مشاهدة النسخة كاملة : ساعدوا صديقتي بازمتها العاطفية
bonbonaa1
11-11-2005, 17:10
في وحدة رفيقتي عم تمر بازمة عاطفية وطلبت مني ساعدا وسالتها اذا بتحب اني اخد رايكن بالموضوع باا ما عارضت
القصة بلشت بشب رفيق واحد عندو محل بالشارع يلي ساكنة في ولما شافا عجبتو وعجبا وصار يجي كل يوم مشان يشوفا ولما قلها رفقو صاحب المحل انو رفيقو اللي عجبا حابب يعطيها رقمو ويتعرف عليها رفضت ومن يوما هي حاسة حالها غلطانة لانو هي بتحبو للزلمة والمشكلة انو ما رح تقدر تنساه لانو عم يجي كل يوم صح ما عاد يعملها شي بس هي ما عم تقدر تتجاهلو وتنساه
باا برايكن شو هو الحل ;)
عاشق المساء
11-11-2005, 17:35
والله ما فهمت الموضوع منيح
يعني رفيقو لصاحب المحل بدو يعطيها رقم الهاتف
وهي بتحب صاحب المحل
ولا هي بتحب رفيقو لصاحب المحل
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ :roll:
bonbonaa1
11-11-2005, 17:47
اي هي بتحب رفيقو لصاحب المحل
بدي الحل بسرعة الله يخليك
عاشق المساء
11-11-2005, 17:54
طيب ما فيها شي خليها تاخدو للرقم
وتحكي معه وين المشكلة طالما هي بتحبه
ما في مشكلة أبدا
الحب ليس حكمة يومية او رواية شعرية انما
هو نعمة ربانية
الحب يستأذن المراة في ان يدخل قلبها
اما الرجل يقتحم قلبه دون استأذان اكيد هو بحبها
وبهل الايام صعب تلاقي مين يحبك
أنا برأيي تحكي معه وما تأجل طالما بتحبه وبيحبها
تقبلي تحياتي
انا فى راى انو ما تعطية رقم التلفون لنو الموضوع من الاول غلط
هو اذا اعجب فيها و بصدق ممكن يروح يتعرف على اهلها
اما موضوع التلفون و الحكى الفاضى انا ضدة
و طبعا كل واحد حر فى راية و اختيارة
:D
سكر الاهل اذا دخلو بالموضوع يعني الشغلة فيا خطبة... شلون بدو يخطبو اذا لسا ما بيعرفو بعض منيح؟؟؟.
خلي تاخد رقمو وتحكي معو وتعرفو منيح... مافي شي غلط بالموضوع....
Engelbert
12-11-2005, 00:41
يعني بس يتسلى فيها بالتليفون ........... :cry: لاء اذا عنجد حبها بيروح بيطلبها من اهلها ........ اما التليفون و الحكي بالسر اكيد غلط ..... :cry: و خصوصا هو شب مابتعرف عنو شي ..... بس هيك اعجاب النظرات ...... بركي كان بس بدو يتسلى و يلعب شوي . ليش هي تكون لعبتة :cry:
و مالازم تثق فيه ابدا ........ الا اذا صارت الشغلة جدية . :evil:
و هذا مجرد راي ..........
سلام ..........
Engelbert
أولاً... ليش اعتبرتي انو بدو يتسلى... يعني الشباب بس بيتسلو مثلاً... أكيد لأ...
ثانياً... اذا كان ما بيعرفا منيح شلون بدو يخطبا... ممكن اسألك سؤال... انتي بترضي تنخطبي لواحد ما بتعرفي عنو شي؟ ولا بتحكي معو عالتلفون... اذا بترضي بتكوني غلطانة....
طبعا رح تقولو... الخطبة هي الطريقة اللي بيتعرف فيا الشب عالبنت... بس الفكرة انو البنت اللي بتخطب وبتفك عنا ببلشو الناس بيحكو عليها... وبتعرفو هيك قصص ... يعني المجتمع شوه الخطبة.. ليش لحتا نخليه يوه حياتنا وأحاسيسنا ومشاعرنا كمان.... اذا بدي خاف ما تعفسني سيارة.. بحياتي ما بعبر الشارع...
