اطلب واتمنى من ابو ناجي [الأرشيف]

أبو ناجي

01-06-2006, 13:38

سجقات ممتازات رائعات خطيرات .....

المقادير الجميلة :

- ما يقارب 1069 غرام سجقات جميلات نضيفات لامعات , اهم شي نظيفات جدا بشكل خطير ...

- رز جميل ورائع حبة صغيرة جميلة أنيقة مقدار 1022 غرام جميل.

- لحمة غنم رائع عمره 7 شهور ويومين , الكمية 483 غرام ..

- ماء بمقدار 1.83 ليتر خرج الطبخ وتكون مي بقين الجميلة .

- متل العادة ملح جميل رائع وفلفل اسود وتوابل يعني مع شوية عصفر مشان يصير لون المرقة قريب من الأصفر ...

شوفي سيدتي :

جيبي هالسجقات الجميلات انفخي فيهن نفخة جميلة هههههههههههه مشان نشوف اذا في تسرب خطير غازي منهن هههههههههه المهم جيبي سجقاية بطول 13 سنتمي واحشيها بالرز يللي بتكوني اساسا نقعتيه وغسلتيه شي نص ساعة بمي فاترة جميلة , احشيها بالرز يللي بالاساس كمان انتي حطيتي فيه ملح وفلفل وازا بدك جوز مكسر كمان ممتاز والله بتطلع طيبة ترا يا بنت الحلال , وكمون مشان ما تزعلي ..وما تقولي وين الكمون ...الخلطة المهم يعني نفسها ..وبتكوني ترا حطيتي اللحمة المفرومة بقلب الرز مع الخلطة نفسها مشان ما ننسى ...بس تخلصي كل سجقاية بتربطيها متل عقدة مشان ما تملص وتهرب وتتبحتر الرزات والحشوة منها بالغليان , بتحطيها على جنب , مو على ابو جنب؟؟ لا ...على جنب نفسه مو ابوه ...المهم ....بتعملي الكمية كلها , كذا سجقاية يعين حتى يخلصوا الكمية يللي عندك يا رائعة , بتصفيهم بهالطنجرة الجميلة وازا حطيتي شوية عظام تحت الطنجرة مو مشكله مشان ما يلزقوا يعني ...بتصفيهن صفة حلوة ومرتبة , وبتحطي عليهن هالميات الحلوين , وبوشك عالنار يا بنت الناس , ومعلقة عصفر صغيرة وملح وفلفل وبهار وكمون ...بخبخي ورشرشي على هالطبخة ....واتركيها ...لنشوف شو رح يصير معك...او ازا بدك تحطي مرقة لحمة ماجي او اشباه مرقة ماجي كمان مو مشكله ..المهم ...بتغطيها وتتركيها لمدة تقارب 53 دقيقة ..وتسع ثواني...بظن هيك رح تستوي وتروح فيها ...بس تخلصي ...طفي هالنار ..وطلعيهن ...وبصحن جاط رائع ...تبع الأغنياء يعني الاكابر ..ابو الخزف الصيني تبع يللي عليه غطا ..انا معقد منه من زمان ...حطيها والف صحة وهنا ...
وعلى راسي والله سمايلست خلي هالولاد يلغوطوا ويلوصوا بالاكلة الدسمة ...

ومو مشكله كمان للتوصيلة .. ببعت لك طلبية مع الصبي تبعنا عالبسكليت , قولي قريبين نحنا بشارع الملك العادل , عند بياع اللبنة .... وبالصحة والهناء سيدتي الجميلة ...

mr.baron

01-06-2006, 13:51

الله ....... والله هي أحلى شغلة بسمعها من شهر

أنا ساكن لحالي تقريبا فيكون تقولوا مشان هيك لحموت من الأكل الجاهز ...

حبيبي الشيف العظيم أبو ناجي انت روعة وأكلاتك روعة وكلشي فيك روعة ...

بدي منك حبيبي كيف بدي ساوي أكلة خفيقة نظيفة وتكون مغذية كتير يعني

مليئة بالبروتين والغذاء وسهلة التحضير تكون أهم الشي لأنو بتعرف هيك

الرياضة بدها يعني أكل كمال أجسام .... وشكرا ليدي على هالمطبخ الحلو

وميرسي خيو أبو ناجي ..ولا تبعتلي ياها أنا بجي باخدها مشان الأجور الاضافية ...

mr.baron

أبو ناجي

01-06-2006, 17:11

أخي الرائع بارون الجميل ...لك تكرم عينتينك التنتين والله , شوف , باعتبار بالشام انت ياعمري , ما لح كركبك بغراض واكلات بدها بحبشة وتدوير ويمكن ما تلاقي من هيك مواد , يعني مثلا مواد غذائية بحرية عديدة باعتبار انها ممتازة كسعرات حرارية وطاقة وبروتين وفوسفور وحديد ومغنزيوم وكل متطلبات الجسم وخصوصا الرياضي , لذلك رح نطلب منك تعمل أكلة خفيفة نضيفة وطيب كمان بنفس الوقت , والمواد اكيد موجدة بالسوق ...خود لقلك هالاكلة...

- اكلتنا اخي الرائع بارون , هيه ....

(((((((( الآنســة المحتـرمة لـحمـــة بالصـيـنـيـــة الرائعة الجميلة )))))))))

المقادير الجميلة الرائعة :

- بالنسبة الك انت طبعا خليها بس 423 غرام لحمة غنم ممتازة ورائعة وياريت تعرف شو ؟؟ جيب اللحمه من ظهر الخروف لأنو هاد المكان بالذات بيكون طري جدا وطيب لأنو مو متل الفخذ يعني الفخذ على مشي المعزاية بيكون حامل وزنها فعضلات الفخذ على الحركة والوزن بتكون قاسية . بينما لحمة الظهر فوق الفقرات ..الله الله ما اخطرها واطيبها لانو طرية ومتـنـبلة ما بتشتغل شي الا حماية ....مشان هيك بعضهن بيفضلوا كتير يعملوا منها الستيك , وبالمناسبة بالنسبة للحم الخروف صدقوني اطيب لحم بالعالم ذقتها كلحم خروف هيه في سوريا على الاطلاق وبدون اي مبالغة والله على ما اقول شهيد..المهم ..ماعلينا ...

- بقدونس جميل ورائع مغسول تماما ... جرزة بقدونس جميلة ..بس رح نستعمل نصها مو كلها ..

- اذا بتحب بصلة رائعة وخطيرة وممتازة ..

- بصلة فرش ممتازة

- بندوراية مسكينة بريئة فقيرة حمراء جميلة ..

- ملح وفلفل جميل وبس

طريقة التحضير الرائعة الممتازة التي مافي منها لهلىء بنوب ...شوف يا ابن الناس ..

- جيب صينية تيفال جميلة او عادية ما بتفرق كتير ..امسحها مسحة لطيفة وجميلة بزيت عادي , مو زيت سيارات ...المهم ..بتجيب بعدين هاللحمة ولازم تكون مفرومة فرمة خطيرة وقوية جدا بعد ما تكون ضفت عليها البقدونس المفروم بشكل كبير هائل ونضيف وتحط ملح مع هالخلطة وفلفل اسود ..لا تعجقها توابل مشان ما تخرب الطبخة ..وبلا الكمون هالمرة هون...المهم ..افرش هاللحمه بهالصينية فرش وامعسها معس متل معسة دهيومينايزر للبيضة اللي علمنا عليها سابقا هههههههه المهم زينها بشوية بعبصة باصبعك يعني على اساس ديزاين حلو للحمه و شرح طرانشات بندورة مع طرانشات بصل عالوجه ..عالوش يعني وش اللحمه ..

وادحشها للصينة في فرن حرارة فوق المتوسطة بالطبقة النصانية ...واتركها مدة تقارب الـ 28 دقيقة و 47 ثانية تماما ...ثم اخرجها وقطعها ساخنة ومع خبز مشروح وماء بارد ومثلج ..واذا بتحب لبن عيران مع ثوم ..اممممممممممم الله ما اخطرها ...وغمس لقلك حتى تشبع ..المهم انك تهجم بشكل كاسح على الصينية وتباغتها من حيث رقة ...اذا حبيت تشاركك الحبيبة هالاكلة مافي مانع بس بشرط انت تطعميها بإيدك وشوي شوي ..و يا مليار صحة على قلبك وقلبها وقلب الجميع يارب ..

نمرود

01-06-2006, 17:38

ألف مبروك أبو ناجي ..... ومنها للأكبر

وخبرنا عن أي فرع جديد الك ممكن يكون قريب منا مشان ما نطرق مشوار كل مرة ....

MS_LORD

01-06-2006, 19:11

يا سلام يا سلام
شي لذيذ و طيب
اي ساولونا من هلاكلت الكويسات
ادعمونا لقلكم

عطر الرحاب

01-06-2006, 23:12

مرحبا شيفنا الخطير أبو ناجي الرائع

ألف ألف مبروووك على هالورطه الخطيرة الجميله الرائعه jumpp_

طبعاً هالمفاجأة لم تأتي من فراغ..وإنما أتت تقديراً من اختنا الرائعه ليدي لجهودك الخطيرة في منتدى الطبخ والغذاء خاصه طبق (المكدوسات) الممتاز skip_ skip_

أتمنى منك أنك تعمل لنا طبق مكرونه خطير وجميل ورائع.. jumparound_

وزود بالسعرات الحراريه زي ما تحب..أنا مش من جماعه الريجيم [smilie=gelato.gif]

بإنتظار الطبق [smilie=lolo.gif]

العـGـيد

02-06-2006, 00:30

أنا بدي بسكويت منزلي ................. كتير كتير بحبو .

