أي ما بيأثر

[العـGـيد]

مرحبا يا جماعة

(أي ما بيأثر...) هالكلمتين يلي هنن عنوان موضوعي ,صارو يشكلو عندي مشكلة ,يعني كل ما حدا قلي ما بيأثر ... بيأمطني قلبي ,وبقول أكيد معناتها في شي مصيبة صارت ,والدليل على كلامي هالكام فصل يلي صارو معي و مع أشخاص قريبين مني بالفترة الماضية :


أول فصل (هاد تازا .... مبارح)

في عنا مادة بالجامعة اسمها "تحليل 2" مادة من السنة الأولى ,وسلهة المادة والناس بتقول انو هي مادة معدل (وهية فعلاً سهلة وما بدها شي),إلا أنا ..... قدمت أول مرة وتاني مرة ووو ..... لحد هي الدورة (ويلي كانت الدورة رقم 5) ,وكل مرة قدّم فيها المادة ,ارسب على نفس العلامة 36 .... وياما وياما طلعت على الامتحانات و ياما قدمت اعتراضات (يعي مو معقول كل مرة تكون العلامة 36 كل مرة) ورحت شفت دكتورة المادة ..... ولا حياة لمن تنادي .
نزلت مبارح علامة هالمادة ,وكمان 36 ,قام انا عقلي ما بقا استوعب شي ,دغري ركد لعند عميد الكلية و حكيتلو ,ورح آكلو من كتر ماني معصب...... قلي عود شوي ,را ح مدري لوين واجا ,وبعد ماشاف الموضوع وهون كانت الصدمة ,طلعت مرفّع المادة من أول دورة (صحي على 58 ,بس أحسن ما قدمها 5 مرات) ,وبسبب اهمال الموظفين,وعدم احترام الطالب ,خلوني عيدها 4 مرات (الله لا يوفقهون),ولما رحت لعند الموظفة يلي كانت كل مرة تلتأم فيني لأنو عم قدّم الطلب ,وقلتلها شو صار وأنو علامة بدون يحسبولي أول علامة و لا غيرها ....... قالتلي أي ما بيأثر !!!!!!! (وانبحتلكون هديك البتحة عليها )


تاني فصل :

صهري اشترى بيت جديد ,وعم يكسي البيت وكلو من أحسنو ...... جزء من البيت عاملو على شكل غرفة ببيت شامي قديم ,و الرخامة يلي بتغطي الأرضية بالكامل موصي عليها من ايطاليا ودافع حقها ما فتح ورزق ,طبعاً بعد ما تركبت ,صار دور الدهان ,والله هالزلمة غطى الأرضية بكرتون (هاد كرتون العزل) تحسباً مشان ما تتوسخ الأرض بالدهان... بعد ما خلصو ,ولما قامو الكرتون ,بيتفاجأ انو هالرخامة عليها بقعة صفرا بقطر حوالي 40 سم ....... والنهفة انو ما بتروح ,وبنص ارخامة وطالع منظرها متل العين المقلوعة ..... ولما واجه الدهّان وحملو المسؤولية ,ما اقتنع الدهّان وقال ما دخلو ,بعدين بيقلو لصهري ..... أي والله ما بيأثر!!!!!!!


تالت فصل :

بيتنا بالشام طابق ارضي و فيو جنينة كبيرة ,وكتير أوقات بنكون بالجنينة قاعدين ..... مرة جيراننا المحترمين ,بيزتو صحن سجاير ازاز (زجاج)من البناية يلي مواجهنا ,ومن الطابق الخامس على الجنينة..... وكانت بنت اختي الصغيرة (عمرها 3 سنين) لحالها برا ,والله ستر وما اجى عليها (وخصوصي انو الأرضية بلاط مو تراب ... يعني مجال الشظايا كبير).....رحنا عم نفهمهون انو شو هالفصل الناقص ,وانو لولا ستر الله كانت راحت البنت ..... بيجي جارنا بيقلو لأبي .... لك ما بيأثر ,طوّل بالك ما صار شي !!!!!
وغيرو و غيراتو ....... أصلاً هاد يلي متزكرو هلأ .....
لك بس حسبل نعمل على هالعالم ......
ولا حدا يألي ما بيأثر ,بدبحوا ها