بس انتو بدكن ما يلي:
(خليها عم تتحسر على ما فاتا.. ولا تعطيه ولا تاخد منو رقم التلفون.. واذا ما اجا خطبا مو مشكلة.. بيكون عاطل وقصدو عاطل... وبيجيها واحد بيخطبا وبتقبل... وبيجوز يكون بهيم وما بينطاق.. بس لأنو خطبا بيمشي الحال... وبتعيش حياتها الزوجية بهالطريقة المتخلفة ... ) هيك بدكن يعني :roll:
المشكلة الأكبر انو لما الواحد بيحكي لحتا يوقف بصف البنات ويساعدن من هالعقد والخوف اللي حطا المجتمع فيون بيكتشف انو هنن ما بدن يساعدو حالن بعرف انو الحق مو عليون بهالشي الحق عالمجتمع... بس الحق عليون لما بيكونو بيعرفو انو معن حق وما بيحكو ولا بيساوو شي وبيرضو بالحال...
أنا شخصياً... ما برضى بربط حالي مع بنت بحياتا ما حكت مع شب... لأني بعتبر أنو رأيها فيني رح يكون ناقص وغلط... وقرارها فيني هيك رح يكون كمان.... بالعكس.. اذا كانت بتحكي مع شباب وبتعرف شباب.. معناتا لما بدها ياني بتكون فعلا عرفانة شو بدا...
تذكرت مقالة لمصطفى محمود.. كان عم يحكي فيها عن ابن حرام وابن حلال... اكتشفت بنهاية المقالة انو اللي كان م يقول عنو ابن حلال هو طفل غير شرعي لرجل وامرأة حبو بعض... وانو اللي كان عم يقول عنو ابن حرام كان طفل شرعي لرجل وامرأة متزوجين ... بس حياتن بدون مشاعر ولا أحاسيس.. زواجن كان وظيفة أو فرض أدوه وبس.
وعلى كل بيضل رأي شخصي... :)
يا استاذ حضاري....
مو غلط انو الشب يحكي مع البنت قبل ما يخطبها.... بس بأصول.. يعني يا في مجتمع ذو بيئه مساعدة.. جامعة مثلاً يا بعلم الأهل من الطرفين... مو بالسر.. واذا حصل الأتفاق وساعدت الظروف.. بتم الخطبة
وليش لما تعتبرو انو بدو يتسلا.. او تعتبرها هيه بدها تتسلى؟؟ 80 % من الجيل الحالي هيك بدو.. بس
وقبل ما تبلش تناقش بدي قللك طلع عالي بتعرفن قبل بتلاحظ... رغم انو مجتمعنا هو الي مفروض يكون الأحسن.. بس!!
يتبع,,,,,,,,,,,,,,,,,
Ayman syr
12-11-2005, 03:20
... مو بالسر
ينصر دينك ..يا أستاذ ...digger
abu_6afesh
12-11-2005, 07:44
الموضوع هدا حسب ماشفتوو انا بدوو يجي ردود كتيير بعد هل كم رد اللي شفتن
حسب رأي المتواضع وبدون ما اطلع شو نكتب ولا مشاكل مجتمع ولا هم يحزنون خليني بحالي وبقلك :
ازا فعلا الشب كتيير كتيير معجب فيها وحاببها متل ماعمبتقولي طيب ليش هل الاشياء عمبتكون
عن طريق صديقوو ما عن طريقوو هوا ورفيقوو البندوق هوا اللي عمبيزبط الاوضاع :)
خليها تتمهل شوي بنبونا رفيقتك لتعرفوو اكتر وبعدين ازا نحست معوو للشب ليش ماهوا الزكي يعطيها الرقم
وشكرا
مرحبا للجميع ...
أول شي عزيزتي بنبونة ...قولي لرفيقتك تنساه للشب لأنو ما بيحبها ولا هي حتى بتحبوا ...لساتها صغيرة وما تعرفت على معالم شخصيتها ...يعني لو بدي اتزوج أول شب فكرت حالي اني بحبو كان يا سلام شو توفيت !!! عفوا قصدي توفقت!!!
