الفحص الطبي قبل الزواج [الأرشيف]

مشاهدة النسخة كاملة : الفحص الطبي قبل الزواج

smilest

08-05-2007, 08:57

عانت كثير من الأسر من الزواج دون اجراء فحصاً طبياً وأنجبت أولاداً يحملون أمراضاً أرهقتهم عذاباً جسدياً ونفسياً
كما مرض التلثيميا وهو مرض يصيب الدم
لما هذا العذاب ألا يمكن تفاديه بذهاب المخطوبين قبل عقد القران واجراء فحوص مخبرية !!
أنصحكم قبل الاقدام على الشروع بالزواج باجراء فحصاً طبياً .. علكم تتفادون هذه المشكلة

فما رأيكم ؟؟

Abu-Firas

08-05-2007, 09:10

مابعرف انا بحس انه مو زابطة ابدا اني قول للانسانة يلي بحبها وحابب ارتبط فيها

قومي لنحلل ونشوف اذا بيمشي الحال ولا لاء ....!!

بحس ... مابعرف .... ماعم تركب معي ....... هلق صحيح انه الوضع ممكن يكون مشكله
بعدين .... وكتير شفنا مشاكل من هالنوع ....... بس مابعرف .... انا شايفها تقيلة شوي

هلق يمكن انا متخلف بنظر البعض .... او يمكن كون رجعي او تقليدي ... بس بصراحة

مابتركب معي ..... بنوب بنوب ....

حدا بيقدر يقنعني ؟ ..... مابتصور

smilest

08-05-2007, 09:15

مزبوط كلامك .. مشان هيك أبو فراس بتلاقي وقت الفحص الطبي بيروح العريس بيفقس الموظف
أو بيروح لعند صديقه الطبيب وبيطلب منه تقرير طبي

أنا برأيي خلينا جريئين شوي ومو بس شوي كتير .. لأنه هل الأمر عم يسبب مأساة بالمستقبل .. مو بس الأهل يلي عم يعيشوها كمان الطفل يلي عم يجي على الدنيا غير صحيح البنية

mercurian

08-05-2007, 09:25

هلأ انو يكون الولد غير صحيح البنية هي شغلة مو كتير منقدر نتحكم فيها .... ومرض التلاسيميا بالذات من الامراض الوراثية اللي بدها فحص جيني او رحلان خضاب حتى يظهر المخفي منها ... وغالباً بيكون في قصة عائلية واضحة ....
المشكلة بالامراض المنتقلة بالجنس و أحياناً العجز الجنسي .... هدول شغلتين يعني لازم ينفحصو بشكل دقيق قبل الزواج ....

bigbaby

08-05-2007, 09:29

يا ستي فعلا هي مشكلة حقيقية وخصوصا بزواج الأقارب .. المشكلة انو دائما مفهومنا للوقاية مضحك جدا ... يعني كلو بيقلك لازم تشربي زهورات ااذ حاسة حالك بدك تمرضي وشربي مي اذا كلاويكي عم يجعوكي وخل اذا عندك حرقة (شلون ما بعرف!) بس ما حدا بيقلك انو لازم تعملي فحص ماموغرام للثدي كل سنة بعد الأربعين ولا فحص شامل للكولسيترول كل سنتين ولا حتى منروح عند دكتور الأسنان غير لما بيصير الخراج ما بينيمنا الليل ... وطبعا كل شي منعرفه عن الفيتامينات انها منشطة جنسيا ... بقا من وين بدك نقتنع نروح نعمل فحص ما قبل الزواج؟ لك ايه أنا صاروا يضحكوا علي بس قلت انو ايه لازم نعمله وقال شو، مو حلوة بحقك ... عيييييب ... لذلك زبطوها بالمحكمة شلون ما كان وما شفت خلقتها للوثيقة الطبية ...
وبيقلولك كل شي بيجينا من الله ... طيب انت شو عم تنضرب تساوي يا عبد الله؟

lady

08-05-2007, 09:40

بلكي طلع شي مرض لا سمح الله..ومابدو الناس تعرف...يعني معليش ينعدوا من بعض ومعليش يطلع شي بالاولاد بس عيييييب حدا يعرف
هيك بتروح العروس او بطير العريس...وخلي الزهورات تنفعنا...بيبي البقدونس المسلوق كويس للكلاوي :)