بليز أبو ناجي بليز .

أنا أبو الخل مو أي حدا ...؟؟؟؟!!!

أبو الخل .

Engelbert

02-06-2006, 00:58

مبروك أبو ناجي ...
ألف مبروك ... يارب منو لأحسن ان شاء الله ...
بس يا صبايا و يا شباب لا تكترو عليه و الله حرام ...
يعني و الله السجقات ثقيلة و اللحمة بالصينية كمان ثقيلة ...
و بسمنو كتير كمان ...
يا سيد أبو ناجي أنا مابدي شي غير كيف بتصير الشوربة العدس لانو و الله كتير بحبها و خصوصا اا كانت سخنة ......... ممممممممممممممم شو طيبة ....

سلام ...
Engelert

أبو ناجي

02-06-2006, 17:26

لك عنجد الله يسامحك يا ليدي ههههههههههههههه لك شو هالورطة ؟؟

عطر الرحاب الرائعة الفتاة الأنيقة عبق المكان وياسمينة كل بستان ...من عيوني والله رح نعمل هلق طبق مكرونة جميل رائع وخطير وممتاز ههههههههههههههههههه

شوفي يا بنت الحلال , رح قلك على المعكرونة يللي انا بعملها , بس رح اختار الصوص الأحمر , مو الأبيض ...شوفي كيف رح نشتغل ...

اول شي ...امممممممممممم ولا قلك؟؟

خليها سباغيتي ههههههههههههههههه بعدين المكرونة . السباغيتي اطيب اليوم الجمعة ..

- ظرف سباغـيتي إيطالي جميل ورائع ....

- ماء عادي جميل حوالي لتر و نص

- علبة صغيرة رب البندورة . أو ملعقتين طعام رب البندورة ..

- لحمة غنمة عمرها سبعة شهور وخمس ايام . مفرومة جميلة ورائعة , مو اكتر من حوالي 119 غرام وزيادة منيحه هيك..

- ملح ممتاز

- فلفل أسود منيل بستين نيلة ...

- زبدة رائعة وخطيرة وممتازة حسب الطلب , يعني ازا بدك جيبي قطع صغيرة مغلفة متل قطع الكيري بتعرفيها وما بدنا نذكر ماركتها ههههههههههههههه

- زيت قلي اربع ملاعق كبيرة ..

- تفاحــة حمراء عدد اثنان ..

الان شوفي يا رائعة يا عطر كيف الطريقة ...

- نأتي بقدر يعني طنجرة لا تلصق أبدا هههههههههههه نضع فيها كمية الماء لتر ونصف تقريبا . ثم نضعها على النار الجميلة ابعدها الله عنا وعنكم , المهم , بعد أن تصبح قليلا الماء فاترة يعني حرارتها بدأت بالازدياد الرائع والجميل , نضع اربع ملاعق زيت في الماء , ثم نضع السباغيتي الجميل متل ما هوه ...اي كما هو هههههههههه لا تكسريه يا بنت الناس , خليه هيك حتى لو كان طالع نصفه خارج الطنجرة المفتوحة الغطاء , لأن الحرارة رح تخليها شوي شوي تلين وترتخي وتسقط لوحدها لانو القسم الذي في الماء المسكين يبدأ بالانهيار , متل البورصة يعني احيانا , بس لازم هون شو تعملي؟؟ تنتظري شوي بس حتى تسقط كل العيدان بقلب الماء تبداي بس بتحريكها عن بعضها , ولذلك وضعنا زيت , كي لا تلتصق العيدان مع بعضها البعض , عرفتي ليش كانت هالخطة تبع الزيت ؟؟ طيب ..هلىء سيدتي شوفي شو رح تعملي , بتتركي السباغيتي عالنار بين ما يستوي وتحركيه كل فترة كي لا يلتصق ببعضه , المهم , تحضرين وعاء غميق وجميل عميق يعني , تضعين فيه ثلاث ملاعق رب البندورة , او ما يسمى معجون الطماطم مشان تعرفيها منيح , ونضع قليل من الملح حسب الرغبة , وفلفل اسود جميل ومهبب ومطين بستين طينة , ثم تكوني انت سيدتي شو عملتي بنفس الوقت او قبلها بشوي؟؟ تكوني قد احضرتي مقلاية وضعتي فيهازبدة وقلتي اللحمه المفرومة مع بصل مفروم تماما اذا بدك بصل طبعا , وبهار وفلفل و ملح مع اللحمه , حتى تصير ممتازة وتنتضح نرفعها من المقلاية ونضعها مع مزيج الصوص الأحمر تبع معجون الطماطم والشغلات التي حضرناها , المهم نضع كل هالمزيج اللحمه والطماطم والمواد هي ..نضعها في الوعاء نفسه ..وننتظر حتى يصير السباغيتي جاهز , طبعا يجهز السباغيتي بعد حوالي 28 دقيقة و 36 ثانية او اقل حسب النار , نطفي النار , ثم نصفي الماء من الطنجرة ... بحذر وهدوء شديدين , بالمغسلة يعني تضعي غطاء الطنجرة وانتي ماسكه طبعا شي يقي من حرارة الطنجرة ونصفي الماء في المجلى في المغسلة يعني , بس لازم تقولي قبل ما ترمي المي الساخن جدا في المغسلة , قولي دستووووووور مشان اذا في جني او عفريت ما تحرقي راسه ويتلبسك , انتبهي , وبسم الله قولي كمان , والمي الحارة ممتازة اذا في شغلات عالقة دهنية بمجرى المغسلة المي السخنة بتذوبها ...المهم وين صرنا؟؟؟

ايه تذكرت... صح....نحضر السباغيتي الشهي ..الرائع ...نضعه في جاط وعاء جميل يعني وثم نضيف عليه الكمية التي نشاءها ونرغبها من الصوص الاحمر مع اللحمه ..والف صحة وهنا...

بالنسبة للتفاحة ...التفاحة سيدتي مالها شغل...بس جبتها مشان عذبك شوي بالشغل واحضار شغلات مالها علاقة بالطبخة ههههههههههههههههههه

بس فيكي تاكليها بعد الطبخة اذا بتحبي..

------------------

ملاحظة : حبيبي وعمري ابو الخل لك لعيونك والله , احلى طبخة ..بس عطيني لبكره وقت ..

والله اليوم جمعة و يعني خليني فلتان شوي ...خليها اليوم بس طبخة وبكره بإذن الله إذا الله عطانا عمر الك مني احلى طبخة ..إن شاء الله طبعا..

انجلبرت : لك مو تكرمي يا اعز الناس؟؟ لك والله لتشوفي اجمل واحن واحلى شوربة عدس ممتاة خطيرة ..بكره ان شاء الله ...عطوني اليوم راحة بس اليوم ...معليش؟؟؟

من عيوني والله خلاص...

لك يا ليدي ههههههههههههههههههههههههه الله يسامحك يا ليدي ههههههه

ههههههههههههههههههههههه اااااااااااااااااااه

lady

02-06-2006, 19:14

هههههههههههههههههههههههههههههههههههه
ههههههههههههههههههههههههه
ههههههههههههههههه
ههههههههههههه
ههههههههه
ههههه
ههه

لك والله والله ضحكتني من قلبي ياناجياتو :)

اول شي شكرا لكل الموجودين, جد مبسوطة كتير بطلتكن الحلوة وطلباتكن الاحلى :)

ناجياتو العظيماتو الله يسامحنا جميعا :)

لك والله بعرفك بتشتغل كتير بالهيكه لهالسبب قلت خليك تقضي وقت حلو بالمطبخ وانت عم اتقدم اجمل ماتصنعه يديك :)

ويعني الله لا يحرمنا من اكلاتك و وجودك

وكتيييير سووووري عالورطة يلي بعرف انك حبيتها :)

هههههههههههههههههههههههههههههههههه

NART

02-06-2006, 19:20

ألف ألف مبروك أخي أبو ناخي أحلى ورطة

شكلك شاطر بالصلطات شو مشان الصلطة الورسية

[Only registered and activated users can see links]

[Only registered and activated users can see links]

mr.mask

02-06-2006, 23:57

أحلى أبو ناجي .....

ابو ناجي ...انشاء الله الف مبروك يا رب ...والله من كل قلبي ....

بدي اطلب طلب صغير ....

بدي اتعلم أكلة الفول المدمس مع بصلة اذا ما فيها سقلة .....
و التسقية كمان ...بزيت و بسمنة " بدوة " ......

على راسي والله ...و ميرسي الك سلفا .

MR.MASK

أبو ناجي

03-06-2006, 10:31

نــارت الرائع :

ماسـك الجميل الرائع :

ياعمري يا حبايب قلبي , طبعا من عيوني والله بس بقدر بنفذ طلباتكم فورا إن شاء الله ....

بس خليني اعمل كل يوم طبخة مو اكتر....يعني بيصير هيك تسجيل عالدور ههههههههههه

بنعمل طبخة طبخة كل يوم مشان الزحمة . لانو في بالمنتدى اكتر من الف شخص يعني اذا قرر كل شخص بس يفوت يكتب كلمة وحدة ...مثلا ...ابو ناجي بدي طبخة شيتوبيريان ...بيصير لازم اعمل الف طبخة هههههههههههههههههههههههه يعني مشان هيك يا رائعين عطوني فرصة بس اعمل طلب ورا طلب ...ولكم محبتي وخالص احترامي ...

أما بالنسبة لأكلة شوربة العدس الحنون والجميل للرائعة إنجلبرت الجميلة الحبوبة الأطئوطة الكربوجة المكلتمة والمطئمشة هههههههههه ... من عيوني خلاص بنعملها اليوم

- المقادير يا بنت الحلال :

- عدس 209 غرامات بس العدس يكون مجروش يعني ابو اللون البرتقالي ...