قد يتبع ,,,,

[THE DARK LORD]

ولا حدا يألي ما بيأثر ,بدبحوا ها

اي مابيأثر ابو الخل مابيأثر :cheesy::cheesy::cheesy::cheesy:

عادي وحياتك كلو عادي بشرفي عااااااااااااا مابدي احكي مابدي خلص ... الله يكون بعونك ابو الخل .... سولامززز

[lady]

مابيأثر لك خلوووو

حسبل نعمل .....

[ليال66]

كل هاد وما بيأثر ... كيف لو كان بيأثر :cheesy:

شو كان صار ؟:reaper:

[فرحة العمر]

,طلعت مرفّع المادة من أول دورة (صحي على 58 ,بس أحسن ما قدمها 5 مرات) ,وبسبب اهمال الموظفين,قد يتبع ,,,,

الله يعينك ابو الخل عنجد أهمال فظيع من الموظفين الله يسامحهم على هالفصل الناقص الي عملوا و بعيد الشر يتبع شو عم تفول على حالك الي بيفكر بالبعبع بيطلعلوا

[Ayman syr]

ابو الخل المقيم بين الكتب و الدفاتر .. هه نور المنتدى ..زمان هالقمر ما بان .

زعلتني كتير على قصة مادة التحليل 2 .. بتعرف لو كنت بأمريكا انت ..كنت رفعت دعوى أخدتلك تعويض تعب نفسي و فكري شي كم مليون طلعت من الجامعة مخسكر ..

بس اوعى تفكر تعمل هون هيك .لأنو هون الواحد بأحسن الأحوال بياخد جزرة

لكن عنجد خيو أنا باقترح عليك اقتراح ..روح على شي جريدة رسمية ..و اطلب أن الموضوع ينعملو ضجة إعلامية ..و ينضاف إلى العار المتعلق بالإهمال و اللامبالاة لدى الموظفين .

و خبرنا إذا يتبع ولا لأ .. اسمك لساتك بجو المعمعة .

[الدمشقي]

إي Not Affect .. شناتفة ابو الخل ..[smilie=gelato.gif]

[Deena]

لكن عنجد خيو أنا باقترح عليك اقتراح ..روح على شي جريدة رسمية ..و اطلب أن الموضوع ينعملو ضجة إعلامية ..و ينضاف إلى العار المتعلق بالإهمال و اللامبالاة لدى الموظفين .




ليش يعني إذا عمل هيك أبو الخل ، بيأثر شي :reaper:

أنا بقترح عليك أبو الخل و كونه الحالة عند شعبنا متجذرة بالأعراف تبعه ، أنك تروح لعند هدول المختصين بالطب العربي يوصفولك شي شربة شي عشبة تاخدها بحيث تساوي عندك مناعة من جملة ( إيه ما بيأثر ) :cheesy:

لأنو كمان يا أبو الخل مو معقول و مو عدل يعني نغير جزء من إرث الشعب و تقاليده و بروتوكول حياته مشان و الله أنت بتصيبك حساسية من هالجملة :angry20girl:
أنت ولاّ 18 مليون بني آدم :3ageeb:

[mr.mask]

أيمن بيك خيو انت هيك لح تودي خالد لمتاهة الها اول و ما الها اخر .... يعني ممكن تخليله كل مواده نفس الحالة بعد ما ينفذ اقتراحك ... بس قولتك ما بيأثر أبو الخل قدها و قدود ....