هي القصص تبع شافني وشفتوا وفي طرف تالت عم يساعدنا حلوة وبتسلي وبتعبي فراغ عاطفي حتى لو ما حكينا فعليا مع بعض ...قصص حلوة بتصقل شخصيتك وبتخليك تعرفي أكتر شو بدك بهالدنيا بس انو نسميها مشكلة عاطفية وغرام وانتقام لأ!!! هادا أبدا مو حب ...ما بيصير نسخف الحب ونحصره بنظرات التطبيق وأرقام التليفونات ...حرام يا جماعة ...على هالحالة لازم نحب كل شباب الشعلان ويحبونا!!!
منجي لفكرة الخطبة ...غريبة فعلا كيف حددتو مدى جدية الحب بالخطبة على أساس انو يلي ما بدو يتسلى بيخطب...يعني عنجد بتضحك هالفكرة لأنو أغلب يلي عم يتسلوا هنن بالحقيقة المتزوجين مو العزابية ...
بصراحة وبصفاقة اذا بدكن, ليش لحتى الشب يتسلى مع وحدة مو خرج تسلاية في حين انو ملياااااااااان بنات للتسلية فقط وبكامل ارادتهن الشخصية ؟؟ وليش مفترضين انو البنات قطط مغمضة والشباب هنن الهوارين يلي لازم ينخاف منهم ؟ انتو برأيكم مافي بنات ممكن يتسلوا بالشباب ويكون قصدهم مو شريف؟؟
سيد أيمن بدي اسألك ...ليش الحب وحده بيكون بالسر؟ ليش مو نحنا شعب عايشين كل حياتنا بالسر ...منحكي بالسياسة بالسر ...مندخن بالسر...مناقش أفكارنا بالسر ...بنحب بالسر ...عطيني انت وغيرك الأمان لحتى حب أنا وغيري بالعلن بدون ما خاف من رأي المجتمع ورأي الناس يلي تاركين الدنيا وقاعدين يحكموا علي وعلى تصرفاتي وبعدها بيكون بيحقلك تطالبني ما أعمل شي بالسر...
بطريق...
حكي أبو طافش ظريف وخفيف ونظيف ... :)
...بيغ بيبي... حلو كتير الحكي.... ينصر دينك يا استاذ ...نفيييييسة...
.. بدي بس اعقب تعقيب صغير على تعليق digger...
بالنسبة للمجتمع ذو البيئة المساعدة... اذا ما كانت بتروح عالجامعة.. شو بيصير... بيخبرا عالبيت وبيطلعلو ابوها وبيقلو انا بدي احكي مع بنتك واتعرف عليها... وهيك ما بيصير الموضوع بالسر.. بيصير بفضيحة وعار..وبتاكلا كفين أو بهدلة .. :roll:
بس يفهم المجتمع شو يعني علاقة طبيعية بالعلن.. وشو يعني خطبة.. وكيف يحترم البنت وسمعتا وهالحكي كلو.. هداك الوقت منقول مو بالسر... بس انو نحكي من عالاسطح بدون واقعية بس لأنو منتكهرب من كلمة بالسر ..اي ما بيصير.
حاج تقولو بيحبها و بتحبو....... إشفي؟؟؟؟؟
ينعن عالم .... طلعتو عن الموضوع..... يا بنبونة خليها تعطيه رقم تليفونها و تتعرف عليه و بما إنو بيعرفوا شكل بعض -مع إني مو مقتنع إنو الشكل شغلة أساسية- مافي داعي يطلعوا مع بعض أول فترة لوقت ما تعرفه منيح... و مع ذلك ممكن يكون عم يغشها و يصورلها إنه هو منيح.... بس بما إنه عندها ثقة بنفسها خليها تجرب..مو غلط..
لا هي بتحبه و لا هو بيحبها و الشي يللي عم تحس فيه مو حب... هي شغلة آنية لحالة معينة عم تعيشها بس هالحكي مو معناتها إنو ما ممكن يتطور و يصير حب...
سلام يا عاشقين....
Ayman syr
13-11-2005, 04:48
مرحبا يا حبايب :
ما بيصير نسخف الحب ونحصره بنظرات التطبيق وأرقام التليفونات ...حرام يا جماعة ما بتسمعي الحب من أول نظرة..أشهر قصص الحب بدأت بنظرة ...
