور الشارع , أو يتجرأ ويفكر في أن يحوز الأفضلية قبل السيارة العظيمة , انظري للمواطن الموظف كيف يتعامل مع مواطنه صاحب المصلحة بالرشى والمحسوبيات واللصوصية , انظري إلى التلوث الذي يسببه أصحاب المصانع ليضخوا السموم كل أشكال السموم في السواقي والأنهار , انظري كيف خربوا بردى وقويق وغيرهما , انظري للتعاملات المالية بين ا لناس , والشعار السائد , ما حك جلدك مثل ظفرك , وفخار يكسر بعضه , انظري لتعامل السفارات السورية مع مواطنيها بكل ( المحبة واللهفة والشوق والعشق والهيام والغرام والانتقام ) ..!! الخ

أما عن اللبنانيين والمصريين والسورين وغيرهم في بلاد الغربة والخليج كمثال , الأمر فيه مبالغة بعض الشيء , فهؤلاء لا يجتمعون مثلا في مباراة سلة لتشجيع طرف ضد طرف آخر لأسباب قومية أو شوفينية , بل صدقيني بأن السبب الرئيس هو طبيعة تواجدهم في البلد المضيف نفسه , أي الأمر هو خلافات وأحقاد اقتصادية دفينة تتعلق بفرص العمل والصراع القائم لاقتناص تلك الفرص والأفضليات التي تقدم لطرف دون آخر , فتظهر تلك اللحمة المزيفة كنوع من التعويض النفسي لا أكثر من ذلك ...

وأمور كثيرة جدا ربما تأتي تباعا ...
الفارس
03-07-2007, 11:04
انظري للسوري في بلده قبل أن تنظري إليه خارجها , كيف يعامل الشارع , كيف يرمي كل القذارة بعنف وحقد و كأن الأمر لا يعدو كونه ثأر بين المواطن والشارع , انظري إليه كيف يستعمل المنبه بجنون وانحطاط بل وانعدام أخلاقي ضد الناس والمارة , انظري إليه حين يتعامل مع المشاة وهو قابع داخل سيارته الجربانة كيف لا يعطي لهم طريقا للمرور مع أن العرف العام المروري يقدم البشر على الآليات , كل دول العام تعطي الأفضلية للإنسان إلا المواطن الجميل البريء داخل حلمه الحديدي الذي ينتشي سعادة داخله يحاول أن يدهس ويمعس ويفعس أي مواطن يحاول عبور الشارع , أو يتجرأ ويفكر في أن يحوز الأفضلية قبل السيارة العظيمة , انظري للمواطن الموظف كيف يتعامل مع مواطنه صاحب المصلحة بالرشى والمحسوبيات واللصوصية , انظري إلى التلوث الذي يسببه أصحاب المصانع ليضخوا السموم كل أشكال السموم في السواقي والأنهار , انظري كيف خربوا بردى وقويق وغيرهما , انظري للتعاملات المالية بين ا لناس , والشعار السائد , ما حك جلدك مثل ظفرك , وفخار يكسر بعضه , انظري لتعامل السفارات السورية مع مواطنيها بكل ( المحبة واللهفة والشوق والعشق والهيام والغرام والانتقام ) ..!! الخ






يا سيد ابو ناجي ليس هذا هو الجواب. بكل تاكيد كلامك سليم عن يلي قلته عن الوضع في
سوريا بس مو هاد هو السبب يلي بيخلي المغترب ما يتعاطف مع المغترب لانو الوضع بمصر ولبنان يا ماحلى سوريا قدامو
Abu-Firas
03-07-2007, 11:35
كل العرب متل بعضن

كله بيلعب على كله

يلي عم يدور على مين يساعده يروح لعند امه
لانه ماعاد حدا عم يوقف جنب حدا

ولا حدا يحاول يقنعني لانو صارلي بالغربة 7 سنين

لا سوري لا مصري لا اردني لا سنغالي

كله بده مصلحة ....... ماحدا بيحب حدا من باب الوطنية

اساسا الوطنية اسم معمل طحينه هون بدبي

حدا بده ابعتله قطرميز !!!!!!!!!!!!

