الدمعة بعيني لأني اشتـقـت لبعض الشغلات بالغربة كالتالي

[أبو ناجي]

* اشتقت ياجماعة الخير بالغربة لانقطاع الكهربـاء الجميلة الرائعة الأطئوطة الأمورة ..

* اشتقت يا جماعة الخير إذا مو لإنقطاع الكهرباء المؤقت ( 18 ساعة أحيانا ) للتقنين الجميل الرائع الكربوج الأمور .

* اشـتـقت لتـقـنـين المي يا جماعة الخير .

* عـيني رح تدمع كل ما اتذكر صوت الزمامير بدون سبب . اشتقت للشوفيرية يللي بيزمروا حتى للجورة بالطريق

* اشتقت لطاقية شرطي السير البيضاء ولصفارته الحنونة

* اشتقت يا جماعة الخير لسوق العتيق والعسـئـلة , اشتـقت للخس المرمي عالاراضي بسوق الزبلطاني او سوق الهال تبع الخضرة , اشتقت لقشر البطيخ , للبندورة المفعسة , وقشور البصل الأخضر الراااااااااااائعة المطـئـمشـة

* اشتقت يا جماعة الخير لمنظر القهاوي والصايعين ومنظر الخريجين الجامعيين عم ينتظروا فرصة عمل حتى لو بـ 8000 ورئـة سـوري , مع تسلط القطاع الخاص , وامتناع القطاع العام عن التوظيف ....والحلم بمعاشاته الهائلة ...!!

* اشـتقت لشفيرية التكاسي وحنـيـتهن وكربجتهن وأطـأطتهن مع الزباين ومزحهن لما بتحاول تترجاهن وتتجرأ وتسألهن اذا هنه رايحين قريب من مشوارك لحتى يقبلوا ياخدوك ...!!

* اشتقت للسرافيس يللي هيه عشقي الازلي والهجمات الكاسحة عليها اول ما بتقرب من الجمهور المستعد للانقضاض برياضة يا قاتل ما مقتول للحصول على كرسي مع بساميرو والعمل بصفة جابي اجباري مشان لم الفرايط ...

* اشتقت لدكاترة الجامعة الحرامية الحلوين يللي ما بيعطوك علامات بالمادة لحتى تدفع المعلوم , او اذا بنت ...لـ ....المعلوم ...مو الكل طبعا ...

* اشتقت يا حلوين لسحابة الصخام فوق الشام لما بتشوفها من قاسيون ..الله الله على شكل البنايات المصخمة واللي قلبت من ابيض لأسود بقدرة اشطمان

* اشتقت لشغلات كتيرة بتمنى تزكروني فيها ...لانو ترا الدمعة هرت ومشي الحال ...

بعدين لشوف كمانه لشو اشتقت ...زكروني ...

[smilie=41.gif]

[bigbaby]

له يا أبو ناجي ... تعا لقلك لو أنا محلك لشو بشتاق...

- اشتقت لسوق الحميدية ...ولسقفه الأسود المثقب يلي بيفوت ضو كأنو نور من السما ...
- اشتقت لبوظة بكداش ... ولمنظر المخطوبين جدد ويلي ما عم يحسوا بطعم البوظة من أد مالهم خجلانين من بعض ...
- اشتقت للجامع الأموي ... للفسحة الكبيرة يلي فيها مكان بيتوضوا الناس منو ...
- اشتقت لريحة القرفة والزنجبيل ولمنظر السكر نبات لما بمر من سوق البزورية ...
- اشتقت لفساتين العرايس وللصبايا الدراويش عم يتفرجوا عليها ويحلموا...
- اشتقت لريحة الياسمين (ولو انو صار قليل) لمنظر ولد صغير عم ينط من الفرحة لأنو امو اشترتلو كيس ترمس وآخدتو عالجنينة ...
- اشتقت لمنظر الناس ليلة الوقفة وهنن عم يتذكروا غراضهم ويقيسوا ولادهم على عجل التياب الجداد ...
- اشتقت لطلعة الولاد من المدراس والخناقات والضحك يلي بيصير بينهم بهيك وقت ...
- اشتقت لفنجان قهوة على بلكون مافيها مكيف صوتو بيصور صور ...
- اشتقت لشجرة الكولونيا تبع جيراننا وتقطيف الأكدنيا مع اني ما باكلها ...


سلام

[أبو ناجي]

بيغ بيبي ...

والله معك كل الحق ...

بس افهموني اول ...

مو انا يللي كتبت عن الشام بدمي , مو انا يللي نقلت عطر الياسمين بالشام , مو انا يللي حكيت عن قطرة مطر فوق قاسيون انو بتعدل عندي كنوز الكون كله , مو انا يللي كتبت عن احلامي بانو ماشوف شوارع الشام الا طاهرة بلا مخلفات , مو انا يللي ويللي ويللي ...؟؟

لذلك :

يللي انتي قلتي عنهن وامور اكتر من هيك بمئات المرات و من نفس النكهة تبعاتك , هدول مو اشتقت الهن , لانو يعلم الله اني عايش فيهن بدمي وروحي وهدول أملي الاول لما بزور الشام ...