- رز قصير بحجم كاسة شاي صغيرة .

- بصل جميل ورائع بصلاية حلوة كبيرة .

- سمنة حيواني معلقتين جميلتين تبع اكل ..

- كمون . ضروري جدا الكمون هون

- ملح جميل ..

- ماء ليتر كامل وحلو امور وكربوج ..

شوفي آنستي الجميلة شو رح تعملي :

فوتي للمطبخ بدون ما يحسوا اهلك طبعا , مشان ما يقبضوا عليكي بتهمة تخريب المجلى والطناجر و عمل كركبة هائلة مشان طبختك العالمية الشوربة ههههههههههه

- جيبي طنجرة حنونة جميلة متوسطة , حطي فيها زبدة حلوة او سمنة حيواني ملعقتين طعام , بعدين بس تسيح السمنة سقطي فيها بصلة طبعا البصلة بتكوني قطعتيها قطع صغيرة جدا جدا بس يتقلوا البصلات الفقيرات المسكينات بقلب النار , سقطي فوقهن كمية العدس الجميل و شوية الرز القصير طبعا لازم رز قصير لانو بيساعد على أنو العدس يمسك على بعضه , وضيفي فورا طبعا المي يعني شي لتر بيكفي ..المهم اكتر وضعف كمية العدس , واذا لزمنا بعدين نضيف ونزود المي مو مشكله يعني اذا ما بتحبيها كتير ماسكة ..المهم ..اتركي المزيج على النار الجميلة ...شي 43 دقيقة , حتى تراقبي تشوفي هل تحول العدس الجميل الى قوام متماسك ؟؟ وصار بلون شوربة العدس؟؟ طبعا حركي كل شي عشر دقايق ...اخر شي اتركي الطبخة لحالها على النار حتى تمسك وتصير تبقبق هههههههههههههه ويصير لونها فعلا عدساوي جميل ....ولا تنسي هون شي خطير ومهم ...الكمون يا بنت الناس ..الكمون ثم الكمون ثم الكمون ...حطي الكمون ...وشي تاني خطير جدا واكبر اهمية ...الملح لا تحطيه اول الطبخة ... لا تحطيه ابدا اول الطبخة لانو ما بيستوي العدس ساعتها ..خلي الملح لاخر مرحلة قبل ما تطفي النار بشي 3 دقايق و 18 ثانية ....

وخلاص ...طلعي الشوربة ...واسكبي سكبا رائعا وجميلا في زبدية رائعة بورصلانية خزفية رائعة ...ومليار وسبعمائة الف وخمسة وثلاثون صحة وعافية ست الحسن انجلبرت الرائعة ...

والى اللقاء مع أكلة قادمة إن شاء الله ..يمكن اعمل احيانا اكلتين باليوم ..حسب المراق والمزاج العام ...

شكرا ومحبة للجميع و اهم شي ما ننسى نشكر ليدي على هالورطة هههههههه

ههههههههههههههههههههههههههههههههه ياربي شو بدي اعمل , كله من ليدي الرائعة

عطر الرحاب

03-06-2006, 14:52

يسلمو ايديكي ابو ناجي...أوبس أقصد أيديك PDT_Armataz_01_12 PDT_Armataz_01_12

شكرا على طبق السباغيتي الخطير الرائع
والله يديمك لمطبخنا PDT_Armataz_01_04

وانشالله دايما نشوفك بأعلى المراتب والمناصب PDT_Armataz_01_34

smilest

03-06-2006, 15:42

وينك أبو ناجي أنا ما قلت إلك تبعتلي السجقات على العنوان ..صار لي من 3أيام عم استنى الأكلة وماكانت تصل هههههههههههههه
بدو فلقة هاد الصبي يلي مشغلو عندك ههههههههههه
يسلمو ايديك أبو ناجي والله يعطيك العافية

أبو ناجي

03-06-2006, 16:02

عطـر الرحــاب : يارب كل الصحة على قلبك وتتهني بكل لقمة جميلة ورائعة بالعافية ان شاء الله , بس ما لقيتي اعلى المراتب والمناصب الا بالمطابخ ؟؟

هههههههههههههههههههههههههههههههههه

اساسا مابعرف شو بدي قول غير كل مرة عيد وكرر الله يسامح ليدي

يعني الناس عم تقول مبروك ههههههههههههههههههههههه

والله رح صدق عنجد انو يعني استلمت منصب امبراطوري هههههههههههههههههه

- الرائعة سمايلست الخطيرة الممتازه ...

لك الصبي الاجدب بعتو بس خلصت الطبخة. بس الظاهر انتو نقلتوا بيتكون ...

على كل حال من عيوني ببعت الصبي رقم 2 واذا ضاع ببعت رقم 3 وهيك لحتى يلاقوكي انتي وولادك , بس انتبهي مابدي اسمع انو ولادك عم يلعبوا قدام الباب او بالحارة ...انتبهي يا بنت الناس...مو تفلتيهن يتمهيصوا بهالصئايىء مشان تلتهي انتي بشي برنامج عالتلفزيون او بقعدة رومانطيقية مع صاحب العصمة ..اوعك ها ...الولاد امانة هدوله ...

تاني شي ..لك ليش اخترتي بالزات هالجادة؟؟؟ كأنك بتعرفي وين ساكن انا؟؟ او كانك عم تلمحي انو عنجد بتعرفي وين بيتنا بالشام؟؟

والله صدفة غريبة عنجد

هههههههههههههههههههههههههه عنجد شي غريب ...

على كل حال ...ان شاء الله ما تاكلي الا كل صحة وعافية يارب , وربي يبارك ببيتك واولادك واهلك اجمعين يارب .....

العـGـيد

03-06-2006, 23:29

لعمى وانا ساكن قريب من هالعنوان كمان ؟؟؟؟؟؟

شو القصة يا ترى ؟؟؟؟

سلماتي حبيباتب كلكون .

أبو الخل .

lady

04-06-2006, 01:52

ياترى بيطلعلي اطلب اكلة:)

لاااا والله حرام مالي قلب..

بستنى لبعد شي سنة :)

أبو ناجي

05-06-2006, 15:10

تســئية ناعمة وجميلة وخطيرة وممتازة :

سيدتي المقادير يا بنت الحلال ...قصدي يا ابن الحلال ياعمري يا ماسك هههههههه

- مسبحة يعني حمص مهروس ومفعوس وصاير متل الكريمة ..

- حمص عادي جميل وممتاز مسلوق جاهز ..

- مرقة حمص جميلة وكربوجة وأمورة ..

- زيت زيتون جميل ونقي وخالي من الشوائب ...

- خبز رائع من مخبز الشهبندر , او من مخبز اممممم ابو معروف بشارع العابد , لا صحي ابو معروف بطل يبيع خبز صار بس كعك وتوابعه ...طيب خلينا على مخبز الشهبندر حاليا ...

- ملح ابيض وخطير وجميل - كمون رائع و رائحته شهية _ فلفل اسود -

- ليمونة صفراء فاقع لونها تسر الناظرين جميلة وحلوه ...

- سمنة رائعة حيواني ملعقة تقريبا تبع اكل ...

- صنوبر خطير وغالي ونخب اول ممتاز ....

- طحينة ولحمة مفـرومة جميلة ...

- بقدونس اخضر بشكل قوي ونظيف جدا ...- ثوم - لبن زبادي

الطريقة سيدتي .. سيدي ماسك يعني...

- قطع هالخبز قطع صغيرة يعني تقريبا كل قطعة 2.29 سنتيمتر مربع شي يعني بيعبي ثلاثة ارباع زبدية يعني صحن خزف جميل ...

- احضر صحن اخر عميق ضع فيه كمية ماء الحمص الذي يغلي الساخن الخطير , مع شوية حمص بقلبه ... وغرق به الخبزات الرائعات اللي عملتهم ...

- جهز في صحن اخر جميل قليل من الطحينة قليل من اللبن وقليل من الثوم والليمون ملعقة صغيرة تبع شاي من زيت الزيتون لأسباب صحية مو اكتر ...الآن ماذا تفعل يا سيدي.. لو احضرت الخبز وقليته قبل ان تضعه فهذا يصير يا اخي اطيب ..على كل حال ...تحضر الآن المزيج الجميل ..وتخلط بشيء منه قلب الخبز وتقلبه بهدوء كي لا تمعس الخبزات المسكينات ..ثم تضع كل المزيج على وجه الخبز و زبدية التقديم , المهم . الان تغطى الوجه بالمزيج الجميل .. ضع زبدة او ملعقة سمن حيواني على النار في مقلاية جميلة وضع فيها صنوبر رائع وحبوب ..حتى تصير ساخنة جدا ...احضرها هنا , وتمتع بصوت جميل جدا هو تششششش تشششش تشششش تششش حين يلتقي كالعادة التيار الحار مع التيار البارد ...السمنة مع الصنوبر الرائع يعني طشها على وجه المزيج , هنا الان ضع قليل من البقدونس وزين الصحن ورش رشة كمون جميلة واذا بتحب شوية فلفل اسود ومنيل بستين نيلة ...

والف صحة سيدي الرجل وعافية...