يلي بعرفو انه بالسعودية لازم الفحص قبل الزواج, ليش مابيعملوا نفس الشي عنا..؟

الدمشقي

08-05-2007, 09:52

شي أكييييييييييييييد .. برافو سمايلست .. بنصح كل المخطوبين لايترددوا ولالحظة بالتحليل الشامل .. وخصوصاً تحليل الإيدز .. الله يبعده عن الجميع .. بس هدا المرض قاتل بالجملة يا جماعة .. وبيكفي يصيب واحد لحتى يقضي ع العيلة كلها ..
وللمعلومة مو شرط البني آدم ينصاب بالإيدز بس عن طريق الاتصال الجنسي .. وحتى غير الدم والمعدات الطبية الغير معقمة .. في عدة حالات مرضية بالعالم انتقلت عن طريق التاتو (الوشم) وعن طريق العناق وحتى القبلة البريئة (مشان ماتزعلو ) .. ياجماعة أنا بس بدي أحكي وأنصح لوجه الله .. لاحدا يستهتر بهالتحاليل قبيل الزواج .. وحتى قبل الزواج .. يعني بقصد بحياة العزوبية الطبيعية .. مافي مانع الواحد فينا يطمن على حاله كل فترة وفترة .. وبرجع وبكرر مو بس الاتصال الجنسي المباشر هو اللي بيعدي .. وبقول للي بيستحي أو بيلاقيها تقيلة على حاله أو على حالها .. بقلهن لما بيقع الفاس بالراس (لاسمح الله) .. مابتروح غير عليكم ..
والسلام

bigbaby

08-05-2007, 09:57

طريق العناق وحتى القبلة البريئة (مشان ماتزعلو ) ..

دمشقي ... عفوا وبلا منقودية شلون بينتقل الفيروس عن طريق العناق والقبلة البريئة؟

Star

08-05-2007, 09:59

والله يا ريت كل شخصين رح يتزوجو يروحو يحللو... أضمن الون و للناس الي حواليهم... بس ما بظن حدا يقبل يروح يحلل من شان يثبت لخطيبتو أو مشان تثبت لخطيبها أنو هنن خاليين من الأمراض... طبعا خوفاً من انهاء علاقتون اذا لا سمح الله كانوا بيحملو مرض...
يسلمو سمايلست عالموضوع الهام...

الدمشقي

08-05-2007, 10:07

دمشقي ... عفوا وبلا منقودية شلون بينتقل الفيروس عن طريق العناق والقبلة البريئة؟

عيوني أنا بين إيدي وثائق ودراسات من الـ (undp) التابعة للأمم المتحدة .. وسبب وجود هالوراق بإيدي هو إني بشتغل بمجال الانتاج الفني .. وبالتالي من الشركة المنتجة لمسلسل (حاجز الصمت) وهلأ بالتقارير اللي عطتنهن ياها المنظمة لإدراجها بالنص الجزء التاني .. قريت فيها عدة حالات نادرة للإصابة بالإيدز أو العدوى ..
ومن بيناتهن التاتو والعناق والقبلة وحتى فرشاية السنان والشعر والبشكير .. وإلخ .. من الأدوات الشخصية المتبادلة .. هلأ للأسف أنا مامعي الصلاحية بنشر هيك تقارير لأني مو مخول .. ولأنو التقارير محفوظة بحقوق المنظمة والمسلسل .. بس أنا رح آخد إذن وحاول إني أنشر ولو حالة وحدة من دراسات اليو إن دي بي ..
بس بقدر أشرحلك ياها باختصار : أنو عن طريق القبلة بتتدخل اللثة والسنان اللي قد تكون ملتهبة أو نازفة أو مصابة بالمرض .. والعناق نفس الشي تماماً أي إحتكاك بالأجسام بيولد تبادل جراثيم من خلال الحَب أو الخدوش أو الجروح السطحية .. وبالنهاية أنا مافيني أحكي أكتر من هيك .. وفيكن تعتبروني عم أتفزلك .. وفيكن تعتبروني عم بحكي جد .. القرار إلكن .. أما أنا فقلت اللي بيمايه علي ضميري ..

la solitaire

08-05-2007, 10:53

شكرا على الموضوع بس عن جد الفحص الطبي ضروري و ما فيه اي احراج
واللي يرفض الفحص بيكون أناني وما بيفكر الا بحالو وبس

washiwash

08-05-2007, 11:13

بس ما بظن حدا يقبل يروح يحلل من شان يثبت لخطيبتو أو مشان تثبت لخطيبها أنو هنن خاليين من الأمراض...