والله يا أبو الخل انا قبل ما قدم المواد كل ما انزل ع الكلية فوت ع الديوان و شؤون الطلاب و اطلب كشف علامات ...
طبعاً ما بطلبه من المسؤول لانه بده معاملة يومين و بده مليون قصة و قصة لحتى يطلع بس انا بعرف كم انسة من هون و كم انسة من هون هنن المسؤولين عن هالمواضيع و الله كل مرة اتغالظ على وحدة و قلها تجبلي المواد يلي حاملها بالسنتين و قديش العلامات منشان ما يصير فيني هيك لانو عندي صاحب علق بمشكلة الها اول و ما الها اخر ..... بس منشان كلمة ما بيأثر استنى المرسوم شو عليه :mrgreen: يعني تصوروا استنى المرسوم ما بيأثر مو انو والله استنى سنة او قدم المادة أكتر من مرة ......


و هي قصة الما بيأثر شو ساوت فيني السنة الماضية :

انا يا جماعة السنة الماضية متلي كان عندي بالفصل التاني 9 مواد يعني مو بس صعبين صعبين كتير خصوصاً انو ما عندنا أي كتاب او مرجع ممكن انو يشمل المنهاج يعني لازم يكون الزلمة حاضر حضور كامل مو مضوع ولا ثانية و بيحق للمهندس او الدكتور انو يجيب الاسئلة من وين ما بده و بالطريقة يلي بده ياها و نحنا لازم ما نعترض ابداً ....

اجا الفحص و قدمت المواد و خلصت و مر عليي كتييير فوتات بالحيط بهالفحص .
خلص الفحص و انا عم قول الحمد لله انشا الله المواد ال 6 بيطلعوا و بخلص منهم و بيبقى 3 بنقرشهم ع التكميلية مو لشي و الله بس لانو ما عاد يسمحولي بفصل كمان ضمن المعهد يعني نزل قرار جديد بنفس السنة يلي كنت فيها انا انو ما بينسمح انو يداوم سنة وحدة اكتر من خمس فصول ..

والله وقت النتائج نزلت و آخد اجازة من شغلي انو انا شغلة نص ساعة بس جيب النتيجة و ارجع .... و إذ هنيك انصدمت بمادة متل مادة أبو الخل بس هي من اول فصل الي بالجامعة يعني كانت هي المرة المرة السادسة بقدمها فيها .. و كل مرة علامتي بالفحص قد ما كتبت مدري ليش ما بتزيد ... يعني صحي ما بكون دارسها بس بعرف شو عم اكتب و بتضل نفس العلامة ... يعني هيك صاروا اربع مواد ...

والله طلع الدم لراسي انا يلي كنت حاطط ببالي انو خلص انا بعد شهرين بتخرج و بخلص من هالهم خصوصاً انو ما عاد عندي جيش يعني ما عاد يهمني انو ابقى متل ما كنت مخطط و متل الطلاب العاديين .

وقف قدامي رفيقي قال شو ليش هيك زعلان يا زلمة شبك .. قلتله والله القصة هيك هيك هيك .
قال ورجيني لشوف اي يا زلمة شو عم تحكي انت انت بتطلع ع التكميلية .. قلتله شو هالحكي قال اي والله
قلتله ليش ؟ قلي انت عندك علامة 54 يعني بتحتاج ل 6 علامات بتغيرلك وضعك لتكميلية فبيساعدوك فيهم مرة وحدة خلال دراستك الجامعية و العلامات يلي بيساعدوك فيها هنن 8 فهلق انت عندك ست علامات فروح لعندهم و لا يهمك

انا هون فرحت كتير والله و هم و نزل عن قلبي ..
رحت بدي شوفهم ما لقيت موظفين جوا فقلت لحالي بكرا بدي اجي منشانهم ..
رجعت تاني يوم سألت المسؤولة فأكدت كلام الطالب .. قلتلها شو يعني انا ايمت فيني انزل ادفع الرسوم الخاصة بالتكميلية و سجل و اعرف شو البرنامج ..
قال تعا بعد شهر

انا رجعت بعد 15 يوم والله خفت اتأخر و يقلولي راحت عليك ... قلتلها انو انا هيك هيك هيك قصتي .... فطلعت فيي و ابتسمت و قالتلي الصراحة ما بدي كذب عليك بس هادا القرار تم الغاؤه من يومين يعني انت هلق راحت معك للسنة الجاي ...

