بلا ولا شي

[Aghalation]

*حدا شفلي البورت كليه تبعي؟...برمت الدنيا ماتركت بلاطة ما دورت تحتها، المشكلة مليان مفاتيح مهمة؛ يعني مثلاً: مفتاح البيت ومفتاح الخزانة ومفتاح البراد، كان معي كمان مفتاح إنجليزي وفرنسي وكوري ....شو فيه كمان؟ ...آه كان فيه كم لقمة هيك بتعرف مفتاح المعدة وكم كيلو سيليكون مفتاح الشهرة....كان فيه كمان صبر، أهم شي الصبر...يعني قديش صرلي مستنية الفرج، بس إجاني...ضيعت البورت كليه!!

* كنت مفتكر حالي عندي قوة وطاقة لا بأس بها..ومعظم الناس بيفكروا مرتين وقت يشوفوني...إنو العلقة معي..مو علقة بنوب...بس لوتلي دراعي.... الظروف ...
بيقولولي لازم أكون أقوى من الظروف...بس ما قدرت..الظروف هي اللي أقوى مني...مع إنها مصنوعة من ورق غير مقوّى...بس الأحكام اللي بتنشأ عنها...مع الظروف...صاروا 2 على البطل..
يعني مو قصة ورق...

*ما بعرف شو عم بيصير معي، يعني كأن في حدا متقصدني ...مبارح ضاع البورت كليه، اليوم ضيعنا الجزدان...كلشي إلا الجزدان...كل أوراقي الثبوتيه فيه ...يعني أنا هلق بلا ثبوتية ، المشكلة مو هون؛ المشكلة كيف بدي إمشي بلا ثبوتية...بطير بعدين، بيصير بدي مين يثبتني!!

* مع إني عملت دوزان للسيارة...وغيرت النوابض...وعيّرت الدواليب...ونفختون...وانتفخ قلبي من المصاريف ...بس الثبوتية...ضايعة...والاختلال صار ملاحظ على حركتي وتحركاتي...والطامة الأنكى هو إنو مرقت السيارة من فحص ميكانيكي شامل بالكمبيوتر والعين المجردة...من قبل الدوائر المختصة والمعنية...ومع ذلك...أفتقد للثبوتية...
يا خوفي يكون إلها علاقة بالمواقف...

*سامعين شي بمرض الشقيقة...نص البلد صايرلها شقيقة ...النص التاني وحيد لأهلو ...بس يشكل عام الكل متضايق من الشقيقة لأن اكتشفنا أخيراً إنو وجع الراس ما بيجيك غير من الدول الشقيقة...وأدام الله عليكم أشقائكم وشقيقاتكم.

* هي بالعموم الشقيقة ووجع الراس...كلو واحد...ضلينا نقول سوا ربينا...لك سوا ربينا...بس الهيئة ربينا لحالنا...مدري وين عبتسرح الشقيقة...أنا خمّنت إنها فورة غضب...بتصيب أي حدا في سن المراهقة وقت يتخن صوتو ويفتكر إنو صار...كبير...
بس ما كنت بتصور إنو في كبير بدو يطبطب ويدلّع...الله العليم على مين يدلع؟؟
على اللي كايدهم...ولا مكايدهم...!!


Yarushka & Aghalation

[Star]

بيقولولي لازم أكون أقوى من الظروف...بس ما قدرت..الظروف هي اللي أقوى مني...مع إنها مصنوعة من ورق غير مقوّى...بس الأحكام اللي بتنشأ عنها...مع الظروف...صاروا 2 على البطل..
يعني مو قصة ورق...
*ما بعرف شو عم بيصير معي، يعني كأن في حدا متقصدني ...مبارح ضاع البورت كليه، اليوم ضيعنا الجزدان...كلشي إلا الجزدان...كل أوراقي الثبوتيه فيه ...يعني أنا هلق بلا ثبوتية ، المشكلة مو هون؛ المشكلة كيف بدي إمشي بلا ثبوتية...بطير بعدين، بيصير بدي مين يثبتني!!

حلوة أبو النوف حلوة كتييير.... يسلمو لالك و للصديقة ياروشكا...
بانتظار المزيد كمان...

[Z. Dragon.]

حلو..... حلو..... حلو.......

طيبة..... طيبة..... طيبة.......

وأحلى دويتتو......

[Dehumanizer]

حلو Aghalation و Yarushka ...

جميل جداً ... وعلى قولة Z. Dragon.

