جـــزاء ســنـمـار ....يا جمــاعـة الخــير

[أبو ناجي]

بزماناتو يا جماعة الخير , كان يا مكان في قديم الزمان لحتى كان , كان ملك الحيرة النعمان بن المنذر عنده ولد مريض , ونصحوه هالدكاترة انو يبني مكان صحي وشرح وبرح وواسع وفسيح وجميل وكربوج وناعم ورائع مشان يسكن فيه هوه وعيلته , فطلب فورا هالنعمان بن المنذر انو يبنوله قصر ماصار متله , وقالو له يا ملك يا نعمان يا رائع , ترا في مهندس كتير فنان وخطير وممتاز من الروم بيقدر يعملك قصر ما صار متله لا قبله ولا بعده , و كان اسم هالمهندس يا جماعة الخير ( سنمار ) . فـ إجـا النعمان وطلب من هالمهندس ( سنمار ) يبني القصر ....وفعلا ...بنالو قصر هائل جميل جدا وبديع ونادر وكربوج وأطئوط وسموه وقتها قصر الـ ( خورنق ) وما كان في متل هالقصر أبدا , بس شو يا حزركون , كان سنمار يبني بهالقصر سنة سنتين , ويترك اربع خمس سنين , حتى سم بدنه للنعمان من كتر ما طول ببنائه , المهم بلا طول سيرة سنمار افندي خلص بناء القصر , فقاله النعمان لسنمار ...تعال نطلع لفوق سطح هالقصر حتى شوف ارتفاعه ومعقول انو فعلا قصر صحي وجميل ورائع وكربوج , وانو هالقصر يطل على المدينة كلياتها , وبقدر شوف الناس من فوق ؟ المهم . طلعوا سوا لفوق ...وسنمار عم يمشي , قاله سنمار للنعمان , اسمع يا ملك يا نعمان , قاله شو يا سنمار يا ....... كذا .. قال ترا بهالقصر يللي انا عمرتـو في حجرة وحدة , ترا اذا شلتها من مكانها بيوقع القصر كله على بعضه , قال النعمان : يا سنمار في حدا بيعرف بمكان هالحجرة غيرك , قاله لا شو يعرف ؟ هاد سر الصنعة , وعلى فكرة مافي حدا بيقدر يبني هيك قصر بهالجمال العجيب غيري انا يا ملك يانعمان يا كربوج يا أطئوط ...ويا جماعة الخير شو صار يا حرزكون كمانه ؟ ....

عينكون ما تشوف هالملك النعمان الا و فجأة دفش سنمار دفشة خطيرة وجميلة ورائعة وأطئوطة وحبوبة , ورفسه رفسة كمان ناعمة و جميلة وغير مطئمشة ولا أطئوطة , وطيره من فوق سطح القصر لتحت على الارض حتى تقطع شقف ومات ...ليش يا حزركون ؟ لانو النعمان مابدو سنمار يصنع قصر شبيه بقصره من بعده ابدا ....وهاد جزاء تعب سنمار ...

وتوتة توتة خلصت الحتوتة ..حلوة ولا فتفوتة ؟؟

[smilie=41.gif]

[bigbaby]

يييييييييييييييييييييييي يا أبو ناجي ...رجعتني شي عشرين سنة لورا ... كانت عندي هي القصة وكنت كتير حبها لأنو فيها صورة بيكون سنمار عم يهر من فوق لتحت وباظين عيونو من الرعبة ... بتذكر اني وقتها ما زعلت عليه ... هو سبحان الذي خلقه كان سئيل وشايف حاله كتير واستفز الملك لما قله انو فيني هد هادا القصر بلحظة ...

بتذكر انو الحكمة يلي بآخر القصة كانت عن الغرور أو شي من هاد ... بس أنا تعلمت منها انو ما ما اطلع مع حدا عالأسطوح :mrgreen:

حلوة القصة أبو ناجي ...حلوة ...

[Volcano]

جميلةٌ هي القصة التي أفدتنا بها سيّد "أبو ناجي" وتحمل حكمةً لا تنطبق على كل الأشخاص وتقول: (اتقِ شرّ من أحسنت إليه).
هذه الحكمة لست من انصار اتّباعها لأنها محرِّضٌ على سوء الظنّ بالنّاس، ولكنّي من أنصار الحذر في التّعامل مع النّاس على ألا يتحوّل ذلك إلى سوء نيّة.

ولله المثل الأعلى في ذلك:
بسم الله الرحمن الرحيم (هل جزاء الإحسان إلا الإحسان)

همسة: حبّذا لو عدت أخي ناجي إلى استعمال اللغة الفصحى كلغةٍ لطرحك الجميل وخصوصاً في المنتديات الأدبيّة ;)
مع خالص الودّ والشكر والاحترام

[Marsho Wolf]

ههههه
حدا بيعمل عملتو
كتير غلبة وقليل حيلة
هذا بدل ما يستخدم هذه الورقة الرابحة لانتهاز الحاكم وابتزازه
:twisted:

[smilest]

الحقيقة يا أبو تاجي كتير عجبتني القصة وقد استخلصت منها عدة مغازي

سنمار كان مغرور ومن حقه أن ينغر فهو الانسان الوحيد الذي استطاع أن يبني شيء خاص وهذه من طبيعة البشرية ولكن إما أن ينغر لدرجة العجرفة أو ينغر ليصل لمرحلة من الاتصال مع الله ويحاول أن يتواضع ويبذل مجهود آخر ليزيد من معارفه وعلومه فهي لا تنتهي عند نقطة معينة

بالمقابل شخصية الملك هي شخصية ذكية وناكرة للجميل

ونحن في حياتنا اليومية نرى كثيراً من هذه المفارقات
فهناك أناس متعجرفون يعلون ويعلون إلا أن يكسرهم الله فما طار طير إلا كما طار وقع
وهناك أناس تتعب بحياتها وتشقى وتكون واضحة للعيان فيأتي شخص آخر يأخذ مجهودها على البارد المستريح يمص دمها إما بكلمة باردة أو برفسة كما تفضل صاحبنا الملك
وهناك أناس اتكاليون يأتون ويلاقوا الأمور جاهزة دون كلل أو تعب فيتمتعون بها

[Engelbert]

ونحن في حياتنا اليومية نرى كثيراً من هذه المفارقات
فهناك أناس متعجرفون يعلون ويعلون إلا أن يكسرهم الله فما طار طير إلا كما طار وقع
وهناك أناس تتعب بحياتها وتشقى وتكون واضحة للعيان فيأتي شخص آخر يأخذ مجهودها على البارد المستريح يمص دمها إما بكلمة باردة أو برفسة كما تفضل صاحبنا الملك
وهناك أناس اتكاليون يأتون ويلاقوا الأمور جاهزة دون كلل أو تعب فيتمتعون بها



برافو يا بسمةالقلوب ...
مغزى جميل جدا و كله فائدة ... و أنا اوافقك الرأي ....
أبو ناجي قصة رائعة و جميلة ...
الله يعطيك العافية ...
سلام ...
Engelbert

[hamous]

ابو ناجي.......انا من عدا شي يادوب بوثق بحدا!!!!فكيف مع هيك قصة!!!!!!!!!!حرامممممم

عنجد اتق شر من احسنت اليه