لو بنت كنا زودنا التحيات اكيد بشكل خطير هههههههههههههههههههههه

smilest

05-06-2006, 15:20

الله عليكي ياليدي استني شي سنتين مو سنة حاكم لهلء ما كانت تصل طبخة السجقات لعندي مع أني طلعت جارته لأبو ناجي

أبو ناجي هيك بتعامل جيرانك ياعيب الشوم هم هم
خلص اتجاكرت منك وما عدت وصيك على شي أبداً
هههههههههههههههههههههههههههههههههههههههههههههههههه هههههههههههههههههه

أبو ناجي

05-06-2006, 15:50

الرائعة مدام سمايلست الجميلة جارتنا الغالية أم نصوح ...

طبعا ام نصوح اخترت لك هالاسم باعتبار مابعرف شو اسم ابنك البكر ..قلت بختار اسم نصوح ..

يعني بيمشي مع موضة الاسماء الجديدة الشائعة , او مثلا ؟؟ امممممم ..ام زهدي؟؟ او صلحي ربحي نظمي فكري وجدي حلمي خيري ههههههههههههههههههه

ساعدوني بالاسماء يللي عم تقروا ..

- المهم : انو يا بنت الحلال يا اطيب جارة ...أنا ما وصلت الطلبيه مع الصبي؟؟؟

لك مو من خمس تيام دوختي الولد عالبسكليته عم يلف ويدور حتى داب بزر مخه يدور على باب بيتكون وين؟؟ ولهلىء عم يلف حتى ينكوش البيت ..مابعرف وين صرتوا ...عند ملحمة عجل مدري بغل مثلا؟؟ ههههههههههههههههههههههههههه

على كل حال ان شاء الله شهر وبتوصل الطلبية ولا يهمك...

واحلى ام نصوح ...

smilest

05-06-2006, 15:57

لالالالالالالالالالا خلص لاتعزب هل الولد ولا على بالك حرام الدنيا كتير شوب أصلاًهل الأكلة مو خرج الصيف كلها دسم وحريرات خليها للشتوية القادمة إن عشنا
بعدين كل هلأسماء ماحبيتها وما بغيرها عن أم أنس

أبو ناجي

05-06-2006, 16:18

فقلت كما شاءت وشاء لها الهوى ...طباخك قالت : أيهم ؟ فهم كثر
معلّلتي بالجـلي والموت دونه ...إذا مت هلـكانــا فلا نزل القطـر

واطيب أم أنس ...

smilest

05-06-2006, 16:29

وأطيب أبو ناجي
أهلين جار

lady

05-06-2006, 19:31

مشان الاكلة كانو هي كانت اول اكلة نزلت بهالبرنامج الناجياتوتي يااحلى سمايليست :)

mr.mask

08-06-2006, 00:15

لو بنت كنا زودنا التحيات اكيد بشكل خطير هههههههههههههههههههههه

اي لكن يا عمي ...لكن هنن مدعومين و نحنا لاء ....
ماشي بس ... ماشي .... بس والله معك حق على شو بدك تدعمنا ما ؟؟؟؟

بتحبو مين أبو ناجي .... و حبيبكم مين .......... أبو ناجي ...

لك انشاء الله مو بس يسلموا و يسلمولي كمان هالايدين على هالتسئية الله شو طيبة ...

بعدين شو الوضع حبيب لسا ما بلاقيك الا مخربط بين سيدي و سيدتي .....اي مو لهالدرجة ..الله يسامحك سيدتي ... عفوا سيدي الحبيب ابوناجي ...هههههههههههههههه

بتمون ..... لعيونك ..... وحياتك بتمون ... عيونك هالعيون .... انا حبيتك من أول نظرة و كله لعيونك بيهون ...
بتمون ... بتمون ... بتمون .... لعيونك ... مع شوية كمون منشان الصحة مو أكتر ... هههههههههههههه

Mr.MASK

أبو ناجي

08-06-2006, 09:58

طبـخة اليوم هي : الآنســـة بــامـية المحترمة الأنيـقـة مع اللحمة الجميلة الطيبة ..

سـيدتي وآنســتي ومطموزيلتي وقطتي الساحرة في هذا المكان الجميل ..

اليك المقادير الرائعة والجميلة .... وانتبهي متل العادة , خلي عقلاتك شوي معي , أو خلي شوية عقلاتك معي هههههههههههههه المهم يا رائعة اقري وتمتعي بطبق شهي وجميل طبق البامية الساحرة الرائعة , لفتاة أكثر روعة من البامية نفسها ........

- بـامية جميلة صغيرة رائعة خضراء ممتازة 489 غرام سوري ..

- لحمة من خروف عمره أربع شهور وتسع ايام وخمس ساعات وثلاث ثواني 127 غرام كمان سوري ...

- انا ما بستعمل كزبرة بالبامية مشان ما يحتجوا علي النسوان اللي بيحبوها لذلك مابدي ضيفها و اللي بدها تزعل تزعل...ما بحب الكزبرة ...

- رب البندورة الأحمر المسكين , يعني معجون الطماطم الرائع مقدار ثلاث ملاعق طعام جميلة ...

- سمنة حيواني ااااااااه رائعة جدا , وإذا سمنة عربي ؟ يا سلام الله الله الله ..يا سيدي , لك و يلا خليها سمنة عربي بلدي اصيلة ورائعة ملعقتين طعام ونصف ...

- ثوم من النوع الجميل جدا تقريبا ثلاث فصوص ...ثوم طبعا

- ملح من سبخة الجبول أو من أملاح البحر الميت , او ملح العائلة ...المهم ملح جميل وابيض ونقي ...

- ليمونة اذا بتحبي سيدتي ...

---- لك وللجكارة ---- كمان شوية كمون ...انا بحب الكمون كتير بعد ما تستوي الطبخة طبخا برشرش وبخبخ على هالصحن وشوية فلفل اسود كمان بحب الرشرة ..

---- الآن ---- اللحظة الحاسمة ---- خطة الطبخة وكيف ستـتم بدون مضاعفات او اعراض جانبية سيدتي ..ومطوزيلتي وآنستي الرائعة في المنتدى الجميل ...

- نحضر طنجرة رائعة لا تلصق نهائيا معليش متوسطة نضعها على نار جميلة ونضع ملعتين ونصف سمنة بلدي رائعة , او زيت ذرة او عباد شمس او زيت كاز عالعادة ههههههههههه لا خلينا بس بدون زيت كاز كمان كالعادة ...نضع اللحمة التي هي طبعا مقطعة لحجم رأس عصفور كروان , ونقليها ونقلبها بشكل جميل , نضع الآن سيدتي شوية فلفل اسود عالماشي ما بنخسر شي , وثم نضع شو يا حزرك ؟؟ نضع البامية , بس اسمعي هون لفهمك شغلة مطموزيلتي الرائعة , البامية اول شي بقمعيها , يعني تشيلي راس البامياية و2,7 من الميلي ميتر من سفلها من تحتها يعني , ونغسلها غسلا جيدا مشان ما تخنزر بالطبخ لانو يا بنت الناس ترا البامية بتخنزر بالطبخ , المهم , نضع الان البامية المغسولة والمئمَّـعة فوق اللحمة التي عم تستوي , نقلب ونقلب ونقلب يا بنت الناس لمدة تقريبا 3 دقايق وسبع ثواني , هون شو بنعمل؟؟ بنكون يا مطموزيلتي الخانم محضرين اساسا رب البندورة عاملينه عصير يعني حللناه بالماء شي لتر تقريبا او اذا طبعا بتعرفي تعمليها ببندورة طازجة لسه بتطلع اطيب كمان , هديك بتجيبي بندورة مستوية يعني مو تبع السلطة وهات يا معس وفعس بشي مصفاية تضلي تمعسي وتفعسي بندورة حتى يصير تقريبا عندك كمية منيحه بتضيفي عليها بعدين شوية مي حتى يصيروا الكل على بعضهن شي ليتر ..طبعا البندورة الطازجة احسن من رب البندورة واطعم واطيب , بس بعرفك سيدتي بهالايام صرتي تنبلة وكسلانة وأحيانا يعني عم تتحولي لبطا بوف شوي شوي بعد الزواج , بتقولي خلاص , يلا اجا واحد وانعما على قلبه , ما بيهم لا اعتني بجسمي ولا شي ,, خلا لحقنا حالنا وعمره انشالله جسمنا خلاص , لك نسيت وين كنت ههههههه ايه صح . سيدتي ومطوزيلتي , ضعي عصير البندورة على البامية وحركي المزيج وانتظري يا بنت الناس حتى تستوي البامية بتشوفي لونها صار عم يغمق يغمق يغمق من الاخضر للزيتي الغامق يمكن هيك شي تقريبا شغلة 49 دقيقة او حسب انتي النار اللي عندك او حسب انتي ما بتشوفي ازا استوت قبل ما تطفي النار بشي ثلاث دقايق و 23 ثانية . حطي الملح المناسب ولا تحطي الملح الا شوي شوي وبتدوقي مشان ما تخربي الطبخة كلها وتصير ملح صبر , وتروحي فيها على بيت اهلك , او يصير تراشق ادوات المنزل بينك وبين جوزك المصون , المهم حطي كمان الثوم بنفس الوقت , لانو انا اساسا ما بحب التوم يكون كتير مستوي بالطبخ مشان الفائدة الجميلة , المهم اطفي النار واطبخي جنبها اكلة رز بشعيرية ..اااااااه الله الله ...شي ناهي شي خطير ...

وانتظري بئى مطموزيلتي الافندي ليشرف من الشغل والولاد حتى يجوا كمان ينطوطوا بهالبيت وياكلوا ويتهنوا الفين وسبعمائة وستة وثلاثون صحة وعافية يارب ...

وتحية رائعة لحبيبي ماسك طبعا ما ننساه ابدا ياريت يدوق هالطبخة والله بيستاهل حبيبي..

smilest

08-06-2006, 10:18

---- لك وللجكارة ---- كمان شوية كمون ...انا بحب الكمون كتير بعد ما تستوي الطبخة طبخا برشرش وبخبخ على هالصحن وشوية فلفل اسود كمان بحب الرشرة ..