أحلى دويتّو

[Aghalation]

*ممنوع تحكي بالدين، ممنوع تحكي بالسياسة، ممنوع تحكي بالجنس شو ماكان جنسو، وإذا بتحكي عن الفنانين بتكون سطحي وتافه، إذا بتحكي عن حدا...بتصير عم تجيب بسيرة العالم... إذا بدي إحكي عن الرياضة بطلع مسترجلة وإذا حكيت بالثقافة بكون عم نظّر...شو رأيكم إحكي عن ولا شي ...
ولا شي كان بيخاف الله وبيخاف على البلد من كلشي من الفساد من الطائفية من وضع الشباب يلي ما بيعرف من وين جايه ولوين رايح
من الناس يلي بلشت تاكل بعضا من.....................................له على مهلكون يا شباب له له!!!...
إذا حدا سألكون عني...قلولو عفطوها ...كانت عم تحكي عن ولا شي.

* أنا من زمان مقتنع إنو كل مشاكل الشباب..هي بسبب الفراغ...
الفراغ هو المسؤول عن ضياع الشباب واهتمامون بلعب الورق وصيحات الموضة والسيارات والتطبيق والجغلنة والتشخيص والتقسيم ...
ومسؤول عن كل شي مالو قيمة حقيقية لبناء المستقبل....
ومسؤول عن ابتعاد الشباب عن الثقافة والمطالعة والاهتمام الدراسي والتحصيل العلمي...
ومسؤول عن تراجع الوعي الاجتماعي والصحي...والله مو بس الشباب...المجتمع ككل...عبيعاني من الفراغ...أنا بصراحة أدعو لقتل الفراغ....
وقت وصلنا على المحكمة...وجهوا لي تهمة الشروع في جريمة قتل مع سبق الاصرار والترصّد...
لمسؤول كبير..

*غريبة الدنيا...منضل عم ننطر شي وما بيجي...يمكن لأن نحنا أصلاً ما منعرف شو ناطرين... بتروح فرصة منقول سيدي معلش الجايات أكتر من الرايحات...من قليلة عجقة السير بالبلد...بعدين مين قال الجايات أكتر من الرايحات...على شو العالم طوابير قدام السفارات الأجنبية ...وعلى شو نص الشعب إذا مو أكتر صار إسمو" جالية سورية"...فضيت البلد ونحنا لسه منقول الجايات أكتر من الرايحات...الله يجيرنا من سكة اللي بيروح ما بيرجعش!!

* يا أختي نحنا شعب ثوري...من يوم يومنا الثورة تجري في دمائنا...وبتلاقي كل مفرداتنا إلها علاقة بهالشي... ما بتسمعي
غير...انتفض الشعب على طغيان المستعمر...وانتفض السيف في يده....وانتفض بدني من قد ما عصّبت...وانتفض على إجريه ووقف على حيلو....ونفضتلك ياه هاداك البوكس خليتو يدور بمطرحو...وحتى صحن السجاير بيقولو عليه نفّاضة...
لأ...هون يمكن غير شي..هاي بينفضوا فيها...همومون... بس مدري نحنا مين نافض همومه فينا....

* مبارح انحطيت بموقف مزعج...مو لأنو كان معجوق ولا لأن الميكروباصات ما بتوقف عندو...بس لأن صدفت صديق قديم
صرلي شليون سنة مو شايفتو...هلق المشكلة وين؟
المشكلة إنو الذاكرة ما اسعفتني لأتذكر اسمو... قال ما لون طريق لعندي!! الظاهر كان في حدا واسطّو تقيلة نسيان كم مليون دولار
صار عندو مضطرين يسعفوه!!

* قررت أسكن بالمطار....وأشتغل وأكل وأشرب وأتزوج وأجيب ولاد وأربيون...بالمطار...
مو لشي..بس بدي أقلع عن التدخين

Yarushka & Aghalation

[Star]

ههههههه حلوين كتييييييير.... شكرا آغا و ياروشكا و الله يعطيكون ألف عافية... و عم ننتظر الجزء التالت.... :)

[lucifer]

كتير حلوين أبو النوف وياروشكا... :)

[أبو ناجي]

تلازم رائع وجميل , بين غريدين , سنونو وكروان , اتخيل اغاليشن وغطاء رأسه الرائع الشهير وهو طائر محلق في بساتين الغوطة الشرقية كالسنونو , اما عن الرائعة الجميلة ياروشكا أيضا فهي طائر كروان يشدو ويشجينا بألحانة الطربة العذبة ...

ميرسي للتنين مع بعض دفعة وحدة...

[Aghalation]

*يعني ليش بتزعل إذا بيقولولك رجل كرسي؟... شبها رجل الكرسي؟! ليش بيصير كرسي ولا طاولة بلا رجل... بيصيرو للكب....لك إذا رجل أقصر من رجل ما بيمشي الحال فما بالك بكرسي بلا رجل!
بس أنا بعرف إنت ليش زعلان؛ لأنك لسه رجل كرسي ما صرت رجل الساعة... أيه لا تزعل حبيبي ما معظم رجال الساعة كانو أساساً... رجل كرسي.