انا هون ما عاد عرفت احكي ما احكي ما احكي احكي قلت يا ولد سكوت و امشي احسن الشي .. فقالتلي بس فيك انت تنزل بعد عشر ايام لانو القرار عليه اعتراض كبير من كتير طلاب و اداريين ..

رجعت بعد عشر ايام والله قلتلها شو صار ...
قالتلي تراجعوا عن القرار و تعال بعد عشر ايام ادفاع الرسوم .... قلتلها خيييي ماشي راجع

رحت بعد عشر ايام يعني قبل فحص التكميلية بشي خمس ايام ....
فتت لعندهم فقالتلي هات اسمك ...... دورت بكل الصفحات يلي عندها قالتلي اسمك انت مو موجود ...
قلتلها يا بنت الحلال طلعي منيح هاتي لأقرا الورقة انا .. اخدت الورقة والله اسمي مو موجود .... ينعن عالم
نزلت لعند المسؤولة قلتلها هيك القصة قال انت شو علاماتك و شو المواد يلي حاملها ..... قلتلها ... فابتسمت و قالتلي بس نزل قرار من يومين والله و تأكد موضوع عدم المساعدة ...
يييييييييييي هون كان معي ابو الخل و بيعرف شو صار

و طلعت بعدها و رحت ع الشغل و بقي وشي والله ما عم يتفسر تلات ايام ...
يوم الفحص والله كان يوم الاثنين انا نايم الساعة شي عشرة و نص الصبح رن الموبايل تبع أخي ....
رد اخي قاله انت اخوك عنده المواد الفلانية و اليوم عنده فحص ما قله اخي ما بعرف بس ماهر نايم

(ملاحظة ما تفكروا انو تطور معهم رقم موبايلي او موبايل اخي بس الفكرة انو ما معهم الرقم فسألوا عني و بين الطلاب فكان موجود رفيق اخي و عطاهم رقمه ليصلولي هههههههه )

قله فيقلي ياه لاحكي معه ... قمت انا قلتله خير انشا الله .... قال اليوم والله يا ابني اجا القرار عن طريق الهاتف انو نسمحلكم انو تدخلوا تقدموا فحص ..... ففوراً قوم و تعال قدم فحص ...

قلتله بالله جد عم تحكي قال اي قوم ...
قلتله يا استاذ مالي دارس شي انا بس .. قال اي ما بيأثر قدمها شلون ما كان بلكي الله نجحك .... انا هون طلع الدم لراسي ...
نزلت والله و كل واحد احكي معه يقلي اي طيب شو بدنا نعمل طيب مو انت بدك تقدم بعد شهرين اجلها شوي و الله ما بيأثر كلها سنة و ماكانت ...

يمكن يومها فعلاً ما بعرف شو طلع على لساني حكي ضمن كل مكتب بفوته ....
و بالأخير شو بيقولولي بس على فكرة القرار كان عن طريق الهاتف يعني اذا ما بعتوا فاكس خلال الشهر هاد ما بتنقبل فحوصاتكم ........ عااااااااااااااااااااااااااااااااااااااااا

فأنا ما قدمت الفحص و نزلت بعد شي شهر فلقيتهم مأكدين انو المادة خلصت و ترفعت ....


و لسا يا ما في قصص ما بيأثر كتييييييييييير كتيييييييير بلكي انشا الله شي يوم ممكن انو نحكي فيها هههه


ينعن علم شو سمعنا كلمة ما بيأثر وقت كسينا البيت ههههههههههههههه ينعن عالم كلمة ما بيأثر بتشيب الراس في شغلات كانت مشوهة بس ما بيأثر .....


و الله يا أبو الخل مبين عليك معاني كتير بهالفترة يلي ما عاد شفتك فيها ...... قوم امشي نروح مشوار و الفحص ما بيأثر ...... روووو


يمكن كتييير طويلة و معته القصة ما هههههه بس انا عم اكتب قلت لحالي لتجي مباراة البرازيل .. يالله انا رايح شوف المباراة و نلتقي غداً .