مين هي التي عم تجاكرها ..ها ..اعترف ..ههههههههه بعدين أنا بنصحك يا ماسك ما تحط أبداً كمون على البامية هي أول مرة بسمعها من طول عمرنا أهل الشام منحط في النهاية كزبرة وثوم
يسلموا أيديك أبو النوج على الطبخة يلي أنا بحبها بس أولادي كل ما بساويلهن اياها بتقاتل أنا
وأياهم وبتصل أصواتنا لعند ليدي مو ليدي

أبو ناجي

08-06-2006, 10:28

ســمايلســت الرائعة الجميلة أحلى وارق واطيب أم أنس والله , وعلى راسي من فوق

هههههههههههههههههههههههههههههههههههههه

لك ليش فيني جاكر حدا غيرك؟؟ انتي بتتحمليني شوي هههههههههههههه غيرك يمكن يمصع رئبتي مصعا خطيرا ورائعا هههههههههههههههههههههه

- لك انا ما بحب الكزبرة فيها , مابعرف ليش بيحطوا كزبرة فيها لك بحس انو بس مشان يخربوا طعمتها ...المهم...يا ستي طبعا عنجد ..ما بحط الكمون بالطبخة لا مستحيل ..

انا قلت اخر شي بجيب الصحن وبهجم هجمة رجل واحد وعلى رشرشة بهالكمون وبخبخة لك عالصحن عالطاولة لك عالكومبيوتر لو كنت عم اكل واكتب لك وين ما بييصحلي رشرش برشرش لك عالاراضي عالحيطان ههههههههههههههههههههههههههههههه

بعبي هالدنيه كلها كمون منيح هيك؟؟ ههههههههههههههههههههههه

----- لك ربي يسلم قلبك ويبارك لك بعمرك وبأولادك واهلك يارب -----

تانيا مو على كيف الولاد ...بدون ياكلوا بامية يعني بدون ياكلو باميه هههههههههههه

lady

08-06-2006, 10:37

يسلمووووووووووووووووووووو احلى شيف بالعالم

لك ابو نااجي انو مشان انا والاطائيط مامنحب لحمة خرووف :( بأا شو الحل :)

سمايليست..ايدك يعني مو هيك :) ههههههههههههه حبيبة قلبي والله

بدي اسألك بالله سمعتي شي اصوات الصحون مبارح..؟؟

بس ماتقولي لحدا :)

اب ناجياتو عندي سوعال الك..شو قصة الكمون؟؟؟

والله ياابو ناجي وصفات وجباتك مميزة كتير..والله لا يحرمنا منها ولا مو وجودك

سمايليست يلا انتي والاولاد وابو ناجي والمدام واحفاده معزومين عندي اليوم :)

تحياتي

أبو ناجي

08-06-2006, 10:49

بونجور يا خيتو بونجور

لك احلى صباح الخير لوجه الخير المطموزيل ليدي ...كيف مطموزيل وكيف ليدي لا تسألوني هيك بسمعها المهم تحياتي كلها الك دفعة وحدة يخليكي ر بي انتي والاطائيط وهيكه , شايفه شلون؟ هههههههههههههه المهم..

يا بنت الحلال العملية كتير محلولة وبسيطة...سقطي بدال اللحمه مرقة السيد ناجي مدري ماجي هههههههههههههههههههههه وخلاص ...بتمشي الاحوال...

smilest

08-06-2006, 19:56

منشان الله يا أبو النوج لاتكتب بألوان السلطة تبعك حاكم ما عم شوف مليح ولا بدك ياني حط نظارات متل حكايتك يعني بالجكر
وأطيب أبو النوج ..وأطيب ليدي.. مشكورة ليدي على العزيمة وكلك زوق حبيبة قلبي

Engelbert

08-06-2006, 20:10

مرحبا أبوناجي ...
كيفك ؟
شكرا كتير لحضرتك على شوربة العدس ...
و الله كتير طيبة ... و والله كتير لازم أكلها لأنو كتير مرضانة و تعبانة انا بعد الفحص ...
و الله بس أنا بما أنو كنت تعبانة لذلك فضلت شوربة الفطر الشبه الجاهزة على شوربة العدس لأنو مالي قوة أعمل شي ... شوربة الماجي سهلة و بدون شغل ...
بامية .
بدي احكيلك قصة وقت كنت صغيرة كتير كنت ماحب البامية كتير و كنت سميها " بوز " لأنو شكلها كان يخوفني كتير ... لذلك كبرت و لحد الآن ماكتير بحبها بس باكلها بالنسة مرة ... لذلك اذا شي يوم حدا من اخواتي حب يجاكرني بقلي بدي اطبخلك " بوز " ... و أنا طبعا بنغاظ كتير ...

شكرا كتير أبو ماجي ...

سلام ...
Engelbert

أبو ناجي

11-06-2006, 16:41

الخــضــروات - الخــضــــروات - الخـضـــــروات - الخـضـــروات - الخـضــــــروات - الخضـــروات
سيدتي وآنستي في المنتدى وفي الكوكب أيضا ....

اليـوم القضية مفيدة بالفعل غذائيا , فالموضوع يتعلق بفوائد الغذاء , طبعا بتحديد نوع الغذاء وانعكاساته الصحية من حيث الايجاب على النسوان المسكينات الرائعات الفقيرات ...

القضية تتعلق بدراسة مهمة جدا تقول بأن الخضـروات ثم بعض أنواع الرياضات في المنزل تخفف من آلام الحـيض الشرير ..

أظهرت دراسة طبية حديثة أن بإمكان النساء تخفيف المعاناة والآلام المصاحبة للدورة الشهرية من خلال الإكثار من تناول الخضراوات والفواكه والأطعمة النباتية المختلفة.

وأوضح الباحثون أن معظم النساء يعانين من آلام شديدة تصاحب فترة الطمث ومنها: الإحساس، بالتعب والإرهاق والعصبية والقلق وانتفاخ البطن، وقد تزداد هذه الآلام لتتحول إلى اكتئاب شديد، مع عدوانية ملحوظة في السلوك.

وأشار الخبراء إلى أن آلام الطمث تتأثر بشكل كبير بنوع الغذاء الذي تتناوله المرأة، سواء بصورة إيجابية أو سلبية، فقد تبيّن أن هذه الآلام والأعراض خفّت بصورة ملحوظة عند النساء اللاتي اعتمدن على استهلاك الأغذية النباتية من الحبوب والخضراوات والفواكه فقط، وابتعدن عن اللحوم والزيوت وغيرها من المواد الدسمة.

وأكد الباحثون أن الآلام المصاحبة للدورة الشهرية تنخفض بشكل كبير عند النساء اللاتي يمارسن تمرينات رياضية معتدلة بمعدل خمس مرات أسبوعياً، كما قد يساعد تناول الوجبات الخفيفة مع فيتامين (ب 6) على تخفيف أعراض ما قبل الطمث التي تصيب النساء قبل الدورة الشهرية بأسبوع إلى 10 أيام.

فسيدتي الرائعة وآنستي الطيبة عليك باتباع وتجربة تلك الارشادات , علها تعطي فائدة مرجوة ما , والله هو الشافي المعافي بأي حال , ولكن نأخذ بالأسباب , ولن تخسري شيئا من التجربة لفترة شهرين مثلا أو ثلاثة , فالقضية تختص بمجموعات كبيرة من النسوان الفقيرات المسكينات اللواتي تعانين من تلك الآلام الشريرة ....

مع التحية والسلام

أبو ناجي

12-06-2006, 09:45

صباح البونجور يا جودمورنيـنغ بونجورنو سينيوريتا دوبري اوترا دراجايا كاكديلاك سلاتكي المهم ...

طبختنا اليوم طبخة سريعة جدا , هية تعتبر طبخة تـنابل كمان , يعني احيانا بتصير عصرونية او مع العشا او هيك يعني عالمراء , حسب المزاج يعني , بس ماشي حالها كصحن جميل وناعم..

الطبخة الخطيرة اليوم الناعمة هي الآنسة المحترمة الماطموزيل مـفـرَّكـة السيد كوسا المحترمة

المقادير الرائعة :

- ثلاث كوسايات من الحجم الوسط الجميل , طبعا الطبخة صحن يعني وبلاها الفجعنة ..بيكفي صحن ..

- لحمه مفرومة غنم مو اكتر من اممممممممم خلينا نقول مثلا 133 غرام , لحمه نفسها اللي بنحكي عنها تبع الخاروف ابن اربع شهور وسبع ايام وساعتين وثلاث دقايق وسبع اعشار من الثانية .... اطيب شي طبعا..

- بيضة جاجة نيه اذا بتحبي , لانو بيضة نعامة بتصير طعمة البيضة اكتر من الكوسايات ...

- فلفل اسود مهبب على عينه قطران...

- ملح جميل وابيض ورقيق وناعم ..

- ملعقة سمنة , أو قليل من الزيت الرائع , بس انتبهي مطموزيلتي , مو زيت زيتون , خصوصا ترا ريحة زيت الزيتون بالقلي خطيرة بتهرب الناس من البيت ...

- ماء نقي جميل , كمية بمقدار نصف كاسة شاي صغيرة او ثلاثة ارباعها ..