كيف يعني بيثبتلها .. او بتثبتلو انو ما فيهن مرض اذا ما عملو فحوصات؟؟ ... ما فهمتها منك إم حسين

على كل حال ... أنو أهم شي الخطيب والخطيبة ما ينزعجو او شي يوقف بوش علاقتهن .. حتى لو كان مرض مميت او ممكن يكون ما في توافق بزمر الدم وبيخلق ولاد مشوهين .. وحتى لو كان احد الطرفين ما بجيب ولاد .. لأنو الحب أكبر من هل القصص بكتير .. شو بدكن بالحكي؟؟؟ ...

بس انو شو .. يجي شي ولد مشوه .. فايت بسبعين حيط .. مع ثقب بالقلب .. وأبرص .. وكساح وترقق عظام ... وبقللو سوري حبيبي .. هاد اللي طلع معنا انا وامك .. ما ردنا نعمل فحوصات كرمال نثبت لبعض انو ما فينا شي [smilie=5.gif]

سلام

أب يمان

08-05-2007, 12:08

موضوع مهم جدااا

الفحص الطبي ضروري جداا بين الخطبين قبل الزواج لما فية مصلحة الطرفين
وأيضا تفاديا كثير من المشكلات متل ما تفضل الاخ ابو خالد انو يجو الاطفال مشوهين

ولكن اكثر الامور خطورة هو زواج الاقارب وهي الظاهرة منتشرة كتيرا بالارياف يعني لسة ما بيولد الصبي بيقولو ها الصبي لبنت عمو فلانة وها البنت لاابن عمها فلان وهلم جرااااا

هلئ ما عميصير لا فحص طبي ولا من يحزنون عم يطلع التقرير الطبي من عند ممرض مو من عند دكتور جاهز بيكون مع مسير المعاملات ومختوم كمان

washiwash

08-05-2007, 12:27

بزمانو الأخ أبو السعود .. الله يذكره بالخير .. أضاف موضوع عن نفس الفكرة .. فأردت أن تطلعو عليه

[Only registered and activated users can see links]

سلام

Abu-Firas

08-05-2007, 13:00

washiwash

08-05-2007, 13:15

ابو فراس .. شو صاير معك ؟؟؟ ... تا لهون .. قعود قدامي .. هون هون .. [smilie=5.gif]

شبنا؟؟ ... حبيبي الفحص ما رح يتطلب منك .. غير انو يفحصولك نسبة الهيموجلوبين في الدم وحجم كريات الدم الحمراء ... صعبة يعني؟؟؟ ..

فحوصات لتجنب الأمراض الوراثية . فحوصات لمعرفة قدرة المقبلين على الزواج على إنجاب الأطفال .فحوصات لمعرفة إن كان أي من الطرفين يحمل أمراضا قابلة للنقل من طرف إلى آخر عن طريق الاتصال الجنسي أو المخالطة اللاصقة.

ما بعرف وين المشكلة .. انته شو النقطة اللي واقف عندها ما بعرف

خالص .. قوم لمحلك جنب اب سن دهب ... يلا

دلوعة و نص

08-05-2007, 14:17

يعني شو نوعه التحليل يلي بدكن ياه

الدمشقي بده تحليل للايدز .... طيب بركي التحليل طلع مافيه شي وبعدين انعدى من فرشاية الاسنان ؟؟ شو بيصير يعني

شو في كمان تحاليل بدكن ياها !!!؟

- القدرة على الانجاب
- سكري
- بلاهة منغوليه
- تلاسيميا
- الايدز

ليش حسستوني انه الواحد عم يقدم على بطاقة صحية مو على وثيقة زواج .....!!!!!؟
[smilie=not.gif] [smilie=not.gif] [smilie=not.gif] [smilie=not.gif]
معكون حق ضرورية بس كمان ما عم تركب معي؟؟؟؟
احسن الشئ كل واحد يعمل تقرير لحاله عن اذا عنده امراض معدية او القدرة على الانجاب والتحاليل الازم
ة يعني مو ضروري يكونوا سوا؟؟؟
الااذا في اختبارات للتوافق؟؟
[smilie=55.gif] [smilie=55.gif] [smilie=55.gif] [smilie=55.gif]
والله لا يبلي حدااااا