سلام ..

MR.MASK

[Abu-Firas]

أنا مع دينا لانه "مابيأثر" هي عنوان لفلسفه شعب بأكمله و هاد شي منو كتير
يعني دايما الموضوع عادي ومابيأثر

ليش جاية متأخر على موعدك ساعة كامله ............."مابيأثر"
ليش ماعم تقطع الشارع من عند ممر المشاة............."مابيأثر"
ليش ماعم ترمي الزبالة بالحاوية مو جنبها............."مابيأثر"
ليش ماعم تحط حزام الامان بالسيارة............."مابيأثر"
ليش ماعم توقف بالدور وعم تطحش على غيرك............."مابيأثر"
ليش ليش ليش ليش ليش .............. وطبعا الجواب ............."مابيأثر"

بقا كيف بدك تمحي فلسفة بنا عليها الناس اسلوب حياة !!!!!!!!!!!!!

خلص خيو فرطها يعني كله مشان رخام ايطالي ؟ يعني يلي معه يجيب رخام من ايطاليا بيقدر يجيب غيرهم يعني فعلا ............."مابيأثر"

ويلي رمى صحن السجاير كان منتبه انه ما تصيب حدا يعني معقول يكون قاصد يأذي حدا
اكيد الموضوع مدروس مشان هيك............."مابيأثر"

بعدين واذا نسي الموظف مادة من المواد !!! شو ماعنده شغله غيرك ولا الموظف هاد مو بني أدم ما بيحقله ينسى يالطيف قلبك شو قاسي انت خلص خيو ............."مابيأثر"

:blehhh:

بس الملاحظة المهمة لا يوجد في القاموس السوري شي اسمه "مابيأثر" لانه نحنا ما عنا ثاء
يعني الموجود هو " ما بيأسر " بالسين مو بالثاء !!!!!

وعلى العموم بالسين أو بالثاء ما بتفرق يعني ............."مابيأثر"

:iskot:

[Star]

هههههههههههه عن جد شي بضحك و ببكي بنفس الوقت...
يعني لايمت بدنا نضل نتحمل هالكلمة "ما بيأثر"... طبعا الي عم يقولها ما رح يحس فيها و لا رح تزعجو لأنو هو عم يقولها تبريراً لموقفو... مثلاً تالت فصل من موضوع أبو الخل... لو كان هالصحن جاي عالبنت الصغيرة بعيد الشر و صايرلها شي، كان قدر هالجار المزوء يقول ما بيأثر!!!! بس نحن منستنى المصيبة لحتى تصير حتى نحس شوي، أما إذا غلطنا و ما صار شي من ورا هالغلط... ايه رح نقول "ما بيأثر" لأنو فعلاً ما عم يأثر!!!!!:reaper:

لسى شغلة الجامعة و المواد... ولييييي شقد بتطالع الروح... عن جد الله يعينكون أبو الخل و ماسك على هالفصول الي صارت معكون... و الي بيزعج أكتر شي أنو المسؤولين بشؤون الطلاب بضلوا بيتجأوروا بالطالب اذا بدو يسألون شي أو يستفسر عن موادو... و بجاوبوا و كأنو رح يطقلون عرق، و بالأخير إذا غلطوا بيبتسمو و بقلولك ما بيأثر:sleepyy:... ايه مزبوط ما بيأثر بس ارتفع ضغط الطالب شوي و صار معو كم جلطة:fever: و يمكن بعد شوي يروح فيها[smilie=barella.gif]... و دخيلكون يروح فيها في غيروا طلاب كتير... يعني ما بيأثر!!!!:egg:

ينعن ما بيأثر بقا [smilie=banghead.gi:

[smilest]

بيقول المتل طعمي التم بتستحي العين

فيا خل يا عيني .. يا ابني .. يا ماي صن

روح ابعات للاستاذ شي تنكة سمنة عربي وخلي ينجحك أنت وماسك ولك حاج ..صحي ما بتفهموا القصة