--- طريقة التحضير الرائعة الممتازه الخطيرة :

جيبي هالكوسايات يا خانم يا بنت الحلال يا أطئوطة يا غنوجة يا أمورة يا مطموزيل , نضفيهن , طبعا ازيلي راس الكوساية يللي فيه شوك , الشرير الفوقاتي يعني , و الجزء يللي بسفل الكوساية البني يلي متل دويرة بنيه ...شيليها , اغسلي الكوسايات منيح لانو بتعرفي بيكون ملمسهن فيه شوية وبر مشوك ..على كل حال , قطعي هالكوسايات بشكل صغير بس مو ناعم جدا , ( مشان ما تصير الكوسايات شوربه يعني ) هههههههههه المهم بعد أن تقطعين للكوسايات حطيهن على جنب , مو على ابو جنب ؟؟ لا ..على جنب نفسه على ابنه يعني ..

- جيبي طنجرة جميلة لا تلصق متل العادة تبع الأغنياء يعني مو متلنا الجربانين الكحيانين الفقرا , طناجر المونيوم , لا , طنجرة تبع الاغنياء الاشرار , حطي فيها ملعقة السمنة او الزيت , وسقطي اللحمه الممتازه , وقلبيها وقلبيها وقلبيها حتى تستوي شوي يعني وفورا سيدتي سقطي هالكوسايات يللي قطعتيهن معهن وهات يا تحريك , حركي حركي سيدتي بس شي دقيقة و27 ثانية مو اكتر من هيك, بس تشوفي الامور ماشيه على كيفك ...حطي شوية المي فوقهن بس مشان تطرى الكوسايات يعني , وانتظري حتى تستوي يعني شئي عليها كل شوي شوفيها يعني بتعرفي انو استوت مو كتير ابو 16 الى 19 دقيقة حسب الكوسايات يعني ازا مناح , لانو بعض الكوسا بتخنزر بالطبخ هههههههه المهم , ازا بتحبي , وقبل ما تطفي عليهن النار , ازا , يعني ازا ازا ازا بتحبي , افقسي بيضة فوقهن وحركيها لمدة دقيقتين و22 ثانية ولا تنسي الملح طبعا بكمية معقولة مو جنونية بتروحي فيها طلاق ازا متزوجة أو اقل شي حردة لبيت اهلك , او ازا مو متجوزة شي بهدلة من امك او اخواتك , المهم بس تسكبيها بالصحن الجميل الرائع , حطي عليها فلفل اسود جميل رشة ناعمة , وطبعا انا بحط ((( كمون ))) غصب عن اكبر راس مرة بهالبلد ههههههههههههههههههههه كمون يعني كمون ... وجيبي خبز من مخبز الشهبندر , مشان ما نطرئك مشوار لمخبز ابن العميد بآخر ماعمر الله عند الزعران الصغار يللي بيبيعوه للتنابل , والله مابعرف اديش صار حق الربطة هههههههههههه او من الشعلان كمان في كان مخبز ابو سركيس ما بعرف يمكن سكر او مخبز ابو محجوب يللي سكر بشارع العابد صار بس حلويات , لك اختي خلاص , خبز والسلام , واهجمي انتي وهالعيلة فورا ..

ويا ستي ان شاء الله 8748 صحة وعافية على قلبك مع كل لقمة ...وقبل كل لقمة وبعد كل لقمة وكل العمر ...

smilest

12-06-2006, 10:17

مشكور أبو النوج على المفركة بالكوسا كتيربحبها أنا وأولادي
بس إلي عدة ملاحظات مشان السرعة والتنبلة أكتر

1ـ لا تحط ماء على الكوسا لأنها بتستوي لحالها بمجرد ما تضع الغطاء عليها لبعد ربع ساعة تقريباً

2 ـ لاتحركها كتير حتى ما تنخبص وتنفعس وتنهرس ويلتعن نفسها

3 ـ مخبز الشهبندر مافيو خبز مشروح بس فيه سندويش ومعجنات فلا حدا يروح لعندو لأنه الأكلة بدها خبز من عند شمسين أو تفاحة من أي سوبر ماركت

4 ـ يخليلى ياك أبو ناجي لا تكتب بألوان السلطة عم يزغو عيوني وإذا مصر لاتكتب بألوان الطيف أكتب بألوان غامقة بليز

أبو ناجي

12-06-2006, 12:09

السيدة الأنيقة المحترمة الكمونية الفاضلة أم أنس الرائعة :

والله قلت اذا في بعض النسوان فعلا تنابل , قلت معليش خليهن يحطوا لو فنجان مي على الكوسا مشان يخلصوا بسرعة ههههههههههههههههه وعالتحريك قلت بس للحمة مشان ما تحترق واول الكوسا مع اللحمة بمعلقة خشب لاحظي بس دقيقة لدقيقتين مشان بس تختلط الكوسا مع اللحم الممتاز الجميل هههههههههههههههههه وعلى كل حال لعيونك رح استخدم الوان غامقة مو فوسفوريه ...والمخبز ياخذوا ازا بدهن من سوبرمان او سوبرماركت , كمان منيح كتير ...ليش يعني المخبز الفرنسي احسن؟؟ كنت اتعامل معه ايام زمان بس مشان اعرف اتدولىء الجبنة مع خبز الريف الفرنسي على اساس يعني من مخابز فوشون ههههههه

برجع وبقول لك ان شاء الله كل الصحة والعافية على قلبك وقلب كل من يقرأ ...وتقرأ طبعا..

smilest

17-06-2006, 15:33

كيفك شيف أبو ناجي ذكرني صديقنا سبيد بأكلة أنا كتير بحبها وحابة أتعلمها

وهيه كريب بالشوكولا .. فهلا علمتنا ياها شيف .. وبكون ممنونة منك

أبو ناجي

17-06-2006, 15:40

الرائعة سمايلست أطيب واحن ام أنس ...

والله هالاكلة مابعرفها , بس بسألك عنها إن شاء الله , لسبب بسيط ...

انا ما بطيق الحلويات , مشان هيك ما بحب لا العنب ولا الكريب ولا المريب ولا الحليب كمان

ههههههههههههههههههههههههههه بس كرمالك خلاص بحاول إسال عنها .....

لك لو مو الضرورة والله حتى الفواكي ما باكلها .... انا بحب اكلات الموالح والحوامض اكتر...

مشان هيك ما بهتم أبدا بأكلات السكر والحلو ...بتخبط نفسي خبط خطير...

بالمناسبة يا صبرية ...تتزكري برنامج كان يطلع الصبح بتقدمه نجاة الجم؟؟ موسيقى تبعه تبع غنية فيروز ...بقطفلك بس هالمرة هالمرة بس شي زهرة ...الخ؟؟؟

وتتزكري مسلسل حارة القصر؟؟ هههههههههههههههههههههههههههههههههه

واسعد الوراق هههههههههههههههههههههه هي اخترت لك لون بيتنجاني مشان عيونك ما تقولي لون سلطات

أبو ناجي

07-09-2006, 21:25

كـولـي فـلاواريـتـو دي لو نـاجـيـاني ....من المطبخ السوري الفرنسي الناجي المشترك

* رأس زهـرة ممتازه متوسط الحجم طازج ورائع وجميل وكربوج

* مئة وست غرامات لحمة خروف ابن ثلاث شهور ويومين ناعمة

* ربطة كـزبـرة جميلة ورائعة خضراء

* سبعـة ( سن ) ثوم

* ملح حسب الرغبة

* 9 غرامات فلفل أسود

* مكعبـين ناجي

* كاسة ماء جميلة ورائعة وصافية

طريــقة التحضير الممتازه :

*******************

* أحضري طنجـرة ( طيفال ) تبع الأطفال ممتازه ورائعة سيدتي في المنتدى وآنساتي وأطـئوطاتي صغيرة .

* ضعيها على غاز جميل ورائع مع قليل من الزيت العباد للشمس عبادة ممتازه .

* قلي الزهرة تقلية رائعة كأنك عم تقلي زهرة وكوسا وبانجان يعني وارفعي الزهرة بره الطنجرة بعد ما تخلصي . بس خلي شوية الزيتات يللي ضلو لانو مو محتـرزة تحطي كمانه .

* أضيفي اللحمه وقليها تقلاية ممتازة ورائعة .

* رجعي الزهرة فوق اللحمه وقلبيهن مع بعض ..حتى يسـتـووا بشكل خطير ورائع .

* اضيفي فورا كاسة المي يللي حكينا عنها , ومكعبين ناجي او ابوه ما بتفرق

* حطي الملحات ولا تكتري الملح , ليش يا حزرك ؟ ترا مرقة ناجي او ابوه فيها بالاساس ملح مركز . بس في ناس بتحب الملح هنه احرار , وفي ناس يا حرام عندهن ضغط دم ما بـيـواتيهن الملح الزايد . المهم كملي وحطي اللي حكينا عنه والفلفل الاسود الجميل الرائع ومشان سمايلست ..حطي كمون تحديدا ..بس ليدي مابعرف ازا بتحب الكمون..مع اني بنصحها بالكمون ..منيح للنفخة الكمون , والزهرة بتعمل نفخة والكمون بيقضي عالنفخة يعني بيصير تعادل 3-3 لصالح المعدة

* انتظري بعد مراقبة الوضع شي ربع ساعة حتى تغلي الامور وضيفي اخر شي الكزبرة والثوم الجميل والرائع واتركيهن شي ست دقايق و23 ثانية ...

* طفي النار بعد كل هالشي وانتظري جوزك حبيبك الرائع الجميل واولادك الرائعين وبناتك الرائعات الجميلات الأطئوطات ويارب الف صحة وعافيه ..