وقال الشاعر :
كل الحواث مبداها من النظر ............ومعظم النار من مستصغر الشرر
كم نظرة فعلت في قلب صاحبها ........ فعل السهام بلا قوس ولا وتر
أنتو برأيكم مافي بنات ممكن يتسلوا بالشباب ويكون قصدهم مو شريف؟لأ لهون و بس ..بدك تسمحيلي..هدول ما عاد اسمهن ..بنات ..هدول صار يتصنفو ..بغير صنف ..اللي بالي بالك.
سيد أيمن بدي اسألك ...ليش الحب وحده بيكون بالسر؟ ليش مو نحنا شعب عايشين كل حياتنا بالسر خطأ..مين قللك أنو عايشينها بالسر ..ليش عم تعممي الحالة الخاصة اللي إنت أو السيد lucifer عايشينها ...على المجتمع كلو..
بتحكي بالسياسة بالسر ..بتدخني بالسر ..بتناقشي أفكارك بالسر ..مع احترامي إلك لازمك إعادة تأهيل نفسي ..حتى تستعيدي ثقتك ..بنفسك ..ليش لتعملي كل هي الأمور بالسر ..خايفة من الناس..من الحكومة ....من أهلك
طول ما الإنسان مقتنع بما يفعل ...ما بيخاف من حدن .
الحكي كمان إلك سيد lucifer لأنك بتتكهرب من كلمة بالسر.
عطيني انت وغيرك الأمان لحتى حب أنا وغيري بالعلن أنا من جهتي عاطيكي الامان ....حبي على كيفك ..مين مانعك .
يا سيدتي :
مو بهذا العصر ..بأقسى المجتمعات صرامة وقيود ..حتى بأيام شامية ..كانت العالم تحب و تعشق ..ما شفتي شلون محمود حبا لفتحية .
اسمحيلي قللك ..آرائك العاصفية ..قصدي العاطفية ..مممم.مو غلط ....بس لازمها إعادة ترتيب
إنت عم تعاني من شي أسمو ...صراع متناقضات فكرية.
عزيزتي بنبونة ...قولي لرفيقتك تنساه للشب لأنو ما بيحبها ولا هي حتى بتحبوا ...لساتها صغيرة وما تعرفت على معالم شخصيتها..عزيزتي بنبونة
لا تقطعي بنصيب البنت ..خلي الأمور تمشي بالطريق الصحيح ..و بالأصول....لأنو حبيبتي
لبين ما تتكون معالم شخصيتها بتكون عنست ...و القطار..توووووووت..توووووت..فاتها .
و لا تقليلي ما بتعنس .. الشباب عم تعنس ...صح يا رجال ؟ ;)
أيمن
انا عندي الحل
عطوني عنوان البنت و انا بحكي مع البنت عرواق و بشوف اش الترتيب ,,,,,,, انا طبيعتي خدوم :mrgreen:
طيب خللوني احكي جد
حجي هالقصة مالا حل ,,,,,,, هيه البنت اش الله الهما تتصرف ,,,,,,, يعني بالمختصر التطبيق و الزغللة حلوين بس حرام
و اذا بحبا و قتلان يطلبا و يجوزو
يعني ما حدا يبررلي انو يحكو مع بعض ,,,,,,,,,, بدن يحكو يحكو ماعندي مشكلة بس ماحدا يقللي هالشي صح مع اني 99 بالمية مننا منعمل هيك
تركو الشغلة تمشي لحالا و دعولن بالوليد توفيق ,,,,,,,,, باااااااااي :mrgreen:
يلي قالتو بيغبيبي صحيح تماما هذا مو أسمو حب بس فيها تجرب و ما تخلي حسرة شو عليه إذا طلع عميتسلى بتتركو و بتشوف حدا تاني أركز مو عيب الواحد يتعلم من كيسو كل هلتجارب بتزيد الإنسان خبرة و قوة .
بس حابة قول لأيمن إنو إذا البنات حابين يتسلوا ما بيكون غلط و ما بيكونوا أسمون...... مثل ما عم تقول
ليش الشب لما يتسلى شو بيكون أسمو؟ رجال و لا فحل و لا كازانوفا
يعني ليش ما منسمي الرجل أسماء بشعة كمان و لا بس الامرأة يلي إلها أسماء؟
مشتركة جديدة
abu_6afesh
13-11-2005, 11:08
هلا فيكي ظريفة اول شي نورتي المنتدى ..