بس والله اللي قصدته مختلف تماما , قصدت لو تنزاح هالمصايب اللي اشتقت الها كتهكم مشان يضل رونق وبهاء الجمال الحقيقي يللي انتي حكيتي عنه ...

تخيلي مثلا يضلوا هدول الشغلات تبعاتك اللي حكيتي عنهن بنفس الوقت يطيروا الشغلات اللي حكيت عنهن ...ما بيصير الشوق وقتها عشق جنوني مستاهل ؟؟؟

الشام ابهى عروس عندي , ولاني بتغزل بكل خيط بثوبها , بتمنى تـنزاح عنه اي لطخة ولو صغيرة , لانه ثوب مقدس بالنسبة الي ...

ياريت تكون وصلت الفكرة ..

[bigbaby]

أبو ناجي فكرتك وصلت من الأول وأنا بعرف كتير منيح عشقك وغيرتك عالبلد ..
حبيت بس هز الورد ... بركي بيشتاق وبيرجع ...

[الخطاب]

او ما سجلت في امنتدى كنت مو طايئك يا ابو ناجي

بس يعل الله انو يوم عن يوم عم حبك و انك زلمة مهضوم و زكرتي

و انا اشتقت كمان


ولي عودة

[smilest]

سلامة اشتياقك أبو ناجي

لاتزعل ولا على بالك .. أنت تعال للشام واتروك الهموم وراك ولا تروح إلا على الأماكن الظريفة وشوف شلون لح اتكون من أسعد الناس

روح على الأرض السعيدة واضحاك .. روح للحدائق المعلقة وشم الهواء النقي .. اجلس بمطعم آرام ليلاً وسترى أمامك سوق الحمراء ومنطقة عرنوس بأبهى حلة .. اصعد على قمة جبل قاسيون واستمتع بمنظر الشام وهواها

مو ترحلي على الأماكن المعتة شو سوق الزبلطاني والهال وهالأمور
بعدين شبها الكهرباء إذا انقطت عادي نحنا شعب ما بيلبألنا إلا قطع الكهرباء لحتى انحس بنعمتها

[Engelbert]

و الله يا أبو ناجي مدري ليش أنا كمان هرت دمعتي .... بكتابتك و بكتابه بيغ بيبي ...
يمكن لانو منذ زمنن طويل لم أقرء مثل هذه الكلمات و بهذا التصوير عن دمشق ....
:cry: يلا يارب قريبا منشوفك بيناتنا ....
و بس لأخذلعلم انو سوق الهال راح و ماعاد يرجع ... [smilie=pdt_piratz_: بس و لا يهمك في الشعلان ....و سوق التنابل للخضرة ....


يلا أبو ناجي .... كلها شوي و يارب بتكون بيناتنا بالشام و بتنور فيك البلد ...
سلام ...
Engelbert

[Terminator]

عمي أبو ناجي ...
يا ترى ما اشتقت كمان لمعاملات دوائر الدولة العتيدة ...
يا ترى ما اشتقت كمان للوجه البشوش للشعب السوري ... PDT_Armataz_02_41 ...
يا ترى ما اشتقت كمان للنضافة والأطافة بكل مكان ...
يا ترى ...

الله يسامحكن يا هلمغتربين جميعاً ...

على فكرة أبو ناجي ... أنا بعرف تمام شو هي قصتك مع السرافيس ... :mrgreen: :mrgreen: :mrgreen:


سلام ...

[Mody]

والله يا عمو أبو ناجي

فتحتلنا جروحاتنا

صدقاً يلي ما داق طعم الغربة

ما بيعرفها ................

( نارك يا بلدي ولا جنة الغربة )

Mody MK

[george]

أبو الناج الملك..أنا محلك ما بشتاق للوتكة....لأنو شي بيقرف...
هلأ أنا عم بكتبلك والزمامير صارعة راسي...أفففففففف يا...

[Dehumanizer]

[align=justify:e3f2148e56]منذ يومين تقريباً، جلست أتصفح المنتدى واقرأ كل ما يصل إليه مؤشر "فأرتي" من مواضيع هنا وهناك، وبعد برهة، تذكرت موضوعاً قديماً كان قد أعجبني كثيراً أرسله لي أخي العزيز والغالي Aghalation بالبريد الإلكتروني منذ ما ينوف عن العام بقليل وتحديداً في 2005/8/6 .. فقمت بالبحث عنه لأقرأه مرة أخرى.