Star

08-05-2007, 21:41

كيف يعني بيثبتلها .. او بتثبتلو انو ما فيهن مرض اذا ما عملو فحوصات؟؟ ... ما فهمتها منك إم حسين

شلون يعني ما فهمتها أبكري...
ايه تا لهون لكان...
قصدي أنو ما بظن هلأ الخطيب أو الخطيبة يقبلو يحللو قبل الزواج و يثبتو لبعض أنو هنن ما عندون مرض... يعني هيه شغلة عادية بس ما بعرف ليش سمعت عدة مرات أنو أحد الطرفين ما قبلو يخضعو للتحليل... لأنو إلا ما يكون عندون شوية خوف و قلق أنو يطلع معون شي و ينفصلو عن بعض بسبب هالتحليل الجربان... يعني اذا أجت الخطيبة و طلبت من خطيبها يحلل تحليل عام، رح يوافق!!! في كتير شباب بيرفضوا و بشوفوها مو حلوة بحقون... ليش؟؟ ما بعرف... بس بيرفضو و خلص.... طيب لنفرض أنو طلع عريس الهنا ما بجيب أولاد أو طلع معو شي مرض مميت من ورا بعض التخبيصات الي عملها و هو عزابي و بعد ما عرفت خطيبتو تركتو... ايه من وين ما رح ينفلج رعبة من هالتحليل...
شلون شرحي!!! خرجي أصير آنسة بمدرسة :mrgreen:

washiwash

08-05-2007, 22:13

جيت لهون انا ..

يا ام سكريا .. الموضوع عم نحكي شو المفروض والواجب الواحد يعملو قبل ما يفوت بقصة الجازة .. باا سوري منك اذا كل واحد بدو يشتغل على كيفو .. مشكلتو هي .. ومشكلتو مع مرتو وولادو اللي ممكن يجو معهن هدايا و عاهات ..

لازم نتفق انو الموضوع اجباري وفرض على كل شخص .. بالموضوع اللي حاطو ابو السعود .. ورد ضمن الموضوع حرمانية الزواج الذي يتم دون الفحوصات ..

يعني ممكن أي شخص يتزوج وما يكون عندو علم اذا حامل مرض معين ولكن بإمكانه عمل فحوصات قبل الزواج .. بدون ان يقوم بالفحوصات الكاملة يكون عم يشارك بمشروع جريمة ممكن أن تتم اذا تزوج ..

اييييييييييييه ... انكدنيا

سلام

Ayman syr

09-05-2007, 23:26

شكرا سمايلست على الموضوع الجميل فعلا :

قبل أن أعلق على الموضوع فقط تعليق على ما قاله الدمشقي :
سلامتك من الفذلكة .. بس انت عدت لنفس النقطة أن انتقال مرض الايدز لا يتم إلا عن طريق الدم أو الجنس .
يعني حسب مبدأك أيضا يمكن أن يتم انتقال المرض بالمصافحة ايضا ..إذا كانت يد المريض مخدوشة أو مجروحة ..
وسواء كان الموضوع قبلة او عناق ..لازم يكون في دم بالموضوع ليتم الانتقال ..اما اللعاب والملامسة الجسدية وما إلى ذلك فلا يتم من خلاله انتقال المرض .. و الله اعلم
----------------------------------------------------------------------------------------------
بالنسبة لموضوع الفحوصات الطبية قبل الزواج :

الموضوع يمكن أن يكون حساس قليلا أو كثيرا ..لكن الوعي و الثقافة يلعبان دورا في تقبل هذه الفكره كون الموضوع يتعلق بمستقبل و حياة جيل صحيح يقدم للمجتمع ولا يكون عالة عليه .
وهو امر الإنسان مسؤول عنه أمام الله و المجتمع ..و حتى الإنسانية.
و قيل : احبب من شئت فإنك مفارقه .. و اعمل ما شئت فإنك مجازى به .