بس كلام بيغ بيبي صحيح واوافقها ممكن للمرة الاولى او التانية ..
بس حابة قول لأيمن إنو إذا البنات حابين يتسلوا ما بيكون غلط و ما بيكونوا أسمون .......
ياستي ظريفة انا ضدك تمام بهل النقطة لا البنات بيطلعلن ولا الشباب بيطلعلن التنين حيكوونوو غلط
وتنيناتن اسموون ....... بس مافي شب صح يعمل هيك او بنت صح تعمل هيك ....
الموضووع حاجتوو لانوو من البداية شكلوو رح يعمل مشاكل وحواراات كتيرة ...
وهلا فيكي ظريفة مرة تانية وكسبنا اخت جديدة بالمنتدى
Aghalation
13-11-2005, 11:40
سلام عليكم....شلون الجميع...إنشاء الله كل عام وإنتو بألف خير...
كلمتين ...خفاف نظاف...
قولي لرفيقتك خليها تلتهي بدراستها وتحضر للمذاكرات والفحص النصفي....
هادا حكي ما بيحكوه غير صف الثامن وأحيانا التاسع....وأنا عندي شك إنو رفيقتك صف عاشر... خليها تطلّع على دراستها أفيد وأنفع إلها من هالعلاك المصدّي...لسه عبتشوفو من الشباك بمحل رفيقو اللي بالحارة... وهو عبيطلع عليها...وبإيدها لقاطة الغسيل وهو على البسكليت...
هي لسه صغيرة وما عندها لا وعي...ولا فصل....لجملة المشاعر التي قد تختلجها عنوة وبسرعة...من بين جوع وعطش وإعجاب وإمساك وحب وإسهال...
قال بتحبو قال....!!
وبعدين شو هالصلة الوصل بينها وبينو؟؟ رفيقو صاحب المحل...إي يا عيني....
قوليلها عيب وما بيجوز هالحكي هاد...خليها تلتهي بدراستها بكره بتندم...
ومعلش الشباب والصبايا عطو رأيهم وأهلا وسهلا بالجميع....بس خلاصة الحديث هو اللي قلتلك ياه...
و يا مستر speed في إلي معك كلمتين بعينك لاحقا....
أشهر قصص الحب بدأت بنظرة ...
هذا صحيح سيد أيمن ولم تنتهي بالزواج ...
بتحكي بالسياسة بالسر ..بتدخني بالسر ..بتناقشي أفكارك بالسر ..مع احترامي إلك لازمك إعادة تأهيل نفسي ..حتى تستعيدي ثقتك ..بنفسك ..ليش لتعملي كل هي الأمور بالسر ..خايفة من الناس..من الحكومة ....من أهلك
ما كتير خليت فيها احترام يا سيد أيمن طالما انو صرحت بأنو لازمني اعادة تأهيل نفسي ...كنت فعلا بتمنى ردك يكون أذكى من هيك وما يتضمن تهجم مباشر على شخصيتي لأنو أنا عم احكي عن حالة عامة ...على كل مو مشكلة أنا فعلا بنسى أحيانا انو في ناس عايشين بالمدينة الفاضلة ...
في مقولة كتير بحبها وكتير واقعية ومو مقتبسة من قصة أليس في بلاد العجائب "شكرا لأنك سمحت لي أن أنتقدك بشكل مجحف، لقد جعلني ذلك أشعر بأهميتي الفائقة"
حتى بأيام شامية ..كانت العالم تحب و تعشق ..ما شفتي شلون محمود حبا لفتحية .
يعني اذا شواهدك عم تجيبها من المسلسلات فما فيني غير قلك... :roll: كلامك صحيح تماما...
اسمحيلي قللك ..آرائك العاصفية ..قصدي العاطفية ..مممم.مو غلط ....بس لازمها إعادة ترتيب
إنت عم تعاني من شي أسمو ...صراع متناقضات فكرية.
ظريف التشخيص ;) بس المشكلة اني ما طلبته ..هلأ ممكن تستفيد منه بما انو تعذبت وأنجزته وتحطو بكتاب "تأديب النفوس على ألواح البوظ" ما بضمنلك المبيعات بس بياعين الفلافل أكيد رح يحبوه...