:reaper:
الدمشقي
03-07-2007, 11:48
هلأ انا للصراحة ما تغربت بحياتي ..
بس اذا ممكن نسمي رحلتي السابقة للبنان - غربة -
فأنا بقدر أكد كلامك من خلال هالاربع سنين اللي عشتهن هنيك ..
ولكن : لماذا اللبنانيون يحبون بعضهم ببلاد الغربة وكذلك المصريون تأكدي أنو المصريين الموجودين بلبنان - آنذاك - ابان وجودي - كان شغلهن الشاغل .. يكموا بعض ..
وكذلك السوريين الامامير ..
ومن خلال حدودي الغربتلية المحدودة .. وآفاقي السفرية الضيقة ..
بقدر قلك انو كل العرب في الغربة .. اللهم أسألك نفسي ..
بعدين قال يعني هنن كتير متعاضدين ومتحدين في بلادهن .. لحتى يتحدوا بالغربة ..
مابعرف .. برجع بذكر إني مو خبير كفاية بعالم الاغتراب ..
يعني من السهل الطعن في تعليقي ..
Sugar
03-07-2007, 11:58
بسمة سؤالك حلو و انا سمعت هل الشى من قبل ...

بما انى عايشة فى مصر و نسبة الجالية السورية بمصر كبيرة الا انو عمرى ما حسيت بهيك شى .... يمكن لنو حدود اختلاطى بالسورين كان ضمن الاسرة .... يعنى معظم رفقاتى من المصرين او دول عربية اخرى ...

بس بيرجع السبب انو كل واحد اكل هم حالو و فقدنا معنى الوطنية .... غير انو الظروف الاقتصادية بتاثر سلبا على الغير ..... كمان ما بقا فى ضمير عند بعض الناس .... بتساعدى الواحد و بعدين ما بيتعرف عليكى ... و على هاد و متلو ...

شكرا الك
shamba
03-07-2007, 13:36
عفوا منكم جميعا
يعني أنا إلي سنة عايش بمصر
و شفت شي كتير حلو من السوريين اللي هون
يعني أنا بعرف حوالي 20 سوري هون
و نصهم تقريبا تعرفت عليهن بمصر
وكلنا منساعد بعض
و بنجتمع مع بعض دائما
وعاملين جو كتير حلو
وعايشين كأخوة حقيقيين

وبالنسبة للأخ أبو ناجي
مع احترامي الك
بس كلامك غير منطقي أبدا برأيي
يعني أنا خلال هالفترة القصيرة اللي عشتا بمصر
أدركت أديش الانسان السوري راقي ومتحضر
وأديش نحنا بسوريا عايشين بنعمة مو حاسين فيا

يعني بالنهاية جوابي على السؤال باختصار :
الحمد لله لأنني سوري
فهدا شرف كبير بفتخر في
نجلاء
03-07-2007, 14:00
حلو سؤالك يااااا سمايلست....

بسومة كل فئة بتعتقد انو الفئة التانية احسن منها...و كل واحد بيفكر انو التاني احسن منو مع انو بيكونو أضرب من بعض
خليني قلك قصدي (خليتيني...شكرا) :mrgreen:
هلأ المصريين مالهون ملائكةو الفلسطينيين مالهون ملائكة ولا السوريين ملائكة ولو عاشو بقرية الأناجل:3gal4:(جمع آنجل)
ولا فئة منهون بتعامل أفراد فئتها بأخوة...كل واحد فيهون ربي اسالك نفسي...
بدي منك شغلة انت عيني...خلصت شغلتي...بعرفك انا شي؟؟ شفتك بحياتي انا شي؟

انا ما اعرفوش..ما كلمتوش...ما قبلتوش:reaper:

بس كل مجموعة بتفكر انو المجموعة التانية بيتعاملو مع بعضهون احسن منهون...

هلأ نحنا عم نقول على حالنا هيك...دوري على الأردنية و المصريين و الفلسطينيين عم يقولو على حالهون نفس الشي....

بعدين والله ما رح نيجي نحب بعضنا و نحنا بلغربة و نحنا مبعزئين بعضنا ببلادنا...نحنا هيك اتعودنا و الطبع غلب التطبع
كل واحد اغترب مشان القرش..بقا هو طالع مشانو...فممكن يغتنم اي فرصة لحتى يحصل عليه ولو كان رح يدعس على شخص غيرو...بغض النظر إزا كان من بلدو او غير بلدو...يعني إزا كان من بلدو بيقول لا والله...ابن بلدي ماني مستعد اعملو شي أو آخود فرصتو لو بدو يجيني مال قارون؟؟!!

شكرااااان بسووووم...
سلام:fotieee2:
دعزق
03-07-2007, 15:00
اولا شكرا على الطرح الجيد للموضوع

بس حبيت علق على الموضوع

بما اني انا مغتربة وولدت ببلاد الغربة

تكافلنا نحنا كفلسطينية ما النا لا وطن نرجعلو ولا ارض ولا بيت حتى فغصبن عنا كان لازم

نكون واقفين بجنب بعض



كل واحد اغترب مشان القرش..بقا هو طالع مشانو...فممكن يغتنم اي فرصة لحتى يحصل عليه ولو كان رح يدعس على شخص غيرو...بغض النظر إزا كان من بلدو او غير بلدو...يعني إزا كان من بلدو بيقول لا والله...ابن بلدي ماني مستعد اعملو شي أو آخود فرصتو لو بدو يجيني مال قارون؟؟!!