yoos

10-05-2007, 00:32

أنا معك سمايل بالنسبة للفحص الطبي قبل الزواج بخصوص هاي الأمراض مثل مرض التلاثيميا الهدف مننه ان ما يكون تنيناتن مصابين بالمرض يعني لو واحد ما مشكلة
و فيه هلق مرض منتشر بمصر و الله يستر ما يتنشر و هوة مرض الكبد الوبائي و هاد مرض خطير اذا كانت متقدمة الحالة رغم ان هلق لاقو حل للحالة ببدايتها المشكلة لما تكون متطورة
و هلق بالنسبة لموضوع ان ممكن يكون احد الطرفين مرضانين او الاتنين فلنفرض ان اكتشفو هيك شغلة بتصير مسؤولية الاختيار هن بيتحملوها يعني اذا بتحبه و بحبها و مو ضروري تكون قصة طويلة عريضة المهم ان يكون مبدا التمسك و الإختيار فهون ببين اذا تمسكو ببعض فبتمسكو ببعض و هن عارفين وضع بعض و اذا سالمين الاتنين فمو غلط الفحص
و عندنا هون بيعملو هاد الفحص قبل الزواج بس مو تنيناتون واحد بس و بما ان نحنا بغزة بالأغل الرجال هههههههههههههههه هوةاللي الضحية و اللي بيعمل الفحص

الدمشقي

10-05-2007, 10:28

تعليق على ما قاله الدمشقي :
سلامتك من الفذلكة .. بس انت عدت لنفس النقطة أن انتقال مرض الايدز لا يتم إلا عن طريق الدم أو الجنس .
يعني حسب مبدأك أيضا يمكن أن يتم انتقال المرض بالمصافحة ايضا ..إذا كانت يد المريض مخدوشة أو مجروحة ..
وسواء كان الموضوع قبلة او عناق ..لازم يكون في دم بالموضوع ليتم الانتقال ..اما اللعاب والملامسة الجسدية وما إلى ذلك فلا يتم من خلاله انتقال المرض .. و الله اعلم

شكراً أيمن .. لأنك نبهتني , أو بالأحرى حرضتني على توضيح وجهة نظري اللي طرحتها وأتوسع فيها أكتر ..
أولاً بالنسبة لما أنا قلت : (القبلة البريئة) .. فأنا حتماً ماكنت بقصد القبلة البريئة إطلاقاً .. إنما أنا حطيت هالجملة بين قوسين : ( مشان ماتزعلو ) .. كنوع من التلميح أو فيك تقول الكناية..
عسى إنه هالفكرة توصل بدون ما أحكي بصراحة يمكن تكون فظة أو قاسية على مسامع أو أعين بعض القراء..
بس على مبدأ لا حياء في الدين أو العلم أو الطب .. وضمن مضمار مهذب قدر الإمكان رح قول :
إني كنت بقصد حتماً القبلة الحميمية والغير بريئة.. واللي هي بتحدث بين الخطيبين أحياناً .. يعني مو شرط بالعلاقات الغير شرعية .. بس ومع ذلك رح أحكي بالعموم بدون تحديد.. من منطلق أنو كل بني آدم خطاء وأنا عم خاطب بحديثي نوع من الخطائين ويا سيدي مافي حدا فينا بالمنتدى خطاء .. بس بركي شي واحد مرعوب من الإيدز وضرب حظه ع الجوجل محرك البحث وقله إيدز .. قام اتفركش بمشاركتي المتفزلكة في هذا الموضوع المحترم والموضوعي ..
.. ربما يمر الواحد بلحظة ضعف ما .. وأكيد أنا مابقصد قول إني ماببوس أمي .. وما بقبل إيد أبي .... وما بعانق جدي .. وما بصافح إبن عمي.. بس كنت عم بحكي بمنطق الحرص والتحسب الشديدن والعاليين المستوى نظراً لعلو مستوى المرض المعدي ..
وبالنسبة لهل مرض فعلاً متل ماقلت يا أيمن لهلأ مافي إثباتات أنو بيعدي باللعاب أو بالإحتكاك الغير جنسي أو الغير دموي خلينا نسميه .. وأنا كمان متلك ماقلت هيك .. بس أنا كنت عم قول إنو مو شرط حدا ينعدى لأنو عاشر حدا جنسياً .. يعني هدا رد على اللي بيقول : إي أنا ماخبصت بحياتي .. لأنه الإحصائيات الأخيرة أغلبها ضحايا مو مذنبين .. يعني مثلاً هدا المرض ممكن يشكل عندك 50 حالة مصابة .. 49 منهم طاهرين وشرفاء وعفيفين .. بينما واحد بس المنحرف واللي تسبب بالعدوى للـ 49..
بمعنى أنو في منهم رجال مابتعرف نسوان غير أمهاتهن ونسوان ماباس تمها غير أمها .. ومع ذلك انعدو .. ليش ؟.. بسبب احتكاكهن بأشخاص مصابين أو معديين ..
قد يكون السبب الحلاق اللي كان دايق خلقه ومو جاي على باله يغير الشفرة , وحتى لو غيرها ليش البشاكير اللي عم تمسح وجوه وأعناق الزبائن كلها ماممكن تحمل الفايروس ؟..ومو كل الحلاقين عندها أجهزة تعقيم كهربائية متطورة للمناشف .. وهي كمان لازم نركز عليها ومانحلق عند حلاقين قديمي الطراز ..
أو قد يكون عند أحد أصحابه لما نام عنده وسهرو للصبح واستعمل أشيائه الخاصة .. أو لما أسعف رفيقه اللي عمل الحادث الفلاني .. أو لما لعب بمخه صاحبه وأقنعه يرسم تاتو عقرب على زندو .. أو لما هالشخص الآدمي المهذب لما بدنا نعتبره انقاد بلحظة ضعف ما لغريزته وقبّل إحدى الفتيات قبلة عنيفة بعض الشيء وهو عم يقول بقلبه : (يللا كل بوسة وماكانت) .. أو إذاكانت بنت قد تكون انعدت من إستعارة أدوات التجميل وخلافها من رفيقتها .. عم نقول مثلاً .. أو قصاصة الأظافر أو ملقط الحواجب أو أو ..
وسبحان الله ياما ناس بتعيش تلات رباع شبابها محافظة ورزينة وبتجي بالربع الأخير بدها تغلط بتقوم بتاكلها من أول غلطة ..