لا تقطعي بنصيب البنت ..خلي الأمور تمشي بالطريق الصحيح ..و بالأصول....لأنو حبيبتي
لبين ما تتكون معالم شخصيتها بتكون عنست ...و القطار..توووووووت..توووووت..فاتها .
و لا تقليلي ما بتعنس .. الشباب عم تعنس ...صح يا رجال ؟ ;)
صح بنبونة ...خليها تركب أول قطار بتلاقيه ...بيمشي ما بيمشي المهم قطار ... ياخدها على حلب ياخدها على جهنم المهم انو قطار وبيعمل توووووووووت توووووووووت...
المقابلة انتهت ..
بطريق ...
كيفك Ayman ? تعا لإحكيلك هالحكاية.... بس قبل ما إبدا خلينا نكون متفقين إنه إختلاف وجهات النظر لا يفسد للود قضية...
ما بتسمعي الحب من أول نظرة..أشهر قصص الحب بدأت بنظرة ...
مافي شي إسمو حب من أول نظرة.... هادا شي إسمو self-fulfilling prophecy يعني بتشوف واحد أو وحدة و بيعجبك شكلها فبتقعد بتتخيل و بتحلم إنو هي تماما متل ما إنت بتتمنى و بتصير تحبها على أساس هي الشخص يللي إنت عم تدور عليه.... طيب "ماذا لو" طلعت شخصيتها تماما الشي يللي إنت بتكرهه و بترفضه.... سؤالي رح تبقى بتحبها؟ رح جاوب عنك... لأ.... هلأ إذا طلعت شخصيتها و تفكيرها متل ما إنت بدك بيكون كتير منيح بس هاد بيرجعنا لنقطة إنو الحب مو بالنظر يا ألبي...
كل الحواث مبداها من النظر ............ومعظم النار من مستصغر الشرر
كم نظرة فعلت في قلب صاحبها ........ فعل السهام بلا قوس ولا وتر
حلو هالحكي كتير .... بحبها هالأبيات أنا..... بس خليني ضيف بيتين من نفس القصيدة
والمرء مـا دام ذا عين يقلبها.......... في أعين الناس موقوف على خطر
يـسر مقلته ماضر مهجته............. لا مرحبا بسرور عاد بالضرر
ما بدي إشرحلك الأبيات لأنو معناهن واضح
عزيزتي بنبونة
لا تقطعي بنصيب البنت ..خلي الأمور تمشي بالطريق الصحيح ..و بالأصول....لأنو حبيبتي
لبين ما تتكون معالم شخصيتها بتكون عنست ...و القطار..توووووووت..توووووت..فاتها .
و لا تقليلي ما بتعنس .. الشباب عم تعنس ...صح يا رجال ؟
بدي ناقض ردي يللي كتبتو أول شي.... طيب بلكييييييييييييييي البنت يللي عم تحكي عنها عمرها 15 سنة... خليها تكن على وجعها و تدرس منيح لأنو سمعت إنو السنة علامات السلوك داخلة بالمجموع
بس ما فهمت أنا أيمن شو يعني"تمشي الأمور بطريقها الصحيح"؟
أولا أود أن أن أقول أني مع السيد أيمن، وتحليله جميل جداً ومنطقي بالنسبة لموضوع اعادة التأهيل ومسلسل أيام شامية والحب والغرام والشعر في العصر الجليدي ... ورقصني يا جدع. [smilie=pdt_piratz_: ::
لا تواخذنا دخيلك يا استاذ أيمن... بما أننا بدنا إعادة تأهيل.. أرجو أن لا تناقشنا.. معلومك نحنا مو من المستوى (التأهيلي) الذي تملكه... نحنا جماعة دراويش وشغلتنا درويشة....
كلامي الآن لصديقاي سبيد وبيغ بيبي... مو للأخ أيمن... لأنو اعتبر انو بدنا اعادة تأهيل... (لا تقرا التالي أيمن دير بالك.. منشان ما يصير معك نقص تأهيل متل مو صاير معنا.. يا حصرتي علينا...)