[smilie=41.gif] [smilie=41.gif] [smilie=41.gif] PDT_Armataz_01_11

مع فقرات اخرى قادمة من المطبخ الناجي بإذن الله قريبا بمناسبة رمضان الكريم ..

george

07-09-2006, 21:37

يعني كل هالشي زما حدا عطانا رقم التلفوووووووووووووون...بس ما يكون موبايل ها!!!!
مشان الفاتووووووووووورة....

queen

07-09-2006, 21:43

بعد زماااااااااااان ما شفنا طبخات الشيف ابوناجي العظيم ......ولزيادة المعلومات الزهرة يعني ارنبيط او قرنبيط (( صح ولا لاء))

يسلمو ابو ناجي ... بس انا توبت ما بقا ارجع جرب ولا اكلة لاني استنتجت اني مستحيل اعرف اطبخ

صحي بدي اسئلك ابوناجي شو رايك برمضان كل يوم تعملنا طبق رمضان جكارة بالمحطات يلي كل يوم بتورجينا اكلة شكل

تنك يو ابوناجي العظيم والى اللقاء في الطبخة الجاية

سلاااااااااااامز

أبو ناجي

07-09-2006, 21:52

القرنبـيط , أو بلهجـة أهل شمال اسـكـتلندة ( أر نبيط ) نعم صح يا كوين الجميلة الرائعة
ههههههههههههههههههههههههههههههه

تاني شي معك معك بتتعلمي الطبخ ..مافي اسهل واحلى من الطبخ ...مشان بس ان شاء الله تتزوجي تدخلي لقلب جوزك من خلال معدته ...هيك المتل بيقول..

تاني شي بإذن الله إذا الله عطانا عمر لعيونك والجميع نسوانا ورجالا هههههههه بنعمل اذا فضينا اكلات طيبة برمضان

[smilie=41.gif] [smilie=41.gif] [smilie=41.gif]

queen

07-09-2006, 22:45

...مشان بس ان شاء الله تتزوجي تدخلي لقلب جوزك من خلال معدته ...هيك المتل بيقول..

ايه والله سمعانة بهل المثل بزمناتوووووووووو ...

وهي اذا بتسمحلي ابو ناجي استعيرهم منك ... بس اذا ما بتسمحلي خلص يعني مابزعل كتير [smilie=41.gif] [smilie=41.gif] [smilie=41.gif] [smilie=41.gif]

lady

07-09-2006, 23:57

والله ومشتاقين ياابو ناجي
مشتاقين لاكلاتك الطيبة
مشتاقين لوصفاتك السهلة
مشتاقين لخفة دمك معنا بالمطبخ :)
مشتاقين لهالكلمات الرقيقة يلي بتشهينا عالطبخ اكتر واكتر

يسلموووووووووووووووو
كـولـي فـلاواريـتـو دي لو نـاجـيـاني والله لجرب وانشاالله تطلع طيبة من ايدي:)
وانا كمان بحب الكمون ياابو النوج, بس بعرف انه التوم منيح للنفخة :)

ابو ناجي
نورت مطبخك من جديد عزيزي

يعطيك العافية وبانتظار المزيد

وماتنسى الحلويات للحولين ;)

أبو ناجي

08-09-2006, 11:15

ليــدي ...السيدة الأثـيرة ...والدرة الصقيلة ....والـتوليب الفـواح ..أزكـى من ريحة التفاح...ويللي بيسمع كلامك بيـرتاح ...ويمكن يقول باح باح باح ...هههههههه

إن شاء الله إن اُعطينا عمرا , سنحاول تقديم المسـتطاع من طبخات جميلات رائعات شهيات بمذاقات مختلفات ترضي كافة المعدات والكرشــات ههههههههههههه

وشكرا لك كل الشــكر على هذه الكلمات الطيبات المفعمات بالـشغلات الفوقانيات هههههه

من عيوني فعلا ليدي الرائعة و الجميع لشوف حسب الفضاوة او الفضاء الخارجي شو بقدر اخدم الجميع برمضان ...
[smilie=41.gif] [smilie=41.gif] [smilie=41.gif]

smilest

08-09-2006, 12:58

أبو ناجي الله يعطيك العافية

عنجد أنا كتير بحبها أكلة منزلة بالزهرة ياسولام شو طيبة .. رائعة

طيوبة وما بخلي ولا درة منها إلا وباكلها وبهجم عليها هجم الوحوش في البراري هههههههههه

مع قليل من الفجل وبعدين كاسة شاي أكرك عجم يا سولالالالام بس ما بحطلها كمون ههههههه

أبو ناجي

08-09-2006, 20:52

سـمايـلسـت الرائعة الأنيقة الممتازه ...

أول شي يارب مليون صحة وعافية على قلبك والجميع طبعا..

سابع شي , يا بنت الحلال اسمعي مني وحطي كـمـون ...هلكتيني كل مرة بتـرفضي الكمون العالمي الرائع الكربوج الأمور الأطئـوط ...الكمون يا بنت الحلال والله شغلة فوقانية ممتازه

تاني شي والله والله والله بهاللحظة أكلت هالاكلة من شوي قبل ما نزل هاد التعليق وجنبها رز بشعيرية كمان , الله الله ما اخطرها..مابعرف اذا بتحبي تحطي عليها ليمونة جميلة ورائعة...

ولا بس فجل؟؟ على كل حال فعلا والله اكلة معتبرة ..وخصوصا ترا الشاي بعدها ..اييييييه شي فوق الترتيب ..مرتب مرتب ...شي ناهي والله الشاي بعد هالبطن العنيف ...

هههههههه ايه مو مليار صحة يا اطيب سمايلست؟ طبعا كل الصحة للجميع .. [smilie=41.gif] [smilie=41.gif] [smilie=41.gif] [smilie=41.gif] [smilie=41.gif]

mr.mask

09-09-2006, 04:03

أحلى و أغلى أبو ناجي ...

فعلاً زماااااااااااان ..

و هلق انا بدي أكلة شامية شامية شامية للعضم عضم بلحمه طبعاً .. :mrgreen:

أنا بدي حبيب بلييييييييز أكلة ستي زبئي .. أو أكلة حراء بإصبعه .... لازميني هدول بتعرف منشان رمضان و مجاكرة العالم فيهم ... "mrgreen" ..

أحلى أبو ناجي وأحلى شيف ...

MR.MASK

أبو ناجي

27-09-2006, 13:44

طريقة أبو ناجي في صناعة شراب قمر الدين الصفا الرائع الجميل الكربوج في رمضان الكريم :

* شوفي سيدتي في المنتدى شو بدك تعملي ..او آنستي الرائعة شو بدك تعملي :

* 243 غرام من قمر الدين الصفا الجميل الممتاز

* ماء رائع جميل

* سكر ممتاز

* غاز خطير وجميل

* معلقة ومصفاية غير شكل ممتازه تكون ستانلس ستيل

* وعاء رائع

** سيدتي ...

بتجيبي القمر الدين , بتحطيهن بواعة ..وعاء يعني , المهم , بتجيبي شوية مي سخنين ..مي سخنة فهمتي ؟ مو باردة ..سخنة قلنا ...المهم ..بتحطي هالمي السخنة فوق القمر الدين بحيث انو يغرقوا القمردينات بالمي السخنة ..هالشي بيكون بالليل ...بتتركيهن يا بنت الحلال لتاني يوم العصر ..مشان قبل الفطور بأبو ثلاث ساعات يعني مناح هيك ..

بعدين شو بتعملي ..بتجيبي مصفاية و بتحطي تحتها جاط او وعاء يعني وبتلبشي فيهن هرس ومعس ومرس ..طبعا ما تنسي تغسلي ايدك بشكل جميل جدا ...لازم تمعسيهن للقمردينات بايديكي الحلوات الرائعات الأطئوطات الجميلات ...هيك على معس معس معس حتى يتصفى كل القمر الدين بالمصفاية بيصير بالجاط تحت ..الوعاء يعني ..الماعون كمان ..المهم ...بتبعدي هالمصفاية خلصنا منها ...وبتحركي تحت القمر الدين ..بتضيفي عليه كمية السكر اللي بتحبيها انتي...بعدين بتصيري تضيفي مي باردة نقية جميلة رائعة شوي شوي ..حتى تشوفي سماكته انو صار شراب ولا شو؟؟ لازم ما تخليه نايط ومايط وشاطط ..ولا تخليه كمان ماسك وملبصن ومطيلس ...لازم يعني يكون شراب ذو قوام طيب وجميل وانتي هالشي بتقدري تقدريه اثناء اضافة المي ..حتى تلاقيه صار على كيفك ...بتحطيه بهالبراد ..وانتظري المدفع تبع الإفطار ...وبلي ريقك انتي وجوزك واولادك ...وادعولي ..واذا بنوتات اطائيط صغار كمان لا تنسونا من دعواتكون..وكل عام وانتم بخير [smilie=41.gif] ..

smilest

27-09-2006, 16:48

ههههههههههههه وأحلى امر الدين من ايدين أبو ناجي

الله وكيلك كل مابدي جيب قمرالين على البيت مشان ساويه عصير بيطير من الأكل قبل ما يصير عصير
ويعلى أطاطهم هل الأولاد ما بخلو شي على حاله

الله يعطيك العافية

lady

28-09-2006, 00:00

قمر الدين ياقمري والله وحبيت دوقك..اول شي حابة اعرف ليش سموه قمر الدين خيو..؟

وغير هيك رح جربووووو انشاالله لشوف شغلته :)

ويسلم ربي هالديااات وماتحرمنا من انجازاتك :)

سلاااامو

lin

01-10-2006, 08:47

أذا سمحتي بدي طريقة المعروك أنا مغتربة :(
وحابة أعملو بالبيت أذا ما فيها سقلة
شكر اكتير :D

ليال66

09-11-2006, 23:58

شووووووو ...... يا سلام ..... طريقة عصرية حديثة متطورة غير شكل بالطبخ

تسلم ايدك ابو ناجي ... ويخليلك ناجي يارب ....