وبالنهاية بعيداً عن كل هالتعقيدات اللي أنا أول واحد رح أرميها عرض الحائط وما أعملها أي حساب ..مشان ما أسأل حالي كل هالأسئلة وقول ياترى أنا مريت بهيك تجربة والا لأ .. رح أسأل سؤال واحد : شو المانع إنه نحلل ؟.. نحلل كل شي ونريح مخيخنا وفؤادنا.. وننام مرتاحين متطمنين على حالنا وعلى مستقبل عيالنا ..
معلش أنا حكيت كتير بس صفي مثال أخير بدي أطرحه :
أخي الكبير الله يخليلكن إخواتكن .. حلل هو ومرته كل التحاليل اللازمة ومن بيناتهن الإيدز .. وطلعوا سليمين هو ومرتو والحمد لله.. والجيل الجديد من عيلتنا كله عم يعمل هيك ..وأنا بس أتأهل ناوي أعمل هيك .. ياترى شو بدهن يقولو العالم عنا ؟ .. عيلة خبيصة ؟؟؟.. أوكي .. يقولوا لينفلقوا .. لأنه هلأ أخي لما بيتأمل بنته اللي عمرها /6شهور/ وهي نايمة متل الملاك.. وضميره وباله مرتاحين حتى العظم .. بتسوى عنده كل كلام الناس بل وبتسوى الناس نفسهن اللي على هالشاكلة ..
وأخيراً بكرر شكري إلك أيمن .. يمكن تكون عم تتمألس أو عم تحكي جد ماني متأكد لما قلتلي :
سلامتك من الفذلكة

بس أنا بغض النظر .. رح رد عليك بكل جدية وطيبة وقلك الله يسلمك .