انتو الجوز من كل عقلكن عم تردو عليه... يعني أنا تناقشت مع كتير من الناس هون.. وبغض النظر عن إختلافنا الشديد في وجهات النظر ولكن كان هدفي وهدفن واحد وهو النقاش المنطقي... وبالأخير واحد بيقتنع بوجه نظر التاني..أو على الأقل بمنطقية الفكرة.. بس الأخ هون عندو استعداد يزت حكي.. وكل مرة يكتب رد شكل وبيجوز ردوده تكون متناقضة... بس لحتا يثبت أنو ما حدا بيغلبو بـ (الحكي).... مرة بيقول مو بالسر.. ومرة بيقول خليها تروح تحب... روحو شوفو شو رادد علي بموضوع الفياغرا... منطق بيفلق الصخر...
أيمن شو عم تساوي هون.. وصلت لهون بالقراءة...انا مو قلتلك ما تقرا ... عجبك هيك.. هلأ بيصير معك متلنا...
[smilie=pdt_piratz_:
Dehumanizer
13-11-2005, 16:35
أعتقد بأن الغاية من السؤال الأساسي هو تقديم النصائح والآراء فقط، مع العلم بأني لا أوافق على طرح مثل هذه الأسئلة هنا في المنتدى، كون هناك اختلاف في وجهات النظر والتي ستأتي من كل صوب معتمدة على المبادئ أو التجارب الشخصية السابقة أو حسب عقلية كل فرد منا.
كما نرى احتد النقاش ليتحول إلى معركة كلامية كل منكم أخذ ينتقض الآخر على طريقة طرحه لأفكاره ووجهة نظره في الموضوع.
أتمنى من كل شخص أن يكتب ما عنده لأنها في النهاية مجرد وجهة نظر شخصية لا داعي لأن ينتقد كل منا الآخر عليها والدخول في نقاشات عقيمة لا فائدة منها، وعدم الرد بردود لا تخدم مصلحة الموضوع المطروح.
الأخ Ayman syr
المناقشة لا تفسد للود قضية كما قال أخي Speed ولا تتهجم في كلامك لشخص كاتب الرأي أو الموضوع، نحن هنا لمجرد الإدلاء بآرائنا الشخصية ووجهات نظرنا فقط.
الأخ lucifer
سعة صدرك وتحملك النقد أمر مطلوب، إلمع بأخلاقك وأرقى بأهدافك فوق كل تصرفات طائشة واجعل من ردودك نموذج أعلى لشخصك.
InStigaToR
13-11-2005, 17:27
غريبة
ليش ما سأل حدى ليش رفضت الرقم بالبداية؟
حابب يعطيها رقمو ويتعرف عليها رفضت
هل هو من مبدأ يمتنعن وهن راغبات؟ او مبدأ المرأة لغز مالو حل؟او مبدأ محتارة ؟ او مبدأ عصفور بالايد....او....
هل لها تداعيات اجتماعية؟ خافت البنت من العواقب؟ متعلمة انو عيب او حرام تحكي مع شب؟
طيب هل الحق معها؟ هل الخوف مبرر؟ من كتر القصص الي سمعتا عن الشباب الي بيتسلو بالبنات و بعدين بيزتوهون و بيتجوزو وحدة "عفيفة"؟ او هل البرمجة الاجتماعية هي السبب؟
طيب و ليش بعدين ندمت و رجعت بقرارها؟ هل هو تمرد على المجتمع و تقاليدو؟ ام هو يأس البنات بسسب قلة العرسان و خوفهم من التعنيس، فيختارو المجازفة عسى و لعل؟
اسألة مشوقة و بدها اجابة، لذى مطلوب محلل اجتماعي ذو خبرة، خريج جامعة، خادم جيش ، تحت سن ال 30 ،لبق المظهر، يجيد اللغة الانكليزية و استعمال الحاسوب براتب مغري، (طبعا بالاخير بطلع الراتب شي 5 الاف ليرة)
الأخ lucifer
سعة صدرك وتحملك النقد أمر مطلوب، إلمع بأخلاقك وأرقى بأهدافك فوق كل تصرفات طائشة واجعل من ردودك نموذج أعلى لشخصك.
والله يا صديقي سعة صدري تتوقف عندما يجرؤ أحد على الهزء بشخصي بالطريقة السخيفة والتافهة والخارجة عن الموضوع أصلاً والتي قام بها السيد أيمن أكثر من مرة... يا ريت أحسن ما تعطوني محاضرات بالأخلاق .. تشوفو الأخ شو كتب بردوده بمواضيع سابقة... أنا رغم طريقتي بالكتابة.. فإني لم أهزأ بشخص أبداً في المنتديات... نقد فكرة معينة شيء والمسخرة علي شخص شيء آخر تماماً.. لا تتوقع مني أن أترك له المجال لإعادة ذلك ثانية أبداً...