وروح يا خل عطي هالجار شي أكلة من تحت ديات الماما وخليه لايكب زبايله عليكم

يعني حركلي حالك شوي .. بهرها .. فلفلها بشي كم قرص فلافل
ولا تتأثر ولا على بالك .. صحتك بالدنيا

[princeoflaw]

يا خل يا حبيبي
تخيل انك تراجع موظف لاجل ورقة او بيان وبيقلك روح نصف ساعة او ساعة ورجاع لعندي وقت الي بتقوله يا أ خي عند مواعيد مواعد اشخاص في عندي دعاوي لازم احضرها بيقولك ما بياثر وخصوصا اذا كان يوم خميس وياتي وراءه يومين عطلة
تخيل انك تراجع اذن انتبه اذن مو رئيس دائرة او مدير عام وما بيرضى يفوت او ينقل المعاملة او البيان من غرفة الى غرفة وخصوصا اذا كان اخر الدوام وكان يوم خميس وهذه الاوراق مرتبطة بمواعيد واجال قانونية محددة فتخيل يا رعاك الله
على كل حال الله يكون بالعون
لي مقالة باحدى المواقع تطرقت فيها الى عدة مواضيع ويمكن تزبط هذه المواضيع على كلمة مابياثر :
تتحدث للسائق لاترمي السيكارة من الشباك /بيقولك ما بياثر
لاترمي كوب الشاي او كوب القهوة من النافذة بيقولك ما بياثر
لبتقول لصاحب المحل لماذا تضع كل هذه البضائع على الرصيف ولا تضعها بالداخل لكي لاتمنع المارة من المشي على الرصيف وخصوصا اذا كانت امراة تعبر ومعها طفل بالعربة بيقولك مابياثر
بتقول لواحد لاترمي اكياس الاوساخ من البلكون بيقول ما بياثر
-
-
-
-
-
-






ملاحظة لابو فراس :
ابو فراس بتوقع انو اذا اتت كلمة بحرف السين تكون مشتقة من الاسر والاسير
اما حرف ث فهو موجود وهذا راي ما بعرف على كل حال هناك اخصائيين

[yoos]

هههههههههههههههههههههههههههههه :cheesy::cheesy::cheesy::cheesy:
عدتهم خمس مرات ابو الخل
يا حرام و كل مرة عم تدريس و تاخد نفس العلامة شو هالعبقرية كيف صمدت على نفس العلامة :3ageeb: خمس مرات
جد جد
يعني في كلمات للعرب الجرب اللي من هالنوعية بعللو القب
كلمة ان شاء الله خير ........... معناها ان مش شاغل الزلمة شي و بزحلقني يعني بقللي قحطي
كلمة كللو عادي .......... يعني لو عملت و ما عملت كللو واحد و برده بعللني و ان ما عمل شي .
كلمة تمام تمام ....... تعبيرا ان كل ياللي عملتو ما انتبهلو اخينا
كلمة مش مشكلة ..............................
و غيره القاموس مليان
يعطيك العافية ابو الخل

[Deena]

جد جد
يعني في كلمات للعرب الجرب اللي من هالنوعية بعللو القب
كلمة ان شاء الله خير ........... معناها ان مش شاغل الزلمة شي و بزحلقني يعني بقللي قحطي
كلمة كللو عادي .......... يعني لو عملت و ما عملت كللو واحد و برده بعللني و ان ما عمل شي .
كلمة تمام تمام ....... تعبيرا ان كل ياللي عملتو ما انتبهلو اخينا
كلمة مش مشكلة ..............................
و غيره القاموس مليان
يعطيك العافية ابو الخل

ههههههههههههههههههه إي يوس معك حق...

رح زيد للقاموس كلمة أنا بستعملها مع ولادي كتييييييييييييييييييييييييير يعني أبو شي 86345 مرة باليوم........