بس نحنا ما اغتربنا مشان القرش ...... نحنا غصبن عنا فرضت علينا الغربة طوووول عمرنا

نفسي شي مرة حس بالاستقرار ...... انتو الحلو انو في بلد ترجعوولو

في اهل عم يستنوكم متى ترجعو

لك انا الي 7 سنين ما دخلتها بلدي ومرة وحدة بحياتي الي رحتلها

لك ما شي بيقهر .... وما بدك يانا نكون متكااافلين

وانا بحس هون انو كل الجاليات مع بعض متوحدين ومتكافلين....... بضل في نفوسنا شي

اسمو وطنية شي اسمو قومية
Figo113
03-07-2007, 15:06
Smilest سؤالك حلو كتيير ,,

بس صدقيني مالو جواب ,, لانو المصاري عمت على قلوب الكل ,,

انا من سنتين في دبي ماشفت انسان عربي كويس ,,

للاسف بس هي الحقيقة ..

احترامي للجميع ,,

سلام ,,

فيغووو ...
أبو ناجي
03-07-2007, 15:13
عيوني الغالي العزيز شامبا :


أخي الطيب , لما بيلتقى شعب ما مع شعب ما متقارب معه بالحال الاجتماعي والاقتصادي والتاريخي والمصيري , وقتها رح تلاقي مافي فروقات رح تحس فيها او تطفو للسطح , بس لما تجيب هيك فئة مثلا السوريين والمصريين والأردنيين والفلسطينين وتحطهن بمكان مختلف تماما وبيئة اقتصادية واجتماعية مختلفة رح تلاحظ التباين وقتها ..

عيوني الغالي , ممكن تشرحلي يا عمري وين التحضر والرقي برمي الزبايل بالشوارع والمخلفات ؟ ممكن تقلي وين التحضر والرقي يلي انت حاسس فيه بانحدار الأخلاق الإنسانية على أضيق نطاق وهو نطاق المرور ؟ وين التحضر والأخلاق والرقي لما بتلاقي الزمامير عم تدمر البيئة السمعية لأتفه الأسباب ؟ وين التحضر لما بتحس السائقين رح يفعسو أي حدا بيحاول يقطع الشارع قبلهن والشاطر يللي بيمعس أي واحد بتسوله نفسه يقطع الشارع قبل السيارة الجربانة وصاحبها الجربان الجاهل المتخلف ؟ وين التصرف الحضاري لما بتروح للجامع الأموي وبتلاقي الفسحة يللي أمام الباب الرئيسي حيطانها مصخمة وريحة النتانة عند المي والقرف معبي المكان ؟ هيك مكان تاريخي حضاري شوفه كيف بيعاملوه ببلاد عندهن ابسط من هيك معلم عالمي حضاري ..وين التحضر والتقدم والرقي يللي انت شفته بتعامل الموظف بالرشاوي و الفساد والإفساد ؟ وين التحضر والرقي بطق البراغي والبسامير والبواجي والكواجي ؟ وين التحضر والرقي بمنظر النظام والدور الحلو الجميل عند أي شباك لشي معاملة والهجمات الكاسحة على الفانات والمكاري , وين التحضر بالأنانية وكل واحد بيمعس التاني وبيركب ظهره لحتى يضل هوه يللي فوق ؟

سلملي على التحضر والرقي ياعمري ...

مع المحبة ..
Figo113
03-07-2007, 15:18
الله محيييك يا ابو ناجي يا كبيييير ,,,


تحياتي الك ,,,

سلام ..

فيغووو ...
Laylac
03-07-2007, 16:40
اي فعلا لا في لا محبة ولا هم يحزنون

وكل واحد عايش لحالوا

اي الاخ ما عم يسأل عن اخو بالغربة بقى شخص من بلادو

لا سوري ولا مصري و لالبناني ولا حتى هندي ...

كل واحد اللهم اني اسألك نفسي ... والباب اللي بيجي منو البرد قصدي الريح سدو واستريح

هاد اللي عم يصير هون في الامارات وهاد اللي شفتوا

سلام
Ayman syr
03-07-2007, 16:43
في مثل عامي شائع : (( ما بيخوزقك ..إلا ابن بلدك )) ..

هل يبدو في هذا الجواب الشافي ، لسؤال ..لا أصل له مع تقديري لسائلته .