بس بدي اعرف من وين كل هالخبرة بفن الطبخ .... وهي عم دق على الخشب ... دق دق دق

بس يا ترى ممكن تكتبلي الكبة المشوية كيف بتصير ...

والله مو منقوووول ..... ههههههه

[Only registered and activated users can see links] ([Only registered and activated users can see links])

أبو ناجي

10-11-2006, 16:23

لــيــال 66 الرائعة الممتازة الكربوجة الحبابة ...

يسلموا كتير كتير كتير كتير كتير على كلامك اللطيف ..

فعلا كل حرف من كلامك بلسم وشفاء للقلوب ..الله يسعدك يارب دوم يا طيوبة

اما عن الطبخات والله هيه تسالي مو اكتر من هيك ..يعني مو حرفة ههههههههه

وبعض الطبخات يللي بعرفها مو كلها ..اما عن الكبة المشوية ..والله مابعرف عنها ..

يعني بحاول بسألك اذا قدرت قريبا إن شاء الله

ويارب صحة وهنا على قلبك وكل القراء والقارئات يا حق ياكريم

:mrgreen:

أما عن ناجي .... فمافي اساسا أم ناجي لحتى يجي ناجي

لساتي بوبو ههههههههههههههههههههه

الله يمتعك يارب بتاج الشباب والصحةوكل مين يقرا او تقرا

فوضى الحواس

19-11-2006, 20:30

اما عن الطبخات والله هيه تسالي مو اكتر من هيك ..يعني مو حرفة ههههههههه

وبعض الطبخات يللي بعرفها مو كلها ..اما عن الكبة المشوية ..والله مابعرف عنها ..

يعني بحاول بسألك اذا قدرت قريبا إن شاء الله
مرحبا أبو ناجي الحبوب الكربوج لك منو وين هالمواهب كلها
ليك أخي أنا حريفة طبخ شو بيصعب عليك بجاوب عنو
وخدماتي مجانية مشان الميزانية
الله لا يحرمنا هالمطبخ الرائع
بس بدي اسأل ليال66 شو قصدك بالمشوية بدك ياها بالفرن و لا على الفحم ؟؟؟؟

ليال66

23-11-2006, 13:49

شكرا فوضى الحواس لأهتمامك .... قصدي مشوية على الفحم

بس الحمد الله سالت عنها وجبتها وكتبتها بهاد القسم بس ما بعرف بيجوز تكون طريقتك اطيب يا ريت تكتبيلي ياها بكون من الشاكرين الك

انا كمان بحب اتعلم طبخات كتير وبحب اجربهن رغم اني مو كتير بحب آكل بس الي مراق كتير بالشغل بالطبخ والحلويات وبحب اكتب دائما طبخات جديدة بدفتري

أبو ناجي

04-03-2007, 13:20

سيدتي الخانم ست البيت ...مطموزيلتي الآنسة الطيوبة ...

اليوم سأقدم لكم طبق ممتاز وفوقاني وغير شكل ..

ألا وهو ...البطاطا المقلية بشكل رائع وجميل وكربوج ..

المقاديــر الممتازة لهذه الأكلة الرائعة الممتازة الكربوجة هو كيـلو بطاطا كبيرة الحجم نظيفة مافيها بعجرة ولا محنحنة ولا حتى قديمة متل الفلين , لازم تكون مشدودة لامعة قاسية قشرتها جميلة عم تلمع جديدة جدا , مافيها عقد خضراء وبنفسجية يللي بتحرق الحلق ....

زيت قلي ممتاز دوار الشمس ..او زيت ذرة ...المهم زيت مازولا جديد ..

مقلاية جميلة و عميقة نوعا ما يا بنت الحلال ..

ملح رائع وممتاز ..شوية كمون لأني انا بحب الكمون ..

فلفل اسود ورائع وفوقاني ...

سبع حبات ثوم غير شكل شي ممتاز يكون ..

سبعة أرغفة خبز طازج وساخن ورائع ...

بندورة وخيار ..حاجه

قطعي يا خانم او يا مطموزيل هالبطاطا بشكل شرائح كل شريحة بسماكة لا تقل عن 6.39 ميليميتر بعد أن تقشري البطاطا وتغسليها وتصفيها من المي , وتملحيها وتفلفليها كمانه معليش لا تحطي هلق كمون ..

المهم بتكوني يا بنت الناس حطيتي هالمقلاية عالنار , وبس يصير الزيت سخن , وعلى فكرة , متل العادة , اوعك تلتهي بشي موبايل وانتي حاطة الزيتات عالنار والا بتصير حريقة عالمية ..

المهم سقطي هالبطاطات بالزيتات ..وانتظري بس تشوفي البطاطا صارت حمرا بعد حوالي 11 دقيقة ارفعيها وحطيها بطبق ممتاز زجاجي بتكوني حاطه تحته محارم مشان تصفي الزيت منه وبتكوني فاعسة الثوم بسفل الصحن مشان يعطي طعمة مع البطاطا الرائعة ...وجيبي البندورة والخيار قطعيهن بصحن جنبهن ..وبخي شوية كمون على وش البطاطا ..وهاتي هالخبزات واهجمي هداك الهجوم الكاسح على هالاكلة الطيبة السريعة وصحة وهنا على قلبك وكرشك سيدتي الخانم ومطموزيلتي الآنسة الطيوبة ..واشربي مي بارد جدا ولذيذ ..

Marsho Wolf

04-03-2007, 14:49

أبو ناجي الرائع الموهوب المذوق الذواق

كيف فيني ساوي فلافل بالجزمز

ولك جزيل الشكر
بتعرف تساوي متبل بطاطا

فوضى الحواس

04-03-2007, 18:11

ابو ناجي الرائع الكربوج
بدي من مطبخ ام فياض تطلبلي شغلة اذا مو موجودة هون
بدي اعرف كيف بيعملو اقراص النعنع بحلب
بدي تقل عليك بالطلب
و يسلمو سلفا

yoos

04-03-2007, 21:48

يعني الصراحة بعد كل هالوصفات الرائعة و الجميلة و بعد هالإعلان ياللي تفاجأت فيه ,
أنا بحسدها لإم ناجي " نيالها فيك إم ناجي يا أبو ناجي " .
و هالصور بشهو كتير شبعوني ككككككككككككككككككككككككككككك

أبو ناجي

21-04-2007, 09:49

على كل حال , مابعرف مين سألت عن أكلة الأبوات ...

الأكلة ترا صعبة شوي , بس مافي شي مستحيل , يعني بدها شوية صبر وتروي وحلم

الأمر الملاحظ بهيك أكلة فوقانية , هو أنو يفضل أكل هيك أكلة بوقت يكون فيه الجو بارد

على الأغلب بالشتاء الجميل , لأنها أكلة ساخنة على المعدة بشكل ممتاز ...

هالأكلة كمان بتنعمل من مصارين الخواريف الحلوين الكرابيج الأمامير , ومن الكرشة تبعهن كمان

البعض بيسميها قبوات – أبوات – حفاتي – مجليس – كمامي – مصارين – ممبار - الخ

رح حاول اتذكر طريقة اختراع هالاكلة نوعا ما :

بنجيب الكمية المطلوبة من المصارين الجميلة , كانت بتنباع بسوق العتيق مابعرف هلق وين عم يبيعوها على كل حال , وكرشة جميلة ورائعة كمان , الطريقة كالتالي.

بنجيب رز جميل ورائع , بنـنـقعه قبل شي ساعة بمي فاترة ونضيفة , وبعد ما يصير هالرز بنغسله تماما من العوالق والمواد الملبصنة والمطيلسة فيه , بنحطه على جنب , بنكون مجهزين جوز ممتاز وبهارات رائعة واهم شي الفلفل الاسود وملح طبعا والبعض بيحب يحشي مع الرز حمص , هي حسب الرغبة بتضل طبعا الجوز بيكون مقلي اول بعدين بنشلفه بهالحشوة الرائعة واذا كمان في صنوبر يا سلام بتكمل الشغلة تماما , المهم , بنجيب هالمصارين والكرشة , بنغسلهن غسيل غسيل غسيل غير طبيعي , يعني عنجد غسيل فوقاني لدرجة الوسوسة بالغسيل , حتى ينضفوا تماما , بنحاول نزيل بعض العوالق متل الشحوم احيانا بتكون مطيلسة ولزقانة بالمواد هي , وبننفخ هديك النفخة بكل مصران , وبنبدا عملية الحشي الرائعة حشي حشي حشي وبنخلي شوي بس مسافة مشان ما تنفزر القطعة , بنخلي حسب الرغبة عشرة سانتي او عشرين طول المصران وبس نخلص حشي للفوهة , بنخيط الفتحة بخيط قطن جميل ورائع وبنعمل عقدة وبنشلفه على جنب , والكرشه نفس الشي بنحشيها وبنخيطها تقريبا بشكل كامل لانها بتكون مفتوحة كلها المسكينة , وكمان بنجمعهن , بعدين بنجيب هالطنجرة الممتازه , بنحط مي نضيفة , وملح جميل , وبهارات وبنسقط فيهن هالامور هي كلها , وبنتركهن يغلوا على هالنار , وبنضيف كمان شوية عصفر حتى يعطي لون ماشي حاله للمرقة الجميلة , وبنتركهن يا بنت الحلال على هالنار حتى يستووا انتي كل شوي بتطلي عليهن يعني ...

طلعيهن ..وكلي ..والف صحه على قلبك وقلب الجميع ..