هلأ ابني بيصرعني قد ما بيطلب و على بدي و بدي و ماما ممكن هاي و ماما ممكن هديك...
طبعاً أنا مخلوقة ملتعي فؤادها من كتر النق و السق و الطلبات ، مشان هيك هلأ صرت بشكل تلقائي و بدون ما أعرف شو بدو ابني دغري بجاوبه ( لنشوف )....
طبعاً هو ما بيعرف شو يعني لنشوف بيقوم المسكين بيركض لعند أخته و هو مو عاطي فرحته لحدا و بيحكيلها : دانة دانة ماما قالت إيه:reaper:
طبعاً أخته أكبر منه بالحياة يعني صارلها عم تسمع كلمة لنشوف تسع سنين ، بتقوم بتصلحله و بتحكيله :
ماما ما قالت إيه ، ماما قالت لنشوف ، و لنشوف معناها لأ :cheesy:
البنت كاشفة سري :embaressedd:
بقى ضيفي على الكلام ، لنشوف :fotieee2:

[yoos]

بجاوبه ( لنشوف )....
طبعاً هو ما بيعرف شو يعني لنشوف بيقوم المسكين بيركض لعند أخته و هو مو عاطي فرحته لحدا و بيحكيلها : دانة دانة ماما قالت إيه:reaper:
طبعاً أخته أكبر منه بالحياة يعني صارلها عم تسمع كلمة لنشوف تسع سنين ، بتقوم بتصلحله و بتحكيله :
ماما ما قالت إيه ، ماما قالت لنشوف ، و لنشوف معناها لأ :cheesy:
البنت كاشفة سري :embaressedd:
بقى ضيفي على الكلام ، لنشوف :fotieee2:
هههههههههههههههه بنتك ذكية فهمك من أولها
و أنا ضيف للقاموس كلمة

الله كريم قريبة من كلمة لنشوف

[العـGـيد]

الي بيفكر بالبعبع بيطلعلوا

ما هوو ان شئت او أبيت عم يطلعلي ....

زعلتني كتير على قصة مادة التحليل 2 .. بتعرف لو كنت بأمريكا انت ..كنت رفعت دعوى أخدتلك تعويض تعب نفسي و فكري شي كم مليون طلعت من الجامعة مخسكر ..
بس اوعى تفكر تعمل هون هيك .لأنو هون الواحد بأحسن الأحوال بياخد جزرة

بتعرف شو ,كل ما كنت روح لعند دكتورة المادة ,كانت تقلي مستحيل يكون في خطأ ,انت ما عم تدرس و هي النتيجة (ولأ بالآخير صارت تنزعج كتير اذا بعد المحاضرة جيت لعندها بدي اسألها عن شي)....... يعني فالج لا تعالج ,ومافي نتيجة ,ولأ يمكن بالعكس ......رح تتحطط عليي وما بقا شم ريحة النجاح بالمادة ..عااااااااااااااااااااااااااا

لأنو كمان يا أبو الخل مو معقول و مو عدل يعني نغير جزء من إرث الشعب و تقاليده و بروتوكول حياته مشان و الله أنت بتصيبك حساسية من هالجملة

هههههههه ,ضحكتيني والله ........ لك شو بدي احكي لأحكي ,والله صارت الشغلة مصيبة ,عنجد مصيبة ,يعني مافي شغلة ان كانت بسيطة أو معتة او مهمة أو تافهو إلا ما بينقال ما بيأثر اذا ما صارت ...

يييييييييييي هون كان معي ابو الخل و بيعرف شو صار

ذكرتني ..... الله لا يوفقهن وقتها ,أدي رحنا و جينا وعلى الفاضي ... وكلو كوم و الموظفات يلي تحت ,يعدموني ياهون وحدة ورا التانية .
بتهون ماهر ,بتهون ..... الله يوفقك و يوفقنا يارب
ملاحظة :خلينا نشوفك .