smilest

10-05-2007, 11:54

aboude666

11-05-2007, 13:43

من وجهة نظري موضوع الفحص قبل الجواز مهم كتير مشان الأم والأب والأطفال وللحفاظ على إستقرار الأسرة ولتجنب حدوث طلاق في المستقبل .
أما عن موضوع انتقال فيروس الإيدز مزبوط أخي الدمشقي الفيروس ممكن ينتقل عن طريق اللعاب أثناء القبلة .
أي سائل من سوائل الجسم المصاب ممكن ينقل الفيروس .
بس في معلومة مهمة هي إنو الفيروس ضعيف جدا في الهواء الخارجي ومابيحسن يعيش وهو معرض للهواء مشان هيك بالنسبة لفرش الأسنان وباقي الأدوات نسبة الإنتقال بتكون ضعيفة .
بس كل شي ممكن . الحذر واجب .
الله يحمينا جميعا ....

yoos

11-05-2007, 13:54

سؤالي الأول أدى إلى سؤال نفسي هذا السؤال

إذا اثنين أحبا بعضهما البعض لدرجة التعلق الكبير واتفقا على الزواج
ثم ذهبا لاستكمال اجراءات الزواج
ووصلا لنقطة فحص كل منهما .. وظهر نتيجة التحليل أن أحد المخطوبين العاشقين هو مصاب بمرض سيؤدي إلى عدم انجاب الأولاد أو انتاج ذرية معاقة.. أو مرض مزمن
فما هو برأيكم رد فعلهما ؟؟
أو ماهو القرار الصحيح الذي يجب أن يتخذاه ؟؟؟
سؤالك كتير مهم يا زعيمة
بالنسبة الى اكيد طبعا ما دامي بكون بحبه و اختياري يبقى مقتنعة فيه بعقلي و قلبي و دارسة شخصيته بكون مزبوط يعني بعتقدج ما ممكن بحياتي راح طب بشخص الا اذا كان بمثل نصف روحي اللي كنت دور عليها طول عمري .
فاذا بهاد الحالة ... فأكيد هوة انا بعرفه بكون كويس و بعرف قديه حبي اله و حبه الي اما بالنسبة للاولاد فهنة بعلم الغيب يعلم الله كيف ممكن يكونو .
لهيك اذا بهاد الظروف اللي ذكرتها اكيد بختار حبيبي مو الاولاد بس بس بتكون تضحية كبيرة و بجوز بستاهل التضحية اذا انوجد هيك شخص :cool: .
اما اذا كان من الحب الصيني متل ما بقول الدمشقي ، و ما بعتقد اني بحب اس شئ صيني يعني مستعدة اشتري اي شئ موجود بالسوق بديل الا الصيني و لو ما لقيت بدبر حالي ببديل اله ... المهم
فرضا جدلا ان من هاد الحب الصيني او زواج تقليدي و ما في مشاعر ناحية الشخص الا عادية فبختار الاطفال اذا الله راد .

smilest

13-05-2007, 09:58

يوس بلاها هي زعيمة أرجوك

بالنسبة للجواب الذي قد جاوبتني عليه مشكورة .. باعتقادك أنك إذا كنت تحبين هذا الشخص والمحبة متبادلة ستتزوجينه رغم أنكم ستنجبان أولاد ذي عاهة
أنا أخالفك الرأي فلو أنا أحبه وهو يحبني إما أن نقرر عدم انجاب أولاد .. أو نفترق ويبقى الحب
الحب تتويجه بأولاد .. يبتسمن لحياتنا ويزيدها زينة وحب

Star

13-05-2007, 10:07

بالنسبة إلي بفضّل أبعد عن هالشخص الي بحبو و لو تعذّبت شوي بفراقو و لا أنو أتعذّب طول عمري كل ما رح أشوف ولادي و هنن معون شي عاهة أو معاقين مثلاً بعيد الشر...

ليمارين

13-05-2007, 10:24

ما في شك الموضوع مهم و على درجة من الخطورة خاصة إذا كان في استعداد وراثي للمرض بس أنا ما بعرف ليش رأي من رأي أبو فراس عم شوفها مو زابطة لأن تصوري عن مرحلة ما فبل الزواج يمكن خيالي شوي بيتنافى مع انو نحط المشاعر على الرف و نروح ورا العقل اللي بحتم علينا اجراء فحوصات طبية يمكن نتائجها تدمر علينا كل الحب اللي حلمنا فيه مشان هيك بتصور انو اللي بيحبو بعض بيجاهلو هالموضوع لأن مجرد التفكير بأنهم يمكن يخسرو بعض رح يكون هو المرض الحقيقي