شكراً على النصيحة أخي دهيومنايزر.... وعلى تحملكم لأخلاقي السيئة الشرسة والطائشة... لا تواخذونا...
نست اسالكن.... اذا اخدت رقمو... وحكو وطلعو مع بعض بعدين فشششششش.... فرطت القصه
شو بيكون صار...؟؟ اذا حبو بعض بدن يتحطمو... اذا طلع واحد منن عو عو.. التاني بس بدو يتحطم
واذا ما فرطت... بدها تروح تقلو لابوها انو في شب بديو يخطبها... ومنين تعرفتي علية؟؟؟من هاد البياع
الي عندن بالحارة..... يا سولاااااااااااااااااااااااااااااااااام... شي مليح :!:
bonbonaa1
15-11-2005, 14:47
يا سيدي شكرا الكن كلكن عالاجوبة وكل يلي حكيتو صح وفيو وجهات نظر كتييييييييييير منيحة بس بدكن صاحبة العلاقة تفهم وتقتنع بالقصة
ضوءالقمر
19-11-2005, 23:58
شو رايك بنبونة تقرأي معي انت ورفيقتك هل القصة بعتقد انها ممكن تفيد وعلى فكرة
القصة قراتها بمجلة وهي من واقعنا لعل وعسى تصلي لبر الامان بعقلانية اكثر.
هاد ياستي في وحدة اسمها رندة وعمرها 17 سنة تعرفت على شب واسمه ادهم
وعمره22 سنة وصار بيناتهم علاقة حب قوية لدرجة تمادت عن هذه الكلمة وحدودها
عرفتي كيف يعني صار في تصرفات وتجاوزات لاتكون الا بين زوجين وهل الشي
وصل لانو رندة تحمل من ادهم كنتيجة مؤكدة طبعا لهل التجاوزات الي عم تصير بالخفايا
واللقاءات ووالوعود المكللة بالكلام المعسول ومع هيك اخونا ادهم الله يرضى عنو طلب ايد
رندة من والدها لكن الاب رفض وذلك لسوء اخلافه وسمعته السيئة المعروفة بين الناس
الاان اصدقاء ادهم غرسو فيه افكار شيطانية بضرورة اخذه لقرار حاسم وجريء على اعتبارانه رجل ومن حقه
خطف حبيبته واخذها في اي وقت وبالفعل اقتحم ادهم منزلها وجرها امام عيني والدتها ووالدها اللذان
لايعرفان بحملها لانها كانت خلال 6 شهور تشد بطنها بالقماش وترتدي الملابس الفضفاضة ومع خروجها من منزل
اهلها بدات حياتها الجديدة التي حاولت فيها طمس فضيحتها مع ادهم بولادتها بعد شهرين بطريقة بعيدة عن الآدمية
حيث اتفقت مع زوجها(قصدي فارس الأحلام الشجاع) على القاء طفلهما المولود بالزبالة بعد ان تم نقله من المشفى
على الموتورالى الحاوية وبعدها قاما بالفرار ولكن قدر الله ومشيته فوق كل ذلك حيث عثر عليه احد القاطنين في تلك
المنطقة وكان المولود على قيد الحياة وكان مصاب بتشوهات في جسده وكتل بسبب شد والدته لبطنها اثناء فترة الحمل
تم ابلاغ الشرطة بالامر وبعد البحث تم العثور على والديه وذلك من خلال راشيته كانت ممزقة ومرمية بالزبالة مع الطفل
ذكر فيها اسم الام والاب.
في مقولة كتير بحبها انا وهي:(كل شيءيبدأ بالصح لاينتهي الابالصح). :roll:
والله الموضوع ما بدو كل هالشي
انا بوافقو الراي لبادي
كلام بادي هو اكتر الشي مقنع
وشكرا للكل
:mrgreen:
Powered by vBulletin® Version 3.7.3
Copyright ©2000 - 2009, Jelsoft Enterprises Ltd