خلص خيو فرطها يعني كله مشان رخام ايطالي ؟ يعني يلي معه يجيب رخام من ايطاليا بيقدر يجيب غيرهم يعني فعلا ............."مابيأثر"
ويلي رمى صحن السجاير كان منتبه انه ما تصيب حدا يعني معقول يكون قاصد يأذي حدا
اكيد الموضوع مدروس مشان هيك............."مابيأثر"
بعدين واذا نسي الموظف مادة من المواد !!! شو ماعنده شغله غيرك ولا الموظف هاد مو بني أدم ما بيحقله ينسى يالطيف قلبك شو قاسي انت خلص خيو ............."مابيأثر"

يا سيدي ,اذا على الرخام الطلياني ..... الزلمة اشترى بدالو رخام تركي ,ودبّر أمورو .
وجارنا المأزي تبع صحونة السجاير ,كف بلاه عنا ..... طلعلنا الجار يلي بالطابق الأرضي ,بيضلو مزهزهين وصوت الأغاني شيت ميتاليكا و من نمط الراب غير شكل ..... وهدول ان شاء الله قريباً رح جبلهون الشرطة اذا ما استحو على دمهون هههه .
أما بالنسبة للموظفة (تأبش عضامي) ,ما بعرف ....والله بالكلية ما بعرف كيف ضبطت أعصابي وما ضربتها على هالفصل ,ولأ الشي يلي جنني بزيادة انو هية ما استوعبت حجم المعاناة يلي عملتلي ياها ... بس اذا بدك تشوف الوجه المشرق ,فيك تعتبر المادة طلعت و خلصت من همها ...
وهاد الشي معناتو ........ فعلاً ما بيأثر ههههههه
على راسي أحلى أبو السوس .

بس نحن منستنى المصيبة لحتى تصير حتى نحس شوي، أما إذا غلطنا و ما صار شي من ورا هالغلط... ايه رح نقول "ما بيأثر" لأنو فعلاً ما عم يأثر!!!!!

والله مزبوط ,لك حتى في ناس ما بيهمها ,ان صارت مصيبة ولا لأ ..... ينعن عالم .

عدتهم خمس مرات ابو الخل
يا حرام و كل مرة عم تدريس و تاخد نفس العلامة شو هالعبقرية كيف صمدت على نفس العلامة

شايفة أدي انا زكي هههههههههه ..... تقولي حاسبها على الربع و النص علامة

و غيره القاموس مليان

ههههههههه ,ذكرتيني بجملة (لنشوف شو الله بييسر) ويلي معناتها انو سلامتك القصة ولا تحاول مرة تانية .

لنشوف

لنشوف !!!! ولي طلعت منتشرة هي كمان ,بس بدون "شو الله بيسر" هههههه
هي غير شكل ....بس يا لطيف شو بتقهر .... الله يعينك يا عمورة هههههههههههههههه ,عم اشعر بمعاناتك (عم امزح)
على راسي الكل ,وعلى ما يبدو انو الكل عم يعاني من هالشغلة ......
حسبل نعمل على هالثقافة الهمشرية وعلى هالعادات و التقاليد المعتة .
سلامي للكل .

[فوضى الحواس]

وجعني قلبي
كمان ما بيأئر

[Laylac]

ذكرتوني بها الجملة

(( ما مشان شي )) لم بسمعا بتذكر الصين شين شان شو

ولي على قلبي شقد بسمعها من العالم :fotieee2:

بس ما بيأثر

[rania]

روح ابعات للاستاذ شي تنكة سمنة عربي وخلي ينجحك أنت وماسك ولك حاج ..صحي ما بتفهموا القصة

وروح يا خل عطي هالجار شي أكلة من تحت ديات الماما وخليه لايكب زبايله عليكم

يعني حركلي حالك شوي .. بهرها .. فلفلها بشي كم قرص فلافل
ولا تتأثر ولا على بالك .. صحتك بالدنيا

والله هاد هو الكلام المزبوط .. أغلب الدكاترة بالجامعة صايرين بدون هيك ليمشوا الطلاب وينجحوون

ومشان ما بيأثر والله يا أبو الخل أنا صار معي بالعكس في مادة كتبولي فيها اني ناجحة بعد سنة اكتشفت اني راسبة فيها وبالصدفة بقا ما بيأثر