*هلق إذا إجيتي للصراحة...أنا بيعجبني شوفير الباص...الزلمة رجل مواقف..بكل معنى الكلمة.....ومنتشر....يعني الزلمة إلو خطوة بمعظم مناطق البلد...
بس عندو تباين بحالتين...
وقت يتوقف عند المواقف تبعونو...بيتوقف بقوة ....يعني الفرامل عندو ممتازة...وما شاء الله بسبب وقفتو بيتطربشو الناس يمنة ويسرة....
بس بنفس الوقت وقت بدو يأقلع نحو الموقف التالي...بيكون بطيء...
إذا فكرنا بالسبب...بنلاقي إنو السبب هو الاعتماد على المازوت....وعلى علمك...المازوت بطيء الاحتراق...
فمشان هيك بتلاقي حركة رجل المواقف...بطيئة...
بس وقوفه ضاري ومؤثر...

*بيقولولك قربت تنحل.... أيه شو هالمادة العجيبة يلي ما عم تنحل، جربنا المي وكل أنواع الكلور... حتى الأسيد جربناه وما كانت تنحل! انحل وسطي وما كانت تنحل.... يمكن عن جد صار لازمنا... حل.

*ما بنقدر ...ما خرجنا حل نحنا...لأنو يا عيني ما عنا غير اللون الأبيض...يا الاستسلام للواقع..يا الكفن...والأبيض ما بيحل...بس بينحل عليه...


Yarushka & Aghalation

[أبو ناجي]

حـلو هالدويـتـو جميل اغا الجميل وياروشكا كمانه ...

تابعوا ونحن من ورائكم نتابع ونتعلم يا خيو ...

:mrgreen:

[lady]

ما بنقدر ...ما خرجنا حل نحنا...لأنو يا عيني ما عنا غير اللون الأبيض...يا الاستسلام للواقع..يا الكفن...والأبيض ما بيحل...بس بينحل عليه...

كلام حلو كتير ااغا ويورشكا

يعطيكن العافية

[queen]

يه شو هل الدبسات ... جيدات

شيكرا لكما ايها الثنائيان والى المزيد والمزيد ........

[dr_nour]

ذكرتني بزياد رحباني آغا....

فلقات على كل الموجات...


معتحيات

[sabrin]

لك شو هالمقلزة يلي بتجنن.

[Star]

كتير حلو آغا و ياروشكا...
يعطيكم العافية.....

[lamma]

ما اقول يا ترى ؟ وكيف اقول يا ترى ؟؟؟؟
اردت التعبير ولكن لم اجد الكلمات
اردت النقد فلم اجد السبيل ...
والله في الحقيقة كلمات رائعة
والله يوفقك في مشوارك يارب واريد منك المواصلة في الكتابة لأن الكتابة تريح القلب
اني في أنتظار المزيد

[yarushka]

*ما بعرف الناس شو بدون بهالتاجر مصرّين يحطو وحدة على عينو لأ والرايح والجاي بينبهو إنو في شي على عينك يا تاجر... ياجماعة حدا يشلو ياها أحسن ما تنكسر عينو ... لأن المشكلة أصلية ، عين ديجتال أحدث موديل منقيها من مرج عيون... أيام ما كان في بالمرج عيون سهرانة على حمايتو ومو حاطة عينها عليه!


*مبارح للصدفة باليل سمعتها عم تحكي هيك بصوت واطي، عطيت بالي لإتأكد، طلعت فعلاً بتحكي.... بس ماهيئتها بتتكلم عربي مع إنو حاولو كتير يقنعونا بهالنظرية.... هوه في كم كلمة عربي وشوية حكي بلغة ما عرفتها ولا بدي أعرفها بس بالغالب الأنجليزي طاغي على الحديث يعني فيكون تقولو بتلطش عربي تلطيش، عربي أو عربية ما عادت فارقة ما نحنا صرنا ملطشة بس أهم شي اتأكدت إنو الأرض بتلطش عربي الأرض الأرض.


*جارنا أبو سعيد مافي بتمو غير سيرة العلم وكيف لازم الواحد يحث أولادو على العلم.... النهفة إنو أبو سعيد عندو ولدين واحد بيشتغل حفار شواهد والتاني حارس ليلي ولما بتسألو ليش أولادك ما تعلمو بيعصب وبيقول : حيرتونا وهلكتونا مو إنتو يلي ضليتو تقولو العلم في الصغر كالنقش على الحجر؟؟ ومو إنتو فهمتونا إنو من طلب العلا سهر الليالي!!

*ياترى ليش الكل متمسك باتفاق الطائف؟.... يمكن لأن كلشي عم يغرق ماضل غيرو " طائف".