رغم أني أقيم في دمشق، آثرت كلمات ذاك الموضوع إلا أن تُشعرني بالمرارة التي يعيشها كل مغترب، ووددت أن يقرأه الجميع وهممت بالرد عليه لأرفعه إلى الصفحة الأولى بعد أن قُمت بتنسيق نصّه، لكني توقفت خشية أن أقلّب مواجع أخوتي المغترين وكففت عن المتابعة.

وبما أن أخي العزيز أبو ناجي قد آثر إلا أن نذرف وإياه دموع الغربة، كانت لي فرصة - قد تكون غير ملائمة - لأن أضع الموضوع هنا ليتسنى لكم الإطلاع عليه، فاعذروني جميعاً على هذه التذكِرة.

سورية الغالية ... من هي سورية بالنسبة لمغترب ([Only registered and activated users can see links])[/align:e3f2148e56]

[tmara]

اي والله ...اشتقنالك يا سوريا..
انا اشتقت لازعاج بياع الغاز وحنجرتو الذهبية...واشتقت للسيرفيس والسؤال تبع (طالع؟)
اشتقت لريحة الاراضي السورية ..
اشتقت للجبنة يلي مافي منها بالدنمارك..وللفواكه ..والله اطيب فواكه بالعالم ..وخصوصي المشمش والفريز..لو لفيتو العالم كلو مابتلاقو نفس الطعمة..
اشتقت للطرق المفشكلة ..وللكورنيش وبزر الشمس ..وعرنوس الدرة ...
اشتقت للفستق الحلبي ...اشتقت لزيتون سوريا ..ولسندويشة الجبنة تعيت مطعم سياحي بين الشام واللادئية..مو معقول شو طيبة..
اشتقت لصوت امواج البحر الابيض المتوسط..
اشتقت للسوق والمحلات..واشتقت للبياعين الي بيصرخو وبنادو عبضاعتهم ...
(بخامساو عشرين .. بخامساو عشرين اريبيييييييييب )....لاني هون مافي غير مراكز كبيرة..
اشتقت لشوفيريت التكسي وقصصهم الي مابتخلص ...كل ماتركب تاكسي بيحكي قصة..
واشتقت لكتييييييييير كتييييييييير شغلات..
بتحس في حياة في ناس عم تتعب لتعيش في دنيا في خير وفي شر ...
والله سوريا يتجنن ..بس بدها اهتمام ..

[Raneem_koub]

طب يا ترى ما بدكون تلاقوا حل هل القصص يلي مشتاقينلا؟؟

تناقشتو و تخانقتو بكل شي إلا كل شي بيخص هالبلد التعيسة...

[أبو ناجي]

والله شوقكم كلكم عندي عزيز وغالي ويعلم الله , ودموعنا كلنا صرنا نفهمها , المهم ما يخلينا هالشي الا نتمسك اكتر بمحبة هالبلد , لانو بدونه الموت افضل بالنسبة الي ..

[Volcano]

يا سيدي الله يردّك لوطنك واهلك وأحبابك وناسك سالم غانم

أدعوك وأدعو كل دماغ مهاجر إلى العودة إلى الوطن.... إلى سورية .... إلى الشام أرض الخير والعطاء.... إلى مسقط رؤوسكم ومرتع طفولتكم وملعب شبابكم وموطن ذكرياتكم

بفكركم الناضج وإرادتكم الصلبة وأياديكم البيضاء ستعود بلادنا -والعود أحمد بإذن الله - ستعود خضراءَ دافئةً عامرةً مزروعةً بالورد والياسمين.

إن أردتم ببلادكم خيراً فعودوا إليها وساهموا بإعمارها واعملوا واصبروا فإن الله مع الصابرين

بلادكم تناديكم فلبوا النداء يا أهل الشام الغنّاء

[turk666]

أشتقت لطشفيطات ابناء المسئيل بساحة المطاعم والفيلات الغربية
اشتقت للشوارع المعباية كل كم متر مطب
اشتقت لدخان السيارات المنعش
اشتقت للشباب اللي بينعشوا البلد بنشاطهن بباب توما والشعلان وابو رمانة
اشتقت

[Figo113]

اخي العزيز ابو ناجي ,,

اشكرك من قلبي على هالموضوع الرائع ,,,

و اشكر بيغ بيبي العزيزة كمان ,,


والله اشتقت لكل بحلب ,, و حتى الشام ,,


بس ابو ناجي بصراحة اكتر الشي اشتقت لوالدتي ,, والله الحياة من دونها ولا شي يا ابو ناجي ,,

لاحول و لا قوة الا بالله أحسن الشي ,,



اخي جورج , انا احترم رأيك , بس لما بتبعد عن البلد بتعرف قيمته ,,


ابو الناج العظيم انا بحترمك جدا جدا ,,


ولكم تحياتي جميعا من الغربة الجميلة ,